ອິນໂດເນເຊຍ ຊີ້ປະຊາກອນ 86,6% ມີແອນຕິບໍດີໂຄວິດ-19 ຈາກການສັກວັກຊີນ ຫລື ຕິດເຊື້ອໄວຣັສ
ອິນໂດເນເຊຍເຜີຍ ປະຊາກອນອາຍຸ 1 ປີຂຶ້ນໄປ 86,6% ມີແອນຕິບໍດີຂອງພະຍາດໂຄວິດ-19 ຈາກການສັກວັກຊີນ ຫລື ຫລັງເຄີຍຕິດເຊື້ອມາແລ້ວ.
ວັນທີ 19 ມີນາ 2022, ລັດຖະບານອິນໂດເນເຊຍເປີດເຜີຍຜົນສຳຫລວດທາງວິທະຍາເຊຣຳ ເຊິ່ງສຳຫລວດລະຫວ່າງເດືອນພະຈິກ-ທັນວາ 2021 ພົບປະຊາກອນອິນໂດເນເຊຍອາຍຸ 1 ປີຂຶ້ນໄປສ່ວນຫລາຍ ຫລື 86,6% ມີແອນຕິບໍດີຂອງພະຍາດໂຄວິດ-19 ຈາກການສັກວັກຊີນ ຫລື ຫລັງຈາກຕິດເຊື້ອໂຄວິດ-19.
ສຳນັກຂ່າວຊິນຮົວລາຍງານວ່າ: ໃນວັນທີ 18 ມີນາ, ທ່ານ ອິວັນ ອາເຣຍວັນ ໜຶ່ງໃນຄະນະນັກວິໄຈຂອງການສຳຫລວດເບື້ອງຕົ້ນຖະແຫລງຂ່າວວ່າ: ຕົວເລກດັ່ງກ່າວນັບລວມ 89,6% ຂອງປະຊາກອນທີ່ສັກວັກຊີນປ້ອງກັນພະຍາດໂຄວິດ-19 ໂດສທຳອິດ ແລະ 98,7% ຂອງປະຊາກອນທີ່ສັກວັກຊີນຄົບໂດສແລ້ວ.
ນອກຈາກນັ້ນ, ການສຳຫລວດຍັງພົບວ່າ: 73,9% ຂອງຜູ້ທີ່ອ້າງວ່າບໍ່ເຄີຍຕິດເຊື້ອໂຄວິດ-19 ແລະ ຍັງບໍ່ໄດ້ສັກວັກຊີນປ້ອງກັນພະຍາດໂຄວິດ-19 ມີແອນຕິບໍດີຂອງພະຍາດໂຄວິດ-19 ຢູ່ນຳ ເຊິ່ງບົ່ງຊີ້ວ່າເຊື້ອໄວຣັສໂຄວິດ-19 ໄດ້ລະບາດສູ່ປະຊາຊົນຈຳນວນຫລາຍໂດຍບໍ່ມີການກວດພົບ.
ການສຳຫລວດດັ່ງກ່າວຖືເປັນການສຳຫລວດລະດັບປະເທດຄັ້ງທຳອິດຂອງອິນໂດເນເຊຍ ເຊິ່ງມີຜູ້ຮ່ວມຕອບແບບສອບຖາມຈາກທຸກແຂວງຂອງປະເທດ ຈຳນວນ 20.622 ຄົນ ໂດຍອິນໂດເນເຊຍຈະດຳເນີນການສຳຫລວດດັ່ງກ່າວທຸກ 6 ເດືອນ.
ທ່ານ ບູດີ ກູນາດີ ຊາດິກິນ ລັດຖະມົນຕີກະຊວງສາທາລະນະສຸກອິນໂດເນເຊຍ ຊີ້ວ່າ: ການໃສ່ຜ້າປິດປາກ-ດັງຍັງເປັນຂໍ້ບັງຄັບ ເພາະແອນຕິບໍດີຊ່ວຍຫລຸດການເຂົ້າປິ່ນປົວໃນໂຮງໝໍ ແລະ ການເສຍຊີວິດ, ແຕ່ບໍ່ໄດ້ປ້ອງກັນການແພ່ເຊື້ອຂອງພະຍາດໂຄວິດ-19.
ອ້າງອີງ:
https://www.xinhuathai.com/inter/270950_20220319
