ຊົມເຊີຍວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 67 ປີຢ່າງສຸດໃຈ ( ວັນທີ 22 ມີນາ 1955-22 ມີນາ 2022)

ທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດພວມ ອອກແຮງແຂ່ງຂັນກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ເຂົ້າສູ່ລວງເລິກຂອງທຸກວຽກງານ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII ເຂົ້າສູ່ວຽກງານຕົວຈິງໃຫ້ສຳເລັດ. ມື້ນີ້, ວັນທີ 22 ມີນາເປັນວັນຄົບຮອບ 67 ປີ(22 ມີນາ 1955-22 ມີນາ 2022) ການສ້າງຕັ້ງພັກປະຊາຊົນລາວ ໃນເມື່ອກ່ອນ ກໍຄືພັກປະຊາຊົນປະຕິວັດລາວ ໃນປັດຈຸບັນ ເປັນວັນທີ່ມີຄວາມໝາຍສຳຄັນຍິ່ງ ເປັນວັນແຫ່ງຄວາມເອກອ້າງ ວັນແຫ່ງຄວາມພາກພູມໃຈສຳລັບປະເທດ ແລະ ປະຊາຊົນລາວພວກເຮົາ ທີ່ພວມສ້າງສາພັດທະນາຈະເລີນກ້າວໜ້າຂຶ້ນທຸກດ້ານພ້ອມກັນມຸ່ງສູ່ຈຸດໝາຍສັງຄົມນິຍົມ.

ຫວນຄືນເມື່ອປະເທດເຮົາຢູ່ໃນການຄອບຄອງຂອງຈັກພະພັດລ່າເມືອງແບບເກົ່າ, ການຕໍ່ສູ້ເພື່ອປົດປ່ອຍຂອງປະຊາຊົນລາວບັນດາເຜົ່າ ເຖິງວ່າເກີດຂຶ້ນຢູ່ຫລາຍແຫ່ງ, ແຕ່ສຸດທ້າຍກໍບໍ່ສຳເລັດຍ້ອນຂາດການນຳ ພາ. ການສ້າງຕັ້ງພັກ ປະຊາຊົນ ປະຕິວັດລາວ ໂດຍປະທານ ໄກສອນ ພົມວິຫານ ເປັນເລຂາທິການໃຫຍ່ນັ້ນ ໄດ້ເຮັດໃຫ້ຂະບວນການປະຕິວັດ ການຕໍ່ສູ້ກູ້ຊາດ ນັບມື້ເຕີບໃຫຍ່ຂະຫຍາຍຕົວ ແລະ ໄດ້ຮັບໄຊຊະນະຕໍ່ເນື່ອງລຽນຕິດ. ເຖິງວ່າໄດ້ຜະເຊີນກັບຈັກກະພັດລ່າເມືອງຂຶ້ນແບບໃໝ່ທີ່ຮ້າຍກາດກວ່າເກົ່າ, ແຕ່ພັກເຮົາກໍໄດ້ແບກຫາບເອົາພາລະກຳອັນໜັກໜ່ວງ ເພື່ອຊີ້ນຳນຳພາປວງຊົນລາວທັງຊາດຕໍ່ສູ້ຕ້ານການຮຸກຮານຂອງຈັກກະພັດ ແລະ ລູກແຫລ້ງຕີນມືປະຕິການຢ່າງດຸເດືອດຂ້ຽວຂາດ ກ້າວໄປສູ່ການປົດປ່ອຍ ປະເທດຊາດຢ່າງສົມບູນ ແລະ ພັດທະນາຢ່າງມີໝາກຜົນເປັນແຕ່ລະໄລຍະ.

ເວົ້າສະເພາະພາຍຫລັງການສະຖາປະນາ ສາທາລະນະ ປະຊາທິປະໄຕ ປະຊາຊົນລາວ ແລະ ປະຕິບັດສອງໜ້າທີ່ຍຸດທະສາດປົກປັກຮັກສາ ແລະ ພັດທະນາປະເທດຊາດ ມາເຖິທຸກວັນນີ້, ຜົນສຳເລັດສຳຄັນ ແລະ ເປັນພື້ນຖານກວ່າໝູ່ໝົດແມ່ນຄວາມເປັນເອກະລາດ, ອຳນາດປະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດໄດ້ຮັບການປົກປັກຮັກສາໄດ້ຢ່າງໝັ້ນຄົງ, ລະບອບປະຊາທິປະໄຕປະຊາຊົນ ມີສະຖຽນລະພາບໜັກແໜ້ນ, ສັງ ຄົມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດແຫ່ງຊາດຂະຫຍາຍຕົວດ້ວຍ ຈັງຫວະໄວ, ຕໍ່ເນື່ອງ ແລະ ຖືກທິດ ໂດຍລວມຍອດຜະລິດຕະພັນພາຍໃນເພີ່ມຂຶ້ນ, ລາຍໄດ້ສະເລ່ຍຕໍໍ່ຫົວຄົນຂອງປະຊາຊົນເຮົານັບມື້ເພີ່ມຫລາຍຂຶ້ນ. ສິ່ງພົ້ນເດັ່ນທີ່ເຫັນໃນໄລຍະມໍ່ໆນີ້ ປວງຊົນລາວທັງຊາດໄດ້ຮ່ວມແຮງຮ່ວມໃຈກັນປະຕິບັດມາດຕະການປ້ອງກັນການແພ່ລະບາດຂອງເຊື້ອພະຍາດໂຄວິດ-19. ຍ້ອນມີການນຳພາອັນສະຫລາດສ່ອງໃສຂອງພັກປະຊາຊົນ ປະຕິວັດລາວ, ປະເທດ ສາທາລະນະລັດ ປະຊາທິປະໄຕ ປະຊາຊົນລາວພວກເຮົາ ຈຶ່ງສີວິໄລກ້າວໜ້າດັ່ງທຸກວັນນີ້ ແລະ ຍັງຈະສືບຕໍ່ກ້າວໄປຂ້າງໜ້າດ້ວຍທ່ວງທ່າໜັກແໜ້ນເຂັ້ມແຂງ ເພື່ອເຮັດສຳເລັດພາລະກິດປົກປັກຮັກສາ ແລະ ພັດທະນາປະເທດຊາດຕາມ ທິດກ້າວຂຶ້ນສັງຄົມນິຍົມ.

ທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວທັງຊາດ ຂ່ຳນັບຊົມເຊີຍວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 67 ປີ ຢ່າງສຸດໃຈ! ໃນໂອກາດອັນສະຫງ່າລາສີນີ້, ພວກເຮົາພະນັກງານ-ສະມາ ຊິກພັກຈົ່ງພ້ອມກັນຍົກສູງບົດບາດ, ຄວາມສາມາດນຳພາຂອງພັກໃນທຸກຂົງເຂດວຽກງານໃຫ້ນັບມື້ສູງເດັ່ນ ໄປພ້ອມກັບການເປັນແບບຢ່າງນຳໜ້າ, ເດັດດ່ຽວແກ້ໄຂປາກົດການຫຍໍ້ທໍ້ຕ່າງໆຢ່າງທັນການ; ຮັບປະກັນໃຫ້ພັກເຮົາປອດໃສ, ເຂັ້ມແຂງ ແລະ ໜັກແໜ້ນສະເໝີ.
ນໍ້າໃຈວັນທີ 22 ມີນາ ໝັ້ນຍືນ!