ນັກວິໄຈອົດສະຕຣາລີພັດທະນາ ວິທີປິ່ນປົວໂຄວິດ-19 ຈາກ “ເລືອດ” ຂອງຜູ້ຕິດເຊື້ອທີ່ຫາຍດີແລ້ວ
ວັນທີ 23 ມີນາ 2022, ສຳນັກຂ່າວຊິນຮົວລາຍງານວ່າ: ຄະນະວິໄຈຈາກສະຖາບັນວິໄຈການແພດເບິກໂຮເຟີ (QIMB Berghofer) ຂອງອົດສະຕຣາລີ ຄົ້ນພົບຫລັກຖານໃໝ່ວ່າ: ເລືອດຂອງຜູ້ປ່ວຍທີ່ຫາຍດີຈາກພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ສາມາດນຳມາໃຊ້ເພື່ອປົກປ້ອງປະຊາຊົນກຸ່ມເບາະບາງໄດ້.
ການວິໄຈດັ່ງກ່າວ ເຊິ່ງຕີພິມໃນວາລະສານພີແອລໂອເອສ ພາໂທເຈນ (PLOS Pathogens) ແລະ ເຜີຍແຜ່ໃນວັນທີ 22 ມີນາ ສະແດງໃຫ້ເຫັນເຖິງການໃຊ້ປະໂຫຍດຈາກພູມຕ້ານທານບຳບັດຈາກທີເຊລ (T cell) ກັບຜູ້ທີ່ມີພາວະພູມຕ້ານທານອ່ອນແອ.
“ການວິໄຈນີ້ເຮັດໃຫ້ເຮົາມີຄວາມຫວັງວ່າ ເຮົາຈະສາມາດພັດທະນາພູມຕ້ານທານບຳບັດຈາກທີເຊລ ໃຫ້ສາມາດປິ່ນປົວພະຍາດໂຄວິດ-19 ຊະນິດກາຍພັນ ສາຍພັນຕ່າງໆໃນກຸ່ມຜູ້ປ່ວຍທີ່ອ່ອນແອທີ່ສຸດໄດ້” ຄໍຣີ ສະມິດ ຫົວໜ້າທີມວິໄຈ ກ່າວ.
ອີກອັນໜຶ່ງ, ທີເຊລເປັນເຊລເມັດເລືອດຂາວທີ່ເປັນສູນກາງການຕອບສະໜອງທາງພູມຕ້ານທານແບບສະເພາະຂອງມະນຸດ ແລະ ສາມາດລະບຸເຊລທີ່ເປັນອັນຕະລາຍເພື່ອກຳຈັດພວກມັນໄດ້ ເຊິ່ງລວມທັງເຊລຊີ້ນປົ່ງ ແລະ ເຊື້ອໄວຣັສອື່ນໆ ໂດຍການສຶກສາເບື້ອງຕົ້ນພົບວ່າຂະບວນການດຽວກັນນີ້ສາມາດໃຊ້ປ້ອງກັນພະຍາດໂຄວິດ-19 ໄດ້.
ກຸ່ມອາສາສະໝັກ 60 ຄົນໃນລັດຄວີນແລນຂອງອົດສະຕຣາລີ ເຊິ່ງເຄີຍຕິດເຊື້ອພະຍາດໂຄວິດ-19 ໄດ້ບໍລິຈາກເລືອດເພື່ອໃຊ້ໃນການກວດສອບຜົນປະໂຫຍດເບື້ອງຕົ້ນ ກ່ອນຈະພົບວ່າເລືອດຂອງບາງຄົນມີປະສິດທິພາບຈະສ້າງທີເຊລເພື່ອໃຊ້ຕໍ່ສູ້ກັບພະຍາດໂຄວິດ-19 ເຊິ່ງຖ້າປະສົບຜົນສຳເລັດ ຄະນະວິໄຈຈະສາມາດຈັບຄູ່ທີເຊລກັບຜູ້ປ່ວຍ ແລະ ສົ່ງທີເຊລໄປໃຫ້ຜູ້ປ່ວຍອາການຮຸນແຮງໄດ້ ໂດຍນັກວິໄຈປຽບທຽບວ່າ ວິທີການນີ້ທຽບໄດ້ກັບການໃຫ້ເຄມີບຳບັດໃນຜູ້ປ່ວຍມະເຮັງ.
ການວິໄຈຊີ້ວ່າ: ກົນລະຍຸດການປິ່ນປົວເພີ່ມຕື່ມຕ່າງໆ ຈະຍັງມີຄວາມສຳຄັນຕໍ່ໄປ ເນື່ອງຈາກພະຍາດໂຄວິດ-19 ສາຍພັນໃໝ່ໆ ຍັງເກີດຂຶ້ນຢ່າງຕໍ່ເນື່ອງ ແລະ ດື້ຕໍ່ວັກຊີນ.
