ຕົວເລກຜູ້ຕິດເຊື້ອຕົວຈິງ ມີສູງກວ່າລາຍງານ ຍ້ອນຫລາຍຄົນກວດ ແລະ ປິ່ນປົວດ້ວຍຕົນເອງ

ວັນທີ 23 ມີນາ 2022 ນີ້ ທ່ານ ດຣ ສີສະຫວາດ ສຸດທານີລະໄຊ ຮອງຫົວໜ້າກົມພະຍາດຕິດຕໍ່ ໄດ້ຖະແຫລງຂ່າວວ່າ: ໂຕເລກລາຍງານໃນແຕ່ລະວັນເປັນພຽງສ່ວນໜື່ງຂອງຜູ້ຕິດເຊື້ອທັງໝົດ ທີ່ມາກວດຢູ່ຕາມສະຖານທີ່ບໍລິການສາທາລະນະສຸກ ແຕ່ຍັງມີຫລາຍຄົນໄດ້ຊື້ເຄື່ອງກວດແບບໄວມາກວດດ້ວຍຕົນເອງ ແລະ ປີ່ນປົວຢູ່ເຮືອນ

ສຳລັບຜູ້ທີ່ມີເງື່ອນໄຂໃນການຕິດຕາມປີ່ນປົວຕົນເອງຢູ່ເຮືອນຄື:
– ຕ້ອງມີຫ້ອງແຍກປ່ຽວສະເພາະແຍກຈາກຄົນອື່ນ
– ຕ້ອງມີສະມາຊິກໃນຄອບຄົວ ຫລື ຄົນເບີ່ງແຍງດູແລ ແລະ ສົ່ງອາຫານການກິນໃຫ້
– ຕ້ອງເປັນຜູ້ທີ່ມີີອາການເບົາບາງ ຫລື ບໍ່ມີອາການ, ບໍ່ຫາຍໃຈຝືດ, ບໍ່ໄດ້ຢູ່ໃນກຸ່ມສ່ຽງ
– ອາຍຸບໍ່ເກີນ 60 ປີ, ບໍ່ມີພະຍາດປະຈຳໂຕ ເຊັ່ນ: ພະຍາດຫົວໃຈ, ພະຍາດປອດຊຳເຮື້ອ, ວັນນະໂລກ, ພະຍາດໄຂ່ຫລັງຊຳເຮື້ອ, ຄວາມດັນເລືອດສູງ, ເບົາຫວານ, ເລືອດຈາງ, ພະຍາດເສັ້ນເລືອດໃນສະໝອງຕີບ ຫລື ແຕກ, ມະເຮັງ ແລະ ບໍ່ໄດ້ຖືພາ,
– ອຸປະກອນຕິດຕາມຕົນເອງ ແລະ ສາມາດປະເມີນອາການຕົນເອງໄດ້ວ່າຢູ່ໃນຂັ້ນໜັກ ຫລື ເບົາບາງ

ຜູ້ທີ່ປີ່ນປົວຕົນເອງຢູ່ເຮືອນ ຕ້ອງປີ່ນປົວໃຫ້ຄົບກຳນົດ 10 ວັນ ສຳລັບຜູ້ບໍ່ມີອາການ, ຖ້າຜູ້ມີອາການແມ່ນໃຫ້ປີ່ນປົວຄົບ 13 ວັນຈົນກ່ວາບໍ່ມີອາການຈີ່ງສາມາດດຳລົງຊີວິດປົກກະຕິໄດ້.