ຈີນພົບກັບດຳເຮືອບິນ China Eastern Airlines ແລ້ວ ລໍຖ້າສືບສວນຫາສາເຫດການຕົກ
ຈີນພົບກັບດຳເຮືອບິນໂດຍສານໂບອິ້ງ 737 ຂອງສາຍການບິນ China Eastern Airlines ທີ່ປະສົບອຸປະຕິເຫດຕົກໃນເຂດປົກຄອງຕົນເອງກວ່າງຊີຈ້ວງແລ້ວ ພົບເສຍຫາຍໜັກຍັງບໍ່ສາມາດລະບຸໄດ້ວ່າເປັນເຄື່ອງບັນທຶກຂໍ້ມູນການບິນ ຫລື ເຄື່ອງບັນທຶກສຽງຫ້ອງນັກບິນ.
ວັນທີ 23 ມີນາ 2022, ສຳນັກຂ່າວຊິນຮົວລາຍງານວ່າ: ໜ່ວຍກູ້ໄພຈີນຢືນຢັນພົບກັບດຳຂອງເຮືອບິນໂດຍສານສາຍການບິນ China Eastern Airlines ທີ່ປະສົບອຸປະຕິເຫດໃນເຂດປົກຄອງຕົນເອງກວ່າງຊີຈ້ວງທາງຕອນໃຕ້ຂອງຈີນ ພ້ອມຈຸບິນ ແລະ ຜູ້ໂດຍສານລວມ 132 ຄົນ ໃນຕອນບ່າຍວັນທີ 21 ມີນາຜ່ານມາ.
ກ່ອນໜ້ານີ້, ທາງການຈີນໄດ້ສົ່ງເຈົ້າໜ້າທີ່ກູ້ໄພຫລາຍກວ່າ 2.000 ຄົນ ພ້ອມເຮືອບິນບໍ່ມີຄົນຂັບ ຫລື ໂດຣນ (UAV) ໄປຈຸດເກີດເຫດ ເພື່ອໃຫ້ຄົ້ນຫາຜູ້ລອດຊີວິດ ແລະ ກັບດຳຂອງເຮືອບິນ ທ່າມກາງຄວາມຍາກລຳບາກໃນການປະຕິບັດງານ ເນື່ອງຈາກພື້ນທີ່ດັ່ງກ່າວຢູ່ກາງປ່າເຂົາ.
ໃນຕອນເຊົ້າວັນທີ 23 ມີນາ ປະຕິບັດການຄົ້ນຫາ ແລະ ກູ້ໄພໄດ້ຢຸດລົງຊົ່ວຄາວ ເນື່ອງຈາກເກີດຝົນຕົກໜັກ ແລະ ສ່ຽງຕໍ່ດິນເຈື່ອນ ກ່ອນຈະກັບມາເລີ່ມດຳເນີນອີກໃນເວລາຕໍ່ມາ.
ຂະນະດຽວກັນ, ສຳນັກຂ່າວບລູມເບິກໄດ້ອອກລາຍງານວ່າ: ຜູ້ອຳນວຍການພະແນກສອບສວນອຸປະຕິເຫດຂອງສຳນັກງານການບິນພົນລະເຮືອນແຫ່ງປະເທດຈີນ ຖະແຫລງວ່າ: ກັບດຳທີ່ຖືກພົບນັ້ນຢູ່ໃນສະພາບຄວາມເສຍຫາຍຢ່າງຮຸນແຮງ ຈົນບໍ່ສາມາດບອກໄດ້ວ່າເປັນເຄື່ອງບັນທຶກຂໍ້ມູນການບິນ ຫລື ເຄື່ອງບັນທຶກສຽງຫ້ອງນັກບິນ. ພ້ອມລະບຸວ່າ: ເຈົ້າໜ້າທີ່ກູ້ໄພກຳລັງພະຍາຍາມຄົ້ນຫາກັບດຳທີ່ເຫລືອອີກກັບໜຶ່ງຢ່າງສຸດຂີດ.
ບລູມເບິກລະບຸວ່າ: ໂດຍປົກກະຕິແລ້ວ ການຄົ້ນຫາກັບດຳ ເຊິ່ງເປັນອຸປະກອນບັນທຶກຂໍ້ມູນການບິນທັງໝົດຂອງເຮືອບິນ ຖືເປັນພາລະກິດສຳຄັນໃນການສືບຫາສາເຫດຂອງອຸປະຕິເຫດທີ່ກ່ຽວຂ້ອງກັບເຮືອບິນ, ແຕ່ໃນກໍລະນີນີ້ ຍັງບໍ່ແນ່ນອນວ່າຖ້າກັບດຳເກີດຄວາມເສຍຫາຍຈະມີຜົນຕໍ່ການກູ້ຄືນຂໍ້ມູນທີ່ມີການບັນທຶກໄວ້ ຫລື ບໍ່.
ອ້າງອີງ:
https://english.news.cn/…/9d9e0af2de2c485f81fc1d…/c.html
ttps://www.xinhuathai.com/high/271837_20220323
https://www.bloomberg.com/…/terrain-rain-hampering…
