ວາງສີລາລືກໂຄງການຂະຫຍາຍລະບົບນໍ້າປະປາ ນະຄອນ-ຫລວງພະບາງ

ໃນວັນທີ 23 ມີນາ 2022 ກົມນໍ້າປະປາ ກະຊວງໂຍທາທິການ ແລະ ຂົນສົ່ງ ໄດ້ມີພິທີວາງສີລາລືກໂຄງການຂະຫຍາຍລະບົບນໍ້າປະປາ ນະຄອນ-ຫລວງພະບາງ ທີ່ໂຮງງານຜະລິດນໍ້າປະປາ ບ້ານຜານົມ ນະຄອນ-ຫລວງພະບາງ ແຂວງຫລວງພະບາງ, ເຂົ້າຮ່ວມວາງສີລາລືກມີທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານ ຄຳຂັນ ຈັນທະວີສຸກ ເຈົ້າແຂວງຫລວງພະບາງ, ທ່ານ ເຄນີຈິ ໂຄບາຢາຊິ ເອກອັກຄະລັດຖະທູດ ຍີ່ປຸ່ນ ປະຈຳລາວ, ຫົວໜ້າອົງການໄຈກາປະຈຳລາວ, ຫົວໜ້າກົມນໍ້າປະປາ, ຫົວໜ້າພະແນກໂຍທາທິການ ແລະຂົນສົ່ງແຂວງ…

ໂຄງການຂະຫຍາຍລະບົບນໍ້າປະປາ ນະຄອນ-ຫລວງພະບາງ ແມ່ນໄດ້ຮັບທຶນຊ່ວຍເຫລືອຈາກອົງການໄຈກາ ປະເທດຍີ່ປຸ່ນປະຈຳລາວ, ໂດຍມີໜ້າວຽກທີ່ສຳຄັນຈະກໍ່ສ້າງ ແລະ ຂະຫຍາຍຄື: ກໍ່ສ້າງ ແລະ ປັບປຸງສິ່ງອຳນວຍຄວາມສະດວກຂອງໂຮງງານຜະລິດນໍ້າປະປາເພີ່ມຕື່ມ 6.000 ແມັດກ້ອນຕໍ່ມື້, ປັບປຸງ ຕິດຕັ້ງລະບົບໄຟຟ້າ ແລະກົນຈັກ, ກໍ່ສ້າງອ່າງເກັບນໍ້າສູງຕື່ມ 1.500 ແມັດກ້ອນ, ວາງທໍ່ສົ່ງ ແລະ ທໍ່ແຈກຈ່າຍ ຕື່ມອີກ 58 ກິໂລແມັດ, ຕິດຕັ້ງລະບົບຄວບຄຸມ ແລະ ອື່ນໆ. ທັງນີ້ ກໍເພື່ອຮັບປະກັນການສະໜອງນໍ້າປະປາທີ່ສະອາດ, ປອດໄພ, ມີຄຸນນະພາບ ໃຫ້ປະຊາຊົນພາຍໃນນະຄອນ-ຫລວງພະບາງ ກໍຄືໃຫ້ສາມາດຕອບສະໜອງຕາມຄວາມຮຽກຮ້ອງຕ້ອງການຂອງນັກທ່ອງທ່ຽວ ທີ່ເຂົ້າມາທ່ຽວຊົມນະຄອນ-ຫລວງພະບາງ ນະຄອນສີຂຽວໃຫ້ນັບມື້ນັບຫລາຍຂຶ້ນ.