ທີມດັງພຣີເມຍລີກ ກຽມຊື້ ເນມາ ເປັນສະຖິຕິໂລກ 200 ລ້ານປອນ
ເດລີ ເມລ ສື່ຊື່ດັງຂອງອັງກິດ ລາຍງານຂ່າວວ່າ : ‘‘ ນິວຄາສເຊິລ ຢູໄນເຕັດ ສະໂມສອນດັງແຫ່ງພຣີເມຍລີກ ອັງກິດ ພ້ອມຍື່ນຂໍ້ສະເຫນີ 200 ລ້ານປອນ ເພື່ອຊື້ ເນມາ ກອງຫນ້າທີມຊາດບຣາຊິລ ຂອງສະໂມສອນ ປາຣີສ ແຊັງ ແຊັກແມັງ ມາສູ່ຖິ່ນ ເຊນ ເຈມ ພາກ ໃນໄລຍະລະດູການນີ້ ’’.
ສຳລັບ ເນມາ ຫາກໍຈະຕໍ່ສັນຍາສະບັບໃຫມ່ກັບ ເປແອສເຊ ໄປອີກ 4 ປີ ເມື່ອເດືອນພຶດສະພາປີກາຍ ແນວໃດກໍຕາມ ຈາກການທີ່ ເນມາ ຫາກໍຍິງໄປພຽງ 5 ປະຕູ ກັບອີກ 5 ແອສຊິສ ຈາກການລົງຫລິ້ນ 20 ນັດ ລວມທຸກລາຍການໃນລະດູການນີ້ ເຮັດໃຫ້ມີກະແສຂ່າວວ່າ ເປແອສເຊ ພ້ອມທີ່ຈະພິຈາລະນາປ່ອຍລາວອອກຈາກທີມ ໂດຍມີ ແມນເຊສເຕີ ຊິຕີ ແລະ ບາເຊໂລນາ ທີ່ໃຫ້ຄວາມສົນໃຈ ຂະນະທີ່ ເນມາ ກໍເລີ່ມເບິ່ງເຖິງການຍ້າຍທີມ ຫລັງຕົກເປັນເປົ້າຖືກແຟນບານທີມຕົນເອງໂຫ່ໃສ່.
ແນວໃດກໍຕາມ ລາຍງານຫລ້າສຸດຈາກສື່ດັ່ງກ່າວລະບຸວ່າ : ນິວຄາສເຊິລ ຢູໄນເຕັດ ຄືທີມຫລ້າສຸດທີ່ສະແດງຄວາມສົນໃຈໃນຕົວ ເນມາ ແລະ ພ້ອມຍື່ນຂໍ້ສະເຫນີເປັນສະຖິຕິໂລກໃຫມ່ຈຳນວນ 200 ລ້ານປອນ ເພື່ອດຶງນັກເຕະອາຍຸ 30 ປີ ມາເສີມທີມ ເຊິ່ງກໍຖືວ່າມີຄວາມເປັນໄປໄດ້ຫລາຍ ເພາະປັດຈຸບັນນິວຄາສເຊິລກາຍເປັນທີມເສດຖີ ແລະ ສາມາດທີ່ຈະຈ່າຍໄດ້ທັງຄ່າຕົວ ແລະ ຄ່າເມື່ອຍຈຳນວນຫລາຍ 500,000 ປອນ/ອາທິດ ຢ່າງບໍ່ມີບັນຫາ.
ສຳລັບ ເນມາ ຍັງຄົງເປັນນັກເຕະທີ່ມີຄ່າຕົວໃນການຍ້າຍທີມແພງທີ່ສຸດໃນໂລກ ຫລັງຍ້າຍຈາກ ບາເຊໂລນາ ມາຢູ່ກັບ ປາຣີສ ແຊັງ ແຊັກແມັງ ເມື່ອລະດູການ 2017 ດ້ວຍຄ່າຕົວ 198 ລ້ານປອນ.
