ພຣີເມຍລີກ ເຊີນ ຣູນີ-ວິເອຣາ ເປັນນັກເຕະຕຳນານເຂົ້າຫໍກຽດຕິຍົດ

ພຣີເມຍລີກ ອັງກິດ ໄດ້ປະກາດລາຍຊື່ອະດີດນັກເຕະທີ່ໄດ້ຮັບກຽດໃຫ້ເຂົ້າສູ່ຫໍກຽດຕິຍົດຂອງລີກ ຫລື Hall Of Fame ເຊິ່ງກ່ອນຫນ້ານີ້ມີອະດີດນັກເຕະທີ່ໄດ້ຮັບກຽດຢູ່ໃນຫໍກຽດຕິຍົດມາແລ້ວເຖິງ 8 ຄົນ ປະກອບໄປດ້ວຍ ອາລັນ ເຊຍເຣີ, ເທຍຣີ ອອງຣີ, ເດວິດ ເບັກແຮມ, ຣອຍ ຄີນ, ເອຣິກ ຄັນໂຕນາ, ແຟຣັງ ແລມພາດ, ເດນນິສ ເບີກແຄມ ແລະ ສະຕີເວັນ ເຈີຣາດ.

ເຊິ່ງຫລ້າສຸດ ພຣີເມຍລີກໄດ້ປະກາດໃຫ້ ເວນ ຣູນີ ສຸດຍອດດາວຍິງຂອງ ແມນເຊສເຕີ ຢູໄນເຕັດ ແລະ ປາທຣິກ ວິເອຣາ ອະດີດກອງກາງຈອມໂຫດຂອງ ອາເຊນອລ ເປັນອະດີດນັກເຕະຄົນທີ 9 ແລະ 10 ທີ່ເຂົ້າສູ່ຫໍກຽດຕິຍົດຂອງລີກ ຕາມ 8 ຕຳນານມາຕິດໆ.

ໂດຍ ຣູນີ ໄດ້ເປີດໃຈເຖິງການໄດ້ເຂ້າເປັນສ່ວນຫນຶ່ງຂອງ ຫໍກຽດຕິຍົດໃນຄັ້ງນີ້ວ່າ :  ເປັນເລື່ອງທີ່ຫນ້າຍິນດີທີ່ໄດ້ເປັນສ່ວນຫນຶ່ງຂອງຫໍກຽດຕິຍົດຮ່ວມກັບອະດີດຫມູ່ຮ່ວມທີມ ແລະ ຄູ່ແຂ່ງທຸກຄົນທີ່ຢູ່ໃນຫໍກຽດຕິຍົດ ແລະ ຖືເປັນອີກ 1 ຄວາມຊົງຈຳທີດີຫລາຍໆ ຂອງຊີວິດລາວນຳອີກ ’’.

‘‘ ຂ້ອຍໃຫຍ່ມາຫລິ້ນບານເຕະ ຝັນພຽງວ່າຢາກໄດ້ແຊ໊ມກັບສະໂມສອນ ແລະ ຂ້ອຍເຮັດໄດ້ທັງຫມົດແລ້ວ ການເຂົ້າມາສູ່ຫໍກຽດຕິຍົດ ຖືເປັນອີກ 1 ຄວາມສຳເລັດຂອງຂ້ອຍ ຂອບໃຈທີ່ເລືອກໃຫ້ຂ້ອຍມາເປັນສ່ວນຫນຶ່ງ ຖືເປັນອີກ 1 ຄວາມຊົງຈຳດີໆໃນຊີວິດຂອງຂ້ອຍເລີຍ ’’.

ຕະຫລອດອາຊີບການຫລິ້ນອາຊີບ ຣູນີ ຫລິ້ນຢູ່ 2 ທີມເທົ່ານັ້ນໃນພຣີເມຍລີກ ຄື ເອຟເວີຕັນ ແລະ ແມນເຊສເຕີ ຢູໄນເຕັດ ເຊິ່ງຫາກນັບການລົງຫລິ້ນໃນພຣີເມຍລີກ ກັບທຸກສະໂມສອນ ລາວລົງຫລິ້ນໄປທັງຫມົດ 491 ເກມ ຍິງໄປ 208 ປະຕູ ກັບອີກ 112 ແອສຊິສ.

ຂະນະທີ່ ອະດີດຫົວຫນ້າທີມ ອາເຊນອລ ໄດ້ເປີດເຜີຍວ່າ ການເຂົ້າສູ່ຫໍກຽດຕິຍົດຄັ້ງນີ້ ຖືເປັນອີກຫນຶ່ງຄວາມຊົງຈຳດີໆໃນຊີວິດ ແລະ ໄດ້ເຂົ້າໄປເປັນສ່ວນຫນຶ່ງຮ່ວມກັບອະດີດຫມູ່ຮ່ວມທີມອາເຊນອລ ໃນຍຸກດຽວກັນຢ່າງ ເທຍຣີ ອອງຣີ ແລະ ເດນນິສ ເບີກແຄມ ເປັນສິ່ງທີ່ພິເສດຫລາຍ.

ປາທຣິກ ວິເອຣາ ຖືເປັນອີກ 1 ນັກເຕະທີ່ຫນ້າຈົດຈຳຂອງແຟນບານ ອາເຊນອລ ທຸກຄົນ ທັງລີລາການຫລິ້ນບານໃນສະຫນາມ ຫລື ຄວາມສຸດຍອດໃນການຕັດເກມ ແລະ ອີກ 1 ລີລາທີ່ທຸກຄົນຈຳໄດ້ດີຄືການຟາດປາກກັບ ຣອຍ ຄີນ ຜົນງານຂອງລາວຕະຫລອດອາຊີບໃນພຣີເມຍລີກ ລົງສະຫນາມໄປ 307 ເກມ ຍິງໄປ 31 ປະຕູກັບອີກ 31 ແອສຊິສ.