ສານກິລາໂລກ ປະຕິເສດຄຳອຸທອນຈາກຣັສເຊຍ ກໍລະນີຟີຟາສັ່ງຕັດອອກຈາກບານໂລກຮອບຄັດເລືອກ 2022
ສານກິລາໂລກປະຕິເສດຄຳອຸທອນຈາກ ຣັສເຊຍ ກໍລະນີຖືກຟີຟາ ຕັດອອກຈາກຮອບຄັດເລືອກເຕະບານໂລກ 2022 ຮອບເພລອອຟ ສືບເນື່ອງຈາກສົງຄາມຮຸກຮານຢູເຄຣນ.
ສານກິລາໂລກ (CAS) ປະຕິເສດຄຳຮ້ອງຈາກຣັສເຊຍ ທີ່ຕ້ອງການອຸທອນກໍລະນີຖືກສະຫະພັນບານເຕະນາໆຊາດ (FIFA) ສັ່ງລົງໂທດຈາກບານໂລກ 2022 ຮອບຄັດເລືອກເຂດຢູໂຣບ ຮອບເພລອອຟ.
ຣັສເຊຍຖືກຟີຟາ ສັ່ງລົງໂທດຈາກການແຂ່ງຂັນທຸກລາຍການທັງທີມຊາດ ແລະ ທີມສະໂມສອນ ສືບເນື່ອງຈາກກໍລະນີທີ່ປະທານາທິບໍດີ ວະລາດີເມຍ ປູຕິນ ອອກຄຳສັ່ງໃຫ້ກຳລັງທະຫານເຮັດສົງຄາມຮຸກຮານໃສ່ຢູເຄຣນ ຫລັງມີຂໍ້ພິພາດກັນມາຍາວນານ.
ດ້ວຍເຫດນີ້ ຕາມຕາຕະລາງເກ່ົາທີ່ທີມຊາດຣັສເຊຍທີ່ຈະເຕະຮອບເພລອອຟຍາດປີ້ເສັ້ນທາງດຽວກັບໂປແລນ, ສະວີເດັນ ແລະ ສາທາລະນະລັດ ເຊັກ ຈຶ່ງຕ້ອງຖືກຕັດອອກໄປ ໂດຍຄູ່ແຂ່ງຮອບຮອງຊະນະເລີດຢ່າງໂປແລນຈະໄດ້ສິດໄປຖ້າໃນຮອບຊີງຊະນະເລີດທັນທີ.
ຫລ້າສຸດສານກິລາໂລກ ຖະແຫລງເຖິງການຍື່ນອຸທອນຈາກຣັສເຊຍວ່າ : ‘‘ ຄຳຕັດສິນດັ່ງກ່າວຍັງຄົງມີຜົນບັງຄັບໃຊ້ ທຸກທີມຊາດຈາກຣັສເຊຍທັງທີມຊາດ ແລະ ສະໂມສອນ ຕ້ອງຖືກລະງັບຈາກການເຂົ້າຮ່ວມແຂ່ງຂັນລາຍການຂອງຟີຟາຄືເກ່ົາ ເຊິ່ງຂະນະບວນການຕຸລາການຂອງສານກິລາໂລກຍັງຄົງດຳເນີນຢູ່ ’’.
