ແມນຢູ ຮຽກ ເທນ ຮາກ ສຳພາດງານຮຽບຮ້ອຍແລ້ວ

ແມນເຊສເຕີ ຢູໄນເຕັດ ທີມໃຫຍ່ແຫ່ງພຣີເມຍລີກ ອັງກິດ ຈັດການຮຽກ ເອຣິກ ເທນ ຮາກ ຜູ້ຈັດການທີມດາວຮຸ່ງຂອງ ອາແຈັກ ອຳສະເຕີດຳ ມາສຳພາດງານເພື່ອຫວັງເຂົ້າຮັບຕຳແຫນ່ງຜູ້ຈັດການທີມຄົນໃຫມ່ຂອງສະໂມສອນຢ່າງເປັນທາງການແລ້ວ ຕາມລາຍງານຈາກ ເດລີ ເມລ ສື່ຊື່ດັງຂອງອັງກິດ.

ເດລີ ເມລ ເປີດເຜີຍວ່າ ແມນເຊສເຕີ ຢູໄນເຕັດ ເປີດໂຕະເຈລະຈາກັບ ເທນ ຮາກ ເຖິງຄວາມເປັນໄປໄດ້ໃນການເຂົ້າມາຮັບຕຳແຫນ່ງຜູ້ຈັດການທີມຄົນໃຫມ່ໃນຖິ່ນ ໂອນ ແທຣບຟອດ ເມື່ອວັນຈັນທີ່ຜ່ານມາ ໂດຍພວກເຂົາມີແຜນຈຳສຳພາດງານຕົວເລືອກຄົນອື່ນໆຄື ເມົາຣີຊີໂອ ໂປເຊັດຕີໂນ (ເປແອສເຊ), ຄວນເນ ໂລເປເຕກີ (ເຊບີຢາ) ແລະ ຫລຸຍ ເອັນຣີເກ (ທີມຊາດສະເປນ) ຕໍ່ໄປນຳອີກ.

ຟາບຣີຊີໂອ ໂຣມາໂນ ນັກວິເຄາະຕະຫລາດບານເຕະຊື່ດັງຊາວອິຕາລີ ເປີດເຜີຍວ່າ ລະຫວ່າງການສຳພາດຄັ້ງນີ້ ເທນ ຮາກ ໄດ້ສອບຖາມ ແມນ ຢູໄນເຕັດ ເຖິງແຜນການສ້າງທີມສຳລັບອະນາຄົດ ແລະ ງົບປະມານໃນການຊື້ນັກເຕະໃຫມ່ເຂົ້າມາເສີມທີມນຳອີກ.

ທັງນີ້ ແມນຢູ ຫວັງຈະປະກາດແຕ່ງຕັ້ງຜູ້ຈັດການທີມມຄົນໃຫມ່ພາຍໃນເດືອນຫນ້າ ຫລັງຈາກທີ່ໄດ້ສຳພາດຜູ້ຈັດການທີມທີ່ເປັນຕົວເລືອກທຸກຄົນຄົບຮຽບຮ້ອຍ ໂດຍຫາກພວກເຂົາຕັດສິນໃຈຮັບ ເທນ ຮາກ ມາຮ່ວມງານແທ້ ກໍຫນ້າຈະຕ້ອງຈ່າຍຄ່າຊົດເຊີຍໃຫ້ ອາແຈັກ ປະມານ 4 ລ້ານປອນ.