ເຢຍລະມັນມີລາຍງານຜູ້ຕິດເຊື້ອໂຄວິດເພີ່ມຂຶ້ນ ຫລັງຍົກເລີກຂໍ້ຈຳກັດຄວບຄຸມການລະບາດ

ເຢຍລະມັນພົບຜູ້ຕິດເຊື້ອໂຄວິດ-19 ເພີ່ມຂຶ້ນ ຫລັງຍົກເລີກຂໍ້ຈຳກັດຄວບຄຸມການລະບາດ, ຂະນະໄວຣັສໂອມິຄຣອນ ສາຍພັນຍ່ອຍບີເອ.2 (BA.2) ກາຍເປັນສາຍພັນຫລັກໃນປະເທດ.

ວັນທີ 22 ມີນາ 2022, ເວັບໄຊຊິນຮົວລາຍງານການເປີດເຜີຍຈາກສະຖາບັນໂຣແບດຄ໊ອກ (RKI) ດ້ານພະຍາດຕິດເຊື້ອຂອງເຢຍລະມັນ ລະບຸວ່າ: ອັດຕາການເກີດຂຶ້ນຂອງພະຍາດໂຄວິດ-19 ໃນຮອບ 7 ວັນ ສູງເຖິງ 1.174 ຄົນ ຕໍ່ປະຊາຊົນ 1 ແສນຄົນ ໃນວັນທີ 21 ມີນາ ຫລັງຍົກເລີກຂໍ້ຈຳກັດຄວບຄຸມພະຍາດໂຄວິດ-19 ສ່ວນຫລາຍໄດ້ພຽງວັນດຽວ.

ລາຍງານລະບຸວ່າ: ຈຳນວນຜູ້ຕິດເຊື້ອໂຄວິດ-19 ປະຈຳວັນຂອງເຢຍລະມັນຫລຸດລົງເລັກໜ້ອຍມີ 92.314 ຄົນ ເມື່ອທຽບໃສ່ອາທິດກ່ອນ ໂດຍເຢຍລະມັນຍົກເລີກຂໍ້ຈຳກັດຄວບຄຸມພະຍາດໂຄວິດ-19 ທັງໝົດ ຍົກເວັ້ນຄຳສັ່ງໃສ່ຜ້າປິດປາກ-ດັງໃນລະບົບຂົນສົ່ງສາທາລະນະ ແລະ ພາຍໃນເຮືອນພັກຜູ້ສູງອາຍຸ.

ເຖິງຢ່າງໃດກໍດີ, ສະຫະພັນຖະລັດຂອງເຢຍລະມັນສາມາດບັງຄັບໃຊ້ຂໍ້ຈຳກັດທີ່ເຂັ້ມງວດຍິ່ງຂຶ້ນໃນພື້ນທີ່ທີ່ເກີດການລະບາດໜັກ ຫລື ກັບມາບັງຄັບໃຊ້ກົດລະບຽບຮັກສາໄລຍະຫ່າງທາງສັງຄົມ, ສະແດງຫລັກຖານການສັກວັກຊີນ ຫລື ຫາຍດີຈາກພະຍາດໂຄວິດ-19 ພາຍໃຕ້ກົດໝາຍປ້ອງກັນພະຍາດຕິດເຊື້ອ (Infection Protection Act) ສະບັບແກ້ໄຂຫລ້າສຸດ.

ສ່ວນສະມາຄົມສະຫະວິທະຍາການເພື່ອການເບິ່ງແຍງຜູ້ປ່ວຍວິກິດ ແລະ ເວດສະສາດສຸກເສີນເຢຍລະມັນ (DIVI) ເຜີຍວ່າຈຳນວນຜູ້ຕິດເຊື້ອໂຄວິດ-19 ທີ່ເຂົ້າປິ່ນປົວໃນພະແນກຜູ້ປ່ວຍໜັກເພີ່ມຂຶ້ນ 75 ຄົນ ເປັນ 2.347 ຄົນ ໃນວັນທີ 21 ມີນາ ເຊິ່ງຍັງຕໍ່າກວ່າຕົວເລກສູງສຸດທີ່ບັນທຶກໄວ້ລະຫວ່າງການລະບາດໜັກຂອງເຊື້ອໄວຣັສ ສາຍພັນເດວຕາ.

ທັງນີ້, RKI ຊີ້ວ່າ: ເຊື້ອໄວຣັສ ສາຍພັນໂອມິຄຣອນ ສາຍພັນຍ່ອຍບີເອ.2 (BA.2) ເຊິ່ງແພ່ລະບາດໄດ້ງ່າຍຂຶ້ນ ກາຍເປັນສາຍພັນຫລັກໃນເຢຍລະມັນເມື່ອອາທິດກ່ອນ ໂດຍກວມອັດຕາເກືອບ 2 ໃນ 3 ຂອງການຕິດເຊື້ອທັງໝົດ.

ອ້າງອີງ:

https://www.xinhuathai.com/high/271602_20220322