ເອຟເອ ຫາລື ລັດຖະບານອັງກິດ ເພື່ອຫາວິທີຂາຍປີ້ ເອຟເອ ຄັບ ຮອບ 4 ທີມໃຫ້ແຟນເຊລຊີ
ສະມາຄົມບານເຕະອັງກິດ ຫລື FA ພວມຫາລືກັບລັດຖະບານອັງກິດເພື່ອຫາວິທີຂາຍປີ້ ເອຟເອ ຄັບ ຮອບ 4 ທີມສຸດທ້າຍໃຫ້ແຟນບານເຊລຊີ ໂດຍບໍ່ລະເມີດມາດຕະການຂວ້ຳບາດ ອັຟບຣາໂມວິດ.
ສະມາຄົມບານເຕະອັງກິດ ພວມຢູ່ລະຫວ່າງການາລືກັບລັດຖະບານອັງກດ ເພື່ອຫາລືຜ່ອນຜັນໃຫ້ແຟນບານເຊລຊີສາມາດຊື້ປີ້ເຂົ້າຊົມເກມເອຟເອ ຄັບ ຮອບຮອງຊະນະເລີດ ຫລື ຮອບ 4 ທີມສຸດທ້າຍ ນັດທີ່ເຊລຊີ ຈະລົງແຂ່ງກັບ ຄຣິສຕັລ ພາເລດ ທີມຮ່ວມນະຄອນຫລວງລອນດອນ ທີ່ສະຫນາມເວມບຣີໃນເດືອນເມສານີ້ໄດ້ໂດຍສະດວກ.
ກ່ອນຫນ້ານີ້ ເຊລຊີ ຕ້ອງລົງຫລິ້ນກັບ ມິດເດິລສະໂບ ໃນບານເຕະເອຟເອ ຄັບ ຮອບກ່ອນຮອງຊະນະເລີດ ທີ່ສະຫນາມຣີເວີໄຊ ໂດຍມີແຟນບານຕາມໄປເຊຍພຽງຫນ້ອຍດຽວ ເນື່ອງຈາກບໍ່ສາມາດຂາຍບັດເຂົ້າຊົມການແຂ່ງຂັນໃຫ້ກອງເຊຍສະໂມສອນໄດ້ຍົກເວັ້ນພຽງປີ້ທີ່ຖືກຂາຍອອກໄປກ່ອນຫນ້າທີ່ຫລັງລັດຖະບານອັງກິດຈະມີຄຳສັ່ງຂວຳ້ບາດ ໂຣມັນ ອັຟບຣາໂມວິດ ເຈົ້າຂອງທີມຊາວຣັສເຊຍ ເທົ່ານັ້ນ.
ດ້ວຍເຫດນີ້ ເອຟເອ ຈຶ່ງຕ້ອງຍື່ນມືເຂົ້າມາຊ່ວຍແກ້ບັນຫາດ້ວຍການເຈລະຈາກັບຕົວແທນຈາກລັດຖະບານເພື່ອຫາວິທີຂາຍບັດເຂົ້າຊົມການແຂ່ງຂັນໃຫ້ກັບແຟນບານເຊລຊີ ໂດຍບໍ່ລະເມີດຄຳສັ່ງຂວ້ຳບາດ ອັຟບຣາໂມວິດ ເພື່ອຫລີກເວັ້ນບໍ່ໃຫ້ການແຂ່ງຂັນລະຫວ່າງ ເຊລຊີ ກັບ ພາເລດ ເຫລືອແຟນບານເຂົ້າໄປຊົມພຽງເຄິ່ງຫນຶ່ງຂອງຄວາມບັນຈຸສະຫນາມເວມບຣີ.