ບັນຫານ້ຳມັນແພງກັບທາງອອກໃນອະນາຄົດ

ໂດຍ: ທິດກໍ່າ

ອີງຕາມແຫລ່ງຂ່າວເສດຖະກິດການຄ້າເມື່ອບໍ່ດົນມານີ້ ຄືໃນວັນທີ 18 ມີນາ 2022, ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຄຳແພງ ໄຊສົມແພງ ໄດ້ໄປຢ້ຽມຢາມໂຮງງານປຸງແຕ່ງນ້ຳມັນເຊື້ອໄຟ ທີ່ຂຶ້ນກັບແຂວງຊຽງຂວາງ ສປປ ລາວ ຂອງພວກເຮົາ. ແຫລ່ງຂ່າວຍັງບອກວ່າ: ໂຮງງານແຫ່ງດັ່ງກ່າວໄດ້ເລີ່ມກໍ່ສ້າງມາແຕ່ເດືອນກັນຍາ 2021 ມາຮອດປັດຈຸບັນແມ່ນໄດ້ສຳເລັດ 100% ດ້ວຍມູນຄ່າການກໍ່ສ້າງທັງໝົດ 30 ຕື້ກວ່າກີບ ແລະ ຈະເປີດນຳໃຊ້ບໍລິການໃນມໍ່ໆນີ້.

ສະມັດຖະພາບຂອງໂຮງງານແມ່ນສາມາດປຸງແຕ່ງນ້ຳມັນ 100 ລ້ານລິດຕໍ່ປີ ໂດຍມີສ່ວນປະສົມນ້ຳມັນກາຊວນສຳເລັດຮູບ 60%, ນ້ຳມັນເຄິ່ງສຳເລັດຮູບດີໄລ້ອອຍ (Dei Light Oil) 39% ແລະ ເຄມີປຸງແຕ່ງ 1% ຈາກ ສສ ຫວຽດນາມ ແລະ ປະເທດໄທມາຜະລິດປຸງແຕ່ງເປັນນ້ຳມັນກາຊວນ ແລະ ນຳເຂົ້ານ້ຳມັນແອັດຊັງ ເພື່ອຈຳໜ່າຍຢູ່ພາຍໃນປະເທດ ໂດຍສະໜອງໃຫ້ລັດວິສາຫະກິດນ້ຳມັນເຊື້ອໄຟລາວເປັນຕົວຫລັກ.

ເມື່ອເຫັນແຫລ່ງຂ່າວນີ້ແລ້ວກໍເປີດທີ່ໜ້າຊົມຊື່ນຍິນດີ, ການປາກົດຕົວ ຫລືວ່າ ການກຳເນີດເກີດຂຶ້ນຂອງທຸລະກິດດ້ານນີ້ຢູ່ປະເທດຂອງພວກເຮົາຖືວ່າເປັນເຫດການ ກໍຄືປາກົດການໃໝ່ໆທີ່ໄດ້ເກີດຂຶ້ນໃນທ່າມກາງວິກິດນ້ຳມັນແພງ ແລະ ພວມເປັນບັນຫາໃຫຍ່ໃນທົ່ວໂລກ.

ດ້ວຍສາເຫດດັ່ງກ່າວ ຖ້າໂຮງງານປຸງແຕ່ງນ້ຳມັນຍອດງື່ມຈຳກັດ ຫາກເລັ່ງການຜະລິດໃນໄວໆນີ້ ຈະເປັນການຊ່ວຍຊາດບ້ານເມືອງທີ່ພວມປະສົບບັນຫາລາຄານ້ຳມັນແພງໄດ້ຫລາຍພໍສົມຄວນ. ນອກຈາກນັ້ນ ກໍເປັນການດັດສົມລາຄານ້ຳມັນຢູ່ບ້ານເຮົາໃຫ້ຄົງທີ່ ແລະ ອາດເຮັດໃຫ້ລາຄານ້ຳມັນຫລຸດລົງກວ່ານີ້ກໍຍິ່ງດີເລີດປະເສີດສີ.

ເມື່ອເວົ້າເຖິງສະພາບການເໜັງຕີງລາຄານ້ຳມັນໃນຍຸກພັດທະນາສ້າງສາບ້ານເມືອງຄືທຸກວັນນີ້, ທິດກໍ່າຫວນຄິດເຫັນຕອນສະໄໝສົງຄາມມີນ້ຳມັນບໍ່ອຶດບໍ່ຢາກ, ຫລັ່ງມາເທມາ, ມີບາງເຂດຕໍ່ທໍ່ມາແຕ່ຊາຍແດນຫວຽດນາມ, ຕ້ອງການມາຍາມໃດເອົາລົດໄປໂຕ່ງເອົາເຕັມຕາມໃຈມັກ, ຂະໜາດວ່າໄປຂໍກັນດ້າມສິບລິດຊາວລິດແມ່ນໄດ້ສະບາຍ. ໃນບາງຄັ້ງຈຳເປັນມາພາກັນເອົານ້ຳມັນໄປຫາແລກເປັດແລກໄກ່. ບາດຕົກມາໃນຍຸກນີ້ ອີ່ຫຍັງມັນກໍເປັນລາຄາໄດ້ຊື້ໄດ້ຂາຍເປັນເງິນເປັນຄຳດ້ວຍກັນທັງນັ້ນ.

ຕາມເຮົາວ່າ, ໜຶ່ງໃນທາງອອກ ປັດຈຸບັນເຮົາກໍມີທາງລົດໄຟໄປຮອດຈີນເຊື່ອມໂຍງໄປຮອດຣັດເຊຍແລ້ວ, ຄວນຫັນທິດໄປຊື້ນ້ຳມັນມາແຕ່ຣັດເຊຍແກ່ມາຜ່ານຈີນອາດຈະດີ, ຈະໄວ ແລະ ມີລາຄາຖືກກວ່າ ເຮັດຄືຕອນສະໄໝສົງຄາມບໍ່ໃຫ້ເອົາມາທາງປະເທດໄທ ເອີ້ນວ່າລົມປ່ຽນທິດນ້ຳປ່ຽນແລວໄຫລເຂົ້າມາລາວເບື້ອງຕາເວັນອອກອາດຈະເປັນການດີ.

ເຖິງຢ່າງໃດກໍດີ, ໃນກອງປະຊຸມລັດຖະບານສະໄໝສາມັນປະຈຳເດືອນມີນາ ເຊິ່ງໄດ້ໄຂຂຶ້ນໃນຕອນເຊົ້າຂອງວັນທີ 21 ມີນາ 2022 ກໍໄດ້ມີການຄົ້ນຄວ້າຫາວິທີທາງອອກ ດ້ວຍການເລັ່ງຟື້ນຟູເສດຖະກິດຂອງປະເທດໃຫ້ຄືນສູ່ສະພາບປົກກະຕິໂດຍໄວ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ໂດຍສະເພາະພາກັນຜ່ານພົ້ນການລະບາດຂອງພະຍາດໂຄວິດ-19 ໄປຄຽງຄູ່ກັບການຈັດຕັ້ງປະຕິບັດສອງວາລະແຫ່ງຊາດ ເຊິ່ງໜຶ່ງໃນພາລະກິດດັ່ງກ່າວແມ່ນຫາວິທີທາງອອກໃນເລື່ອງຄ່ານ້ຳມັນແພງຢູ່ພາຍໃນປະເທດ.

ມາຮອດວັນທີ 23 ມີນາ 2022 ໄດ້ມີິການປັບລົງລາຄານໍ້າມັນທຸກປະເພດ ຄື ກາຊວນ ປັບລົງ 610 ກີບ/ລິດ, ແອັຊັງທຳມະດາ ປັບລົງ 540 ກີບ/ລິດ ແລະ ແອັດຊັງພິເສດ ປັບລົງ 651 ກີບ/ລິດ ນັບວ່າເປັນສັນຍານທີ່ດີ ເຊິ່ງບັນຫານີ້ຕ້ອງຕິດຕາມກັນຕໍ່ໄປ.