ຜູ້ນຳຈີນສັ່ງລະດົມກຳລັງ ຄົ້ນຫາ-ສອບສວນສາເຫດ ເຮືອບິນຕົກທາງຕອນໃຕ້ຂອງປະເທດ

ປະທານປະເທດ ສີຈິ້ນຜິງ ເນັ້ນໃຫ້ທຸກຝ່າຍທີ່ກ່ຽວຂ້ອງ “ເຮັດວຽກຢ່າງເຕັມທີ່ ແລະ ຈິງຈັງທີ່ສຸດ” ຫລັງເກີດເຫດເຮືອບິນໂດຍສານຂອງ China Easthern Airlines ພ້ອມ 132 ຊີວິດ ຕົກທາງຕອນໃຕ້ຂອງປະເທດ.

ວັນທີ 21 ມີນາ 2022, ສຳນັກຂ່າວຕ່າງປະເທດລາຍງານວ່າ: ສະຖານີວິທະຍຸໂທລະພາບກາງແຫ່ງປະເທດຈີນ (CCTV) ລາຍງານວ່າ: ປະທານປະເທດ ສີຈິ້ນຜິງ ສັ່ງ ແລະ ເນັ້ນໃຫ້ໜ່ວຍງານທຸກແຫ່ງທີ່ກ່ຽວຂ້ອງ ລະດົມກຳລັງພົນທັງໝົດທີ່ມີຢູ່ລົງພື້ນທີ່ທີ່ເປັນຈຸດຕົກຂອງເຮືອບິນໂດຍສານ ສາຍການບິນ China Easthern Airlines ແລະ ຂໍໃຫ້ດຳເນີນການສອບສວນຫາສາເຫດຂອງເຫດການຄັ້ງນີ້ ດ້ວຍຄວາມໂປ່ງໃສ ແລະ ວ່ອງໄວທີ່ສຸດ.

ຂະນະທີ່ສຳນັກງານການບິນພົນລະເຮືອນຈີນ (CAAC) ອອກຖະແຫລງການ ຢືນຢັນວ່າ: ຖ້ຽວບິນໂດຍສານ MU5735 ຂອງສາຍການເບິນ China Easthern Airlines ໃຊ້ເຮືອບິນໂບອິ້ງ 737-800 ຕົກກາງຮ່ອມພູ ຂອງເຂດປົກຄອງຕົນເອງກວ່າງຊີ້ຈ້ວງ ທາງຕອນໃຕ້ຂອງປະເທດ ໃນຕອນບ່າຍຂອງວັນທີ 21 ມີນາ ຕາມເວລາທ້ອງຖິ່ນ.

ທັງນີ້, ເຮືອບິນລຳດັ່ງກ່າວ ເຊິ່ງຜ່ານການນຳໃຊ້ມາພຽງ 6 ປີເທົ່ານັ້ນ ຢູ່ລະຫວ່າງເດີນທາງຈາກເມືອງຄຸນໝິງ ມົນທົນຢູນໜານ ທີ່ຢູ່ທາງຕາເວັນອອກສຽງໃຕ້ ມຸ້ງໜ້າສູ່ເມືອງກວ່າງໂຈວ ມົນທົນກວາງຕຸ້ງ ເຊິ່ງຢູ່ທາງຕອນໃຕ້ຂອງຈີນ ພ້ອມຜູ້ຢູ່ໃນເຮືອບິນ 132 ຄົນ ແບ່ງເປັນຜູ້ໂດຍສານ 123 ຄົນ ແລະ ຈຸບິນ 9 ຄົນ.