ຄວາມສໍາຄັນຂອງການສ້າງຕັ້ງພັກປະຊາຊົນລາວ 12 ຂໍ້

ການສ້າງຕັ້ງພັກປະຊາຊົນລາວ ມີຄວາມສໍາຄັນຫລາຍເພາະໄດ້ສ້າງຕັ້ງຂຶ້ນໃນປະເທດກະສິກໍາຫລ້າຫລັງ, ປະຊາຊົນລາວສ່ວນຫລາຍແມ່ນຊາວໄຮ່ນາ, ແຕ່ແມ່ນພັກທີ່ເດີນຕາມລັດທິມາກ-ເລນິນ, ເປັນພັກສືບທອດ ພາລະກິດຂອງພັກກອມມູນິດອິນດູຈີນ, ເປັນຕົວແທນຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານລາວທີ່ແທ້ຈິງ, ພັກຖືເອົາການຮັບໃຊ້ຊາດ, ຮັບໃຊ້ປະຊາຊົນເປັນທິດນໍາພື້ນຖານໃນການເຄື່ອນໄຫວຂອງຕົນ, ປະທານ ໄກສອນ ພົມວິຫານ ຢືນຢັນແຕ່ຫົວທີວ່າ: “ພັກເຮົາໄດ້ກໍາເນີດເກີດຂຶ້ນໂດຍການປະສານສົມທົບລະຫວ່າງລັດທິມາກ-ເລນິນກັບລັດທິຮັກຊາດອັນແທ້ຈິງ ແລະ ລັດທິສາກົນກໍາມະຊີບອັນຜ່ອງໃສ”.ເພື່ອເຮັດສໍາເລັດໜ້າທີ່ທີ່ມີກຽດສະຫງ່ານັ້ນ, ພັກໄດ້ວາງໂຄງການການເມືອງອອກ 12 ຂໍ້ຄື:

1. ຕ້ານ ຈັກ ກະພັດອາເມລິກາ ແລະ ລ່າເມືອງຂຶ້ນຝຣັ່ງທີ່ທໍາລາຍສັນຍາຢຸດຮົບ ແລະ ພວກລູກແຫລ້ງຕີນມືຂອງເຂົາທີ່ພວມພິປອງທໍາລາຍສັນຕິພາບ, ແບ່ງແຍກຊາດເຮົາ ,ແກ່ດຶງເອົາປະເທດເຮົາເຂົ້າກຸ່ມຮຸກຮານ ແລະ ຫວັງແກ່ຍາວພາວະກົດຂົ່ມປະເທດເຮົາ;

2.ຕໍ່ສູ້ທວງໃຫ້ລັດຖະບານລາຊະອານາຈັກຕ້ອງຈິງໃຈຮ່ວມມືກັບກໍາລັງປະເທດລາວ ເພື່ອປະຕິບັດສັນຍາຢຸດຮົບ, ປັບປຸງສັນຕິພາບ, ປະຕິບັດສິດເສລິພາບປະຊາທິປະໄຕ, ດໍາເນີນການເລືອກຕັ້ງທົ່ວໄປຢ່າງເສລີເພື່ອເຕົ້າໂຮມປະເທດຊາດເປັນເອກະພາບ, ສ້າງຕັ້ງລັດຖະບານປະສົມ ແລະ ສໍາເລັດພາລະກິດເອກະລາດແຫ່ງຊາດ;

3. ມະຫາສາມັກຄີທົ່ວປວງຊົນ, ສ້າງຕັ້ງແນວໂຮມເອກະພາບແຫ່ງຊາດກວ້າງຂວາງໂດຍຢູ່ບົນພື້ນຖານພັນທະພາບກໍາມະກອນຊາວນາ;

4. ກໍ່ສ້າງ ແລະ ປັບປຸງກໍາລັງປະກອບອາວຸດ ແລະ ເຄິ່ງປະກອບອາວຸດກາຍເປັນກອງທັບປະຊາຊົນເພື່ອປົກປັກຮັກສາເຂດທີ່ໝັ້ນ,ໜູນຫລັງໃຫ້ແກ່ການຕໍ່ສູ້ທາງການເມືອງທັງເປັນເສົາຄໍ້າແຫ່ງການປົກປັກຮັກສາສັນຕິພາບ;

5. ປົວແປງຊີ ວິດການເປັນຢູ່ຂອງປະຊາຊົນທຸກຊັ້ນຄົນ: ຕໍ່ກໍາມະກອນ, ຕ້ອງຮັບປະກັນໃຫ້ມີວຽກເຮັດງານທໍາ ແລະຕ້ອງ ໄດ້ຮັບການດູແລ, ເບິ່ງແຍງເປັນຢ່າງດີ;ຕໍ່ຊາວໄຮ່ນາ, ຕ້ອງມີທີ່ດິນໄຮ່, ດິນນາເພື່ອຂະຫຍາຍກະສິກໍາແລະ ມີຢູ່ມີກິນ; ຕໍ່ຊາວຜູ້ອອກແຮງງານດ້ວຍມັນສະໝອງ ຕ້ອງນໍາໃຊ້ເຂົາເຈົ້າຢ່າງສົມກຽດ ແລະ ຊ່ວຍເຫລືອເຂົາເຈົ້າເພື່ອຂະຫຍາຍຄວາມຮູ້ຄວາມສາມາດ; ຕໍ່ນາຍທຶນອຸດສາຫະກໍາການຄ້າ ຕ້ອງສົ່ງເສີມໃຫ້ເຂົາເຈົ້າດໍາເນີນການຜະລິດທຸລະກິດ ເພື່ອພັດທະນາອຸດສາຫະກໍາການຄ້າ; ຕໍ່ຜູ້ຊົງຄຸນວຸດທິທີ່ຮັກຊາດ, ເຈົ້າກົກ, ເຈົ້າເຫລົ່າຕ້ອງມີນະໂຍບາຍອັນເໝາະສົມ;

6. ປະຕິບັດສິດເສລີພາບປະຊາທິປະໄຕຕໍ່ປະຊາຊົນ:ເສລີພາບໃນການປາກເວົ້າ, ການຂີດຂຽນ, ການຈັດຕັ້ງ, ການຊຸມນຸມ, ການໄປມາຫາສູ່ກັນ ແລະ ອື່ນໆ;

7. ປະຕິ ບັດສິດເສລີພາບລະຫວ່າງຍິງ-ຊາຍ, ປະຕິບັດນະໂຍບາຍສະເໝີພາບ ແລະ ສາມັກຄີລະຫວ່າງເຜົ່າ, ລົບລ້າງຄວາມອາຄາດບາດໝາງ, ການແບ່ງແຍກລະຫວ່າງເຜົ່າຕ່າງໆຢູ່ພາຍໃນປະເທດທີ່ພວກລ່າເມືອງຂຶ້ນ ເເລະ ສັກດິນາເປັນຜູ້ກໍ່ຂຶ້ນ;
8. ເຄົາລົບສິດ ເສລີພາບໃນການເຊື່ອຖື ແລະ ຮີດຄອງປະເພນີຂອງປະຊາ ຊົນເຜົ່າຕ່າງໆ, ຕ້ານໄພບໍ່ຮູ້ໜັງສື, ຂະຫຍາຍວັດທະນະທໍາແຫ່ງຊາດ;

9. ສໍາລັບຊາວຕ່າງດ້າວທີ່ອາໄສຢູ່ໃນປະເທດລາວ ຕ້ອງເຄົາລົບເອກະລາດ, ອະທິປະໄຕຂອງລາວ ຈຶ່ງຈະໄດ້ຮັບປະກັນຊີວິດ, ຊັບສົມບັດ,ສິດເສລີພາບການຕັ້ງພູມລໍາເນົາ ແລະ ການທຸລະກິດ;

10. ຜູກມິດກັບທຸກປະເທດທີ່ເຄົາລົບເອກະລາດ,ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດເຮົາ. ຜູກສາຍສໍາພັນທຸກດ້ານລະຫວ່າງປະເທດເຮົາກັບບັນດາປະເທດດັ່ງກ່າວບົນຫລັກການສະເໝີພາບ,ຕ່າງຝ່າຍຕ່າງໄດ້ຮັບຜົນປະໂຫຍດ;
11. ຕັ້ງໜ້າກໍ່ສ້າງບໍາລຸງພະນັກງານ, ກໍາມະກອນ, ຊາວໄຮ່ນາ, ເຜົ່າຊົນສ່ວນໜ້ອຍ;

12. ອອກແຮງກໍ່ສ້າງພັກປະຊາ ຊົນ ປະຕິວັດລາວ ໃຫ້ກາຍເປັນພັກທີ່ເຂັ້ມແຂງຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານ ເພື່ອໃຫ້ມີຄວາມສາມາດພຽງພໍໃນການນໍາພາການປະຕິວັດລາວ ໃຫ້ໄປສູ່ໄຊຊະນະສຸດທ້າຍ.