ກົມອະນາໄມ ແລະ ສົ່ງເສີມສຸຂະພາບ ແຈ້ງການກ່ຽວກັບການສັກວັກຊີນເຂັມ 3 ແລະ ເຂັມກະຕຸ້ນ ເຂັມ 4
ວັນທີ 24 ມີນາ 2022 ນີ້ ກົມອະນາໄມ ແລະ ສົ່ງເສີມສຸຂະພາບ ອອກແຈ້ງການກ່ຽວກັບການສັກວັກຊີນເຂັມ 3 ແລະ ເຂັມກະຕຸ້ນ ເຂັມ 4 ດັ່ງລາຍລະອຽດລຸ່ມນີ້:
1. ກົມອະນາໄມ-ສົ່ງເສີມສຸຂະພາບ ຂໍແຈ້ງມາຍັງທ່ານຫົວໜ້າພະແນກສາທາລະນະສຸກນະຄອນຫລວງ ແລະ ພະແນກສາທາລະນະສຸກແຂວງ 17 ແຂວງ ໃຫ້ຊາບກ່ຽວກັບການສັກວັກຊີນກັນພະຍາດໂຄວິດ-19 ເຂັ້ມກະຕຸ້ນຮອບ 2 (ເຂັ້ມ4) ໃຫ້ແກ່ກຸ່ມເປົ້າໝາຍບຸລິມະສິດ ແລະ ກຸ່ມທົ່ວໄປແຕ່ອາຍຸ 18 ປີຂຶ້ນໄປ
2. ໃຫ້ບໍລິການ ສັກວັກຊີນ ໂຄວິດ 19 ສັກເຂັມກະຕຸ້ນຮອບ 2 (ເຂັ້ມ4) ພາຍຫລງໄດ້ຮັບເຂັ້ມກະຕຸ້ນຮອບ1 (ເຂັມ3) ຊຶ່ງຫ່າງກັນ 3 ເດືອນຂຶ້ນໄປ ໃຫ້ກຸ່ມເປົ້າໝາຍທີ່ເປັນບຸລິມະສິດເຊັ່ນ:
– ກຸ່ມພະນັກງານສາທາລະນະສຸກ, ກຸ່ມພະນັກງານທີ່ເຮັດວຽກປ້ອມດ່ານໜ້າທີ່ມີຄວາມສ່ຽງ ເຊັ່ນ: ພະນັກງານການທູດ, ຜູ້ເດີນທາງເຂົ້າ-ອອກ, ພະນັກງານເຮັດວຽກຢູ່ດ່ານຊາຍແດນ, ກຳລັງປ້ອງກັນຊາດປ້ອງກັນຄວາມສະຫງົບພະນັກງານກະຊວງຕ່າງໆ ແລະ ອົງການບໍລິການທີ່ເຮັດວຽກກັບຄົນຫລາຍຄົນ ລວມທັງທະນາຄານ, ທ່ອງທ່ຽວ, ໂຮງຈັກໂຮງງານ ແລະ ອື່ນໆ
– ກຸ່ມຄົນທີ່ມີພະຍາດພູມຄຸ້ມກັນບົກຜ່ອງ ຫລື ມີພະຍາດປະຈຳໂຕ ລວມທັງຜູ້ສູງອາຍຸ 60 ປີຂຶ້ນໄປ
3. ເງື່ອນໄຂຜູ້ທີ່ຈະສັກເຂັ້ມກະຕຸ້ນຮອບ 2 (ເຂັມ4) ຢູ່ ສປປ ລາວ
– ຜູ້ໄດ້ຮັບວັກຊີນ J&J ຫລື Sputnik Light ໜຶ່ງເຂັ້ມ ຄົບ 2 ເຂັ້ມ ໄດ້ສອງເດືອນຂຶ້ນໄປ ສາມາດສັກວັກຊີນ AstraZeneca ຫລື Pfizer ເປັນເຂັມກະຕຸ້ນທີ່ໜຶ່ງ ແລະ ພາຍຫລັງເຂັມກະຕຸ້ນໜຶ່ງໄດ້ສາມເດືອນຂຶ້ນໄປ ສາມາດຮັບວັກຊີນເຂັ້ມກະຕຸ້ນທີ່ສອງໄດ້.
– ຜູ້ໄດ້ຮັບວັກຊີນ Sinopharm/Sinovac ຄົບ 2 ເຂັ້ມ ໄດ້ສອງເດືອນຂຶ້ນໄປ ຄວນສັກວັກຊີນ ເຂັ້ມກະຕຸ້ນຮອບທີ 1 AstraZeneca ຫລື Pfizer ແລະ ພາຍຫລັງເຂັ້ມກະຕຸ້ນໜຶ່ງໄດ້ສາມເດືອນຂຶ້ນໄປສາມາດຮັບວັກຊີນເຂັ້ມກະຕຸ້ນທີສອງໄດ້
– ຜູ້ທີ່ໄດ້ຮັບວັກຊີນ Sputnik V, AstraZeneca ຫລື Pfizer ຄົບ 2 ເຂັ້ມ ໄດ້ສາມເດືອນຂຶ້ນໄປ ສາມາດສັກວັກຊີນ ເຂັ້ມກະຕຸ້ນຮອບທີ 1 ໃຊ້ວັກຊີນ AstraZeneca ຫລື Pfizer ແລະ ພາຍຫລັງເຂັ້ມກະຕຸ້ນຮອບໜຶ່ງ(ເຂັ້ມ3)ສາມເດືອນຂຶ້ນໄປສາມາດຮັບວັກຊີນເຂັ້ມກະຕຸ້ນທີ່ສອງ (ເຂັມ4) AstraZeneca ຫລື Pfizer ໄດ້ວັກຊີນທີ່ຈະໄດ້ຮັບໃນໄລຍະນີ້ແມ່ນວັກຊີນ AstraZeneca ຫລື Pfizer ລາຍລະອຽດແມ່ນ ໃຫ້ກວດເບິ່ງປະຫວັດການຮັບວັກຊີນຜ່ານມາ ແລະ ອີງໃສ່ຄູ່ມືຕາຕະລາງການໃຫ້ວັກຊີນ
– ສຳລັບຜູ້ທີ່ຕິດເຊື້ອພະຍາດໂຄວິດ-19 ພາຍຫລງປິ່ນປົວດີແລ້ວ 2 ເດືອນ ສາມາດມາຮັບວັກຊີນໂຄວິດໄດ້ເລີຍບໍ່ວ່າຈະເປັນເຂັມ 1, ເຂັ້ມ 2 ຫລື ເຂັ້ມກະຕຸ້ນກໍຕາມໂດຍອີງໃສ່ຕາຕະລາງການໃຫ້ວັກຊີນຜ່ານມາ
– ສຳລັບກຸ່ມອາຍຸ 12-17 ປີ ແມ່ນໃຫ້ສັກເຂັ້ມກະຕຸ້ນຮອບ 1 (ເຂັມ3) ໃນໄລຍະນີ້ແມ່ນອະນຸຍາດໃຫ້ແຕ່ໃຊ້ວັກຊີນ Pfizer ເທົ່ານັ້ນ ໃນສະເພາະແຂວງ ຫລື ເມືອງທີ່ມີເງື່ອນໄຂໃຊ້ວັກຊີນຊະນິດນີ້.
ສຳລັບໂຮງຫມໍ ທີ່ຢູ່ຫ່າງໄກ ເດີນທາງໄປມາຫຍຸ້ງຍາກ ສຳລັບກຸ່ມອາຍຸ 12-17 ປີ ແມ່ນໃຫ້ໃຊ້ວັກຊີນ Sinopharm/Sinovac ເປັນເຂັ້ມກະຕຸ້ນ.
– ສໍາລັບອາຍຸ 12-17 ປີ ແມ່ນຍັງບໍ່ອະນຸຍາດໃຫ້ສັກວັກຊີນເຂັ້ມກະຕຸ້ນຮອບ 2 (ເຂັມ4) ຢ່າງເດັດຂາດ.
4. ການສັກວັກຊີນເຂັ້ມກະຕຸ້ນຮອບ 1 (ເຂັມ 3) ແລະ ເຂັ້ມກະຕຸ້ນຮອບ 2(ເຂັ້ມ4) ແມ່ນໃຫ້ຈັດຕັ້ງປະຕິບັດ
ສຳເລັດກ່ອນປີໃຫມ່ລາວໃນທົ່ວປະເທດ ໂດຍ ນຳໃຊ້ວັກຊີນ AstraZeneca ເປັນບູລິມະສິດ ໃນກຸ່ມອາຍຸ 18 ປີ ຂຶ້ນໄປ ໃຫ້ໄດ້ໃຊ້ໄວເທົ່າທີ່ໄວກ່ອນວັກຊີນຈະຫມົດອາຍຸໃນເດືອນມີນາ ແລະ ເມສາ
5. ໃຫ້ເພີ່ມທະວີວຽກງານໂຄສະນາສຸຂະສຶກສາ ໃຫ້ຂໍ້ມູນເຂົ້າຮອດເຂົ້າເຖິງກຸ່ມເປົ້າໝາຍໂດຍສະເພາະຜູ້ສູງອາຍຸ, ຜູ້ມີພະຍາດປະຈຳໂຕ, ແມ່ຍິງຖືພາ ແລະ ແມ່ລູກອ່ອນ
6. ມອບໃຫ້ສຳນັກງານອົງການ ຫົວໜ່ວຍທຸລະກິດ ຄອບຄົວ ໄດ້ມີການຕິດຕາມກວດກາ ເບິ່ງສະມາຊິກຂອງຕົນເອງ ມີໃຜທີ່ຍັງບໍ່ໄດ້ສັກ ເມື່ອຄົບກຳນົດຕາມໄລຍະເວລາຂອງການສັກ ທີ່ໄດ້ກ່າວມາຂ້າງເທິງນັ້ນຈົ່ງໄດ້ມີການຈັດຕັ້ງປຸກລະດົມກັນອອກມາສັກ ໃຫ້ຄົບຕາມໄລຍະທີ່ໄດ້ກຳນົດ.
ດັ່ງນັ້ນ, ຈຶ່ງແຈ້ງມາຍັງທ່ານຫົວໜ້າພະແນກສາທາລະນະສຸກແຂວງ ເພື່ອຊາບ ແລະ ຊີ້ນຳຫນ່ວຍງານຮັບຜິດຊອບໃນຂັ້ນແຂວງ ຂັ້ນເມືອງ ແລະ ໂຮງໝໍນ້ອຍ ໃຫ້ພ້ອມກັນຈັດຕັ້ງປະຕິບັດຕາມເນື້ອໃນຂ້າງເທິງໃຫ້ຖືກຕ້ອງ ແລະ ໄດ້ຮັບຜົນສຳເລັດຕາມຄາດໝາຍ.
