Moderna ກຽມຂໍອະນຸມັດ FDA ນຳໃຊ້ວັກຊີນປ້ອງກັນໂຄວິດ-19 ໃນເດັກອາຍຸຕໍ່າກວ່າ 6 ປີ
Moderna ເຜີຍຜົນທົດລອງທາງຄລີນິກວັກຊີນປ້ອງກັນໂຄວິດ-19 ມີປະສິດທິພາບປ້ອງກັນການຕິດເຊື້ອ 44% ໃນເດັກອາຍຸ 6 ເດືອນ – 2 ປີ ແລະ 33% ໃນເດັກອາຍຸ 2-5 ປີ ກຽມຂໍອະນຸມັດ ອຢ ອາເມລິກາ ນຳໃຊ້ກໍລະນີສຸກເສີນໃນກຸ່ມເດັກນ້ອຍ.
ວັນທີ 24 ມີນາ 2022, ສຳນັກຂ່າວຕ່າງປະເທດລາຍງານວ່າ: Moderna ບໍລິສັດຜູ້ຜະລິດຢາລາຍໃຫຍ່ສັນຊາດອາເມລິກາ ເປີດເຜີຍວ່າ: ທາງບໍລິສັດຈະຍື່ນຂໍອະນຸມັດການນຳໃຊ້ວັກຊີນປ້ອງກັນໂຄວິດ-19 ໃນເດັກອາຍຸຕໍ່າກວ່າ 6 ປີ ຈາກສຳນັກງານອາຫານ ແລະ ຢາອາເມລິກາ (FDA).
Moderna ລະບຸວ່າ: ບໍລິສັດໄດ້ມີການທົດລອງທາງຄລີນິກຕໍ່ວັກຊີນປ້ອງກັນໂຄວິດ-19 ໃນໄລຍະທີ່ສາຍພັນໂອມິຄຣອນກຳລັງລະບາດຢ່າງໜັກ ໂດຍຜົນການທົດລອງຊີ້ວ່າ: ວັກຊີນຂອງ Moderna 2 ໂດສ ມີປະສິດທິພາບປ້ອງກັນການຕິດເຊື້ອປະມານ 44% ໃນເດັກອາຍຸ 6 ເດືອນ – 2 ປີ ແລະ 38% ໃນເດັກອາຍຸ 2-5 ປີ.
ທ່ານ ສເຕຟານ ແບນເຊລ (Stephane Bancel) ຜູ້ບໍລິຫານຂອງ Moderna ກ່າວໃນຖະແຫລງການວ່າ: “ຈາກຂໍ້ມູນຂອງບໍລິສັດ ບໍ່ມີເດັກຄົນໃດມີອາການໜັກຈາກໂຄວິດ ແລະ ຜູ້ປ່ວຍທີ່ເປັນພະຍາດນີ້ສ່ວນຫລາຍບໍ່ມີອາການຮຸນແຮງ ເຮົາຈຶ່ງຕັດສິນໃຈຍື່ນຄຳຮ້ອງໄປຫາສຳນັກງານອາຫານ ແລະ ຢາ ເພື່ອຂໍອະນຸມັດນຳໃຊ້ວັກຊີນໃນເດັກອາຍຸຕໍ່າກວ່າ 6 ປີເປັນກໍລະນີສຸກເສີນໂດຍໄວທີ່ສຸດ”.
ທັງນີ້, ຖ້າໄດ້ຮັບການອະນຸມັດຈາກສຳນັກງານອາຫານ ແລະ ຢາອາເມລິກາ, Moderna ຈະກາຍເປັນວັກຊີນປ້ອງກັນໂຄວິດ-19 ຊະນິດທຳອິດທີ່ໄດ້ຮັບອະນຸຍາດໃຫ້ໃຊ້ໃນເດັກທີ່ມີອາຍຸຕໍ່າກວ່າ 6 ປີ ໂດຍຈະສັກໃນປະລິມານ 25 ໄມໂຄຣກຣາມ 2 ຄັ້ງ ເວັ້ນໄລຍະ 28 ວັນ ລະຫວ່າງໂດສທີໜຶ່ງກັບໂດສທີສອງ.
Moderna ລະບຸໃນຖະແຫລງການວ່າ: ບໍ່ມີຂໍ້ກັງວົນໃນດ້ານຄວາມປອດໄພຂອງການໃຊ້ວັກຊີນໃນເດັກນ້ອຍ ໂດຍບໍລິສັດບໍ່ໄດ້ຮັບລາຍງານການເສຍຊີວິດ ຫລື ກໍລະນີການເກີດຜົນຂ້າງຄຽງ ເຊັ່ນພາວະກ້າມຊີ້ນຫົວໃຈຂາດເລືອດ ຫລື ເຍື່ອຫຸ້ມຫົວໃຈອັກເສບ ເຊິ່ງເປັນອາການທີ່ສູນຄວບຄຸມ ແລະ ປ້ອງກັນພະຍາດອາເມລິກາລະບຸວ່າຖືກພົບເລື້ອຍຫລັງສັກວັກຊີນຊະນິດ mRNA ຂອງໄຟເຊີ ຫລື ໂມເດິນາ ໂດຍສະເພາະໃນຜູ້ຊາຍທີ່ມີອາຍຸນ້ອຍ.
ໂມເດິນາອະທິບາຍວ່າ: ຜົນຂ້າງຄຽງໃນເດັກນ້ອຍນັ້ນບໍ່ຮຸນແຮງ ແລະ ສ່ວນຫລາຍຈະພົບຫລັງສັກວັກຊີນໂດສສອງແລ້ວ ໂດຍເດັກອາຍຸຕໍ່າກວ່າ 2 ປີທີ່ໄດ້ຮັບວັກຊີນຂອງໂມເດິນາ 17% ພົບວ່າມີໄຂ້ປະມານ 38 ອົງສາ. ຂະນະທີ່ໃນເດັກອາຍຸ 2-5 ປີ ພົບວ່າມີໄຂພຽງ 14%, ສ່ວນອາການໄຂ້ສູງກວ່າ 40 ອົງສາ ພົບໜ້ອຍ.
ສຳລັບເດັກທີ່ມີອາຍຸຕໍ່າກວ່າ 5 ປີນັ້ນ ຖືເປັນກຸ່ມປະຊາກອນຊ່ວງອາຍຸດຽວໃນອາເມລິກາທີ່ຍັງບໍ່ມີສິດສັກວັກຊີນປ້ອງກັນໂຄວິດ-19 ເຊິ່ງຈາກຂໍ້ມູນຂອງສູນຄວບຄຸມ ແລະ ປ້ອງກັນພະຍາດອາເມລິກາ ພົບວ່າ: ໃນໄລຍະທີ່ໄວຣັສໂຄວິດ-19 ສາຍພັນໂອມິຄຣອນ ທີ່ສາມາດແພ່ກະຈາຍເຊື້ອຢ່າງວ່ອງໄວ ກຳລັງລະບາດໜັກໃນອາເມລິກາ ໄລຍະເດືອນມັງກອນຜ່ານມາ ມີເດັກໃນກຸ່ມອາຍຸດັ່ງກ່າວຕິດເຊື້ອໄວຣັສ ແລະ ຕ້ອງເຂົ້າຮັບການປິ່ນປົວໃນໂຮງໝໍເພີ່ມຂຶ້ນເຖິງ 5 ເທົ່າ ເມື່ອທຽບໃສ່ໄລຍະທີ່ສາຍພັນເດວຕາລະບາດສູງສຸດໃນປີຜ່ານມາ.
ນອກຈາກໂມເດິນາແລ້ວ, ກ່ອນໜ້ານີ້ ໄຟເຊີ-ໄບໂອເອັນເທກ ບໍລິສັດຢາລາຍໃຫຍ່ຜູ້ພັດທະນາວັກຊີນປ້ອງກັນໂຄວິດ-19 ອີກແຫ່ງໜຶ່ງຂອງອາເມລິກາ ກໍໄດ້ຍື່ນຂໍອະນຸມັດການນຳໃຊ້ວັກຊີນປ້ອງກັນໂຄວິດ-19 ໃນເດັກອາຍຸຕໍ່າກວ່າ 5 ປີ ໃນເດືອນກຸມພາຜ່ານມາ ເພື່ອຕອບສະໜອງການແພ່ລະບາດຂອງໄວຣັສໂອມິຄຣອນ ແຕ່ເນື່ອງຈາກຂໍ້ມູນດ້ານປະສິດທິພາບຂອງວັກຊີນຍັງບໍ່ພຽງພໍ ຈຶ່ງເຮັດໃຫ້ການອະນຸມັດຕ້ອງຊັກຊ້າອອກໄປ ໂດຍຄາດວ່າໄຟເຊີຈະດຳເນີນການສົ່ງຂໍ້ມູນເພີ່ມຕື່ມຕໍ່ສຳນັກງານອາຫານ ແລະ ຢາໃນເດືອນເມສານີ້.
ອ້າງອີງ:
https://www.cnbc.com/…/covid-moderna-vaccine-for-young…
https://www.nytimes.com/…/moderna-coronavirus-vaccine…
https://www.reuters.com/…/moderna-seek-regulatory…/
