ລາວ-ຈີນສຳເລັດການບໍລິການທາງການແພດຂະບວນລົດໄຟສັນຕິພາບ 2017
ວັນທີ 6 ສິງຫານີ້, ທີ່ນະຄອນຫຼວງວຽງຈັນໄດ້ມີພິທີປິດບໍລິການທາງ ການແພດຂະບວນລົດໄຟສັນຕິພາບ 2017 ລາວ-ຈີນ, ໂດຍການເຂົ້າຮ່ວມ ທ່ານພົນຈັດຕະວາ ຄຳເພັດ ສີຊານົນ ຮອງກົມໃຫຍ່ພາລາທິການກອງທັບ ປະຊາຊົນລາວ, ທ່ານ ພົນຕີ ຫລີວຕ້ຽນຫລົງ ຮອງກົມເສນາຮັກກົມຮັບປະກັນພະລາທິການ, ຄະນະກຳມະການທະຫານສູນກາງ, ພ້ອມດ້ວຍແພດຝ່າຍລາວ ແລະ ຈີນເຂົ້າຮ່ວມຢ່າງຫລວງຫລາຍ.
ຜ່ານການປະຕິບັດໜ້າທີ່ຂອງຄະນະທີມງານຝ່າຍຈີນໃນຄັ້ງນີ້ເຫັນວ່າໄດ້ ຮັບຜົນສໍາເລັດຢ່າງຈົບງາມ ແລະ ມີປະສິດທິພາບສູງ, ເຊິ່ງສ້າງຄວາມພໍໃຈ ແລະ ປະທັບໃຈໃຫ້ແກ່ຝ່າຍລາວ, ການເຄື່ອນໄຫວກິດຈະກຳຮ່ວມກັນນອກ ຈາກຈະໄດ້ຮຽນຮູ້ດ້ານວິຊາສະເພາະ ແລະ ດ້ານວິຊາການນໍາກັນແລ້ວຍັງເປັນການເພີ່ມທະວີຮັດແໜ້ນຄວາມສາມັກຄີຖານສະຫາຍອ້າຍນ້ອງຮ່ວມອຸດົມການດຽວກັນ ແລະ ໄດ້ເຮັດໃຫ້ສອງຝ່າຍເຂົ້າອົກເຂົ້າໃຈສະໜິດສະໜົມກັນຂຶ້ນກວ່າເກົ່າ, ເຊິ່ງຕະຫລອດໄລຍະເວລາດັ່ງກ່າວ, ສອງຝ່າຍໄດ້ສ້າງກິດຈະກຳຫລາຍຢ່າງເປັນຕົ້ນ: ການແຂ່ງຂັນກິລາ, ຈັດງານລ້ຽງສ້າງສັນ ແລະ ສະເຫຼີມສະຫຼອງວັນສ້າງຕັ້ງກອງທັບປົດປ່ອຍປະຊາຊົນຈີນຄົບຮອບ 90 ປີ, ເຮັດໃຫ້ການນຳກະຊວງປ້ອງກັນປະເທດທັງສອງມີຄວາມເພິ່ງພໍໃຈຕໍ່ການປະຕິບັດໜ້າທີ່ກວດໄດ້ຢ່າງກວ້າງຂວາງ, ໂດຍສະເພາະແມ່ນໄດ້ກວດສຸຂະພາບປະຈໍາຢູ່ໂຮງໝໍ 103 ແລະ ລົງໄປກວດສຸຂະພາບໃຫ້ນັກຮົບຢູ່ບັນດາກົມກອງຕ່າງໆຂອງລາວເຊັ່ນ: ຈ11, ຈ497 ແລະ ຈ279. ນອກນີ້ຄະນະຝ່າຍຈີນຍັງລົງໄປສັງເກດ ການໃນການຜ່າຕັດຕົວຈິງຢູ່ໂຮງໝໍ 103, ພ້ອມຍັງໃຫ້ການແນະນຳແພດໝໍຝ່າຍລາວ ເພື່ອຍົກລະດັບດ້ານຄວາມຮູ້ທາງດ້ານການແພດຂອງລາວດີຂຶ້ນ.
ໂດຍລວມແລ້ວ, ການຈັດກິດຈະກໍາບໍລິການທາງການແພດຂະບວນລົດໄຟສັນຕິພາບ 2017 ແມ່ນໄດ້ຮັບຜົນສຳເລັດຢ່າງຈົບງາມເກີນຂາດໝາຍທີ່ວາງໄວ້. ອັນໄດ້ກາຍເປັນແບບຢ່າງທີ່ດີງາມໃນການພົວພັນຮ່ວມມືລະຫວ່າງສອງກອງທັບລາວ-ຈີນ ແລະ ຫວັງວ່າໃນຕໍ່ໜ້ານີ້ຈະໄດ້ຮັບການຮ່ວມມືຊ່ວຍເຫຼືອກັນຫລາຍຂຶ້ນ, ໂດຍສະເພາະໂຄງການກໍ່ສ້າງຕຶກປິ່ນປົວຢູ່ໂຮງໝໍ 103 ທີ່ຈະ ສຳເລັດໃນທ້າຍເດືອນກັນຍານີ້.
