ຈີນຢືນຢັນພົບຜູ້ເສຍຊີວິດ ຈາກໂຄວິດ-19 ຄັ້ງທຳອິດໃນຮອບກວ່າ 1 ປີ
ຈີນຢືນຢັນພົບຜູ້ເສຍຊີວິດຈາກໂຄວິດ-19 ຄັ້ງທຳອິດນັບແຕ່ຕົ້ນປີຜ່ານມາ ຫລັງໂອມິຄຣອນລະບາດເຮັດໃຫ້ຈຳນວນຜູ້ຕິດເຊື້ອເພີ່ມສູງ.
ວັນທີ 19 ມີນາ 2022, ສຳນັກຂ່າວຕ່າງປະເທດລາຍງານວ່າ: ຄະນະກຳມະການສຸຂະພາບແຫ່ງຊາດຂອງຈີນ (NHC) ຢືນຢັນພົບຜູ້ເສຍຊີວິດຈາກການຕິດເຊື້ອໂຄວິດ-19 ສອງຄົນ ຖືເປັນການພົບຜູ້ເສຍຊີວິດຄັ້ງທຳອິດນັບແຕ່ວັນທີ 25 ມັງກອນ 2021.
ສຳລັບຜູ້ເສຍຊີວິດທັງສອງຄົນນັ້ນ ຄົນໜຶ່ງມີອາຍຸ 84 ປີ ແລະ ອີກຄົນໜຶ່ງອາຍຸ 65 ປີ ໂດຍທັງສອງຢູ່ມົນທົນຈີ໋ຫລິນ ທາງຕາເວັນອອກຂອງປະເທດ ເຊິ່ງເປັນພື້ນທີ່ທີ່ໄວຣັສສາຍພັນໂອມິຄຣອນກຳລັງລະບາດໜັກ.
ທ້າວ ຈ້າວ ຫຍາຮຸ່ຍ ເຈົ້າໜ້າທີ່ອາວຸໂສຂອງຄະນະກຳມະການສຸຂະພາບແຫ່ງຊາດຂອງຈີນ ເປີດເຜີຍຕໍ່ນັກຂ່າວວ່າ: ການເສຍຊີວິດຂອງຜູ້ຕິດເຊື້ອທັງສອງນັ້ນ ມີສາເຫດໂດຍກົງມາຈາກສະພາວະດ້ານສຸຂະພາບທີ່ເປັນຢູ່ກ່ອນ ແລະ ໜຶ່ງໃນຜູ້ເສຍຊີວິດຍັງບໍ່ໄດ້ຮັບວັກຊີນປ້ອງກັນພະຍາດໂຄວິດ-19.
ການພົບຜູ້ເສຍຊີວິດສອງຄົນຫລ້າສຸດນີ້ ສົ່ງຜົນໃຫ້ຈຳນວນຜູ້ເສຍຊີວິດຈາກໂຄວິດ-19 ໃນຈີນເພີ່ມຂຶ້ນເປັນ 4.636 ຄົນ ເຊິ່ງເປັນຈຳນວນເສຍຊີວິດສະສົມນັບແຕ່ເກີດການແພ່ລະບາດໃນເມືອງອູ່ຮັ່ນເມື່ອທ້າຍປີ 2019 ແຕ່ໄດ້ຮັບການແກ້ໄຂຄັ້ງໜຶ່ງໃນເດືອນເມສາ 2020 ໂດຍບໍ່ນັບລວມຈຳນວນຜູ້ເສຍຊີວິດຈາກການລະບາດໃຫຍ່ໃນໂຮງໝໍ ແລະ ລະບົບອື່ນໆໃນໄລຍະທຳອິດ.
ຂະນະດຽວກັນ, ຄະນະກຳມະການສຸຂະພາບແຫ່ງຊາດຂອງຈີນ ຍັງລາຍງານການກວດພົບຜູ້ຕິດເຊື້ອໂຄວິດ-19 ໃນປະເທດໃໝ່ຈຳນວນ 2.157 ຄົນໃນວັນທີ 19 ມີນາ.
ທັງນີ້, ທາງການຈີນຍັງດຳເນີນຍຸດທະສາດ “ໂຄວິດເປັນສູນ” ຢ່າງຕໍ່ເນື່ອງ ນັບແຕ່ພົບການລະບາດຮອບທຳອິດ ດ້ວຍການເລັ່ງກວດແບບບຸກ ແລະ ປະກາດໃຊ້ມາດຕະການລັອກດາວເຂັ້ມງວດໃນພື້ນທີ່ທີ່ພົບການລະບາດ ເຮັດໃຫ້ການແພ່ລະບາດຈາກກຸ່ມກ້ອນຕ່າງໆຖືກສະກັດຢ່າງວ່ອງໄວ.
ໂດຍມົນທົນຈີ໋ຫລິນ ເຊິ່ງມີຊາຍແດນຕິດກັບ ສປປ ເກົາຫລີ ແລະ ຣັດເຊຍ ແລະ ຖືເປັນສູນກາງການລະບາດຮອບນີ້ ໜ່ວຍງານປົກຄອງທ້ອງຖິ່ນຂອງມົນທົນໄດ້ອອກຄຳສັ່ງຫ້າມບໍ່ໃຫ້ປະຊາຊົນເດີນທາງໂດຍບໍ່ຈຳເປັນແລ້ວ.
ອ້າງອີງ:
https://www.reuters.com/…/china-reports-first-covid…/
https://www.businesstoday.in/…/china-reports-first…
https://www.theguardian.com/…/china-reports-first…
