ທຣີ ກົດດັນເຊລຊີ ຖອດໂລໂກ້ສິນຄ້າຂອງພວກເຂົາອອກໃຫ້ໄວທີ່ສຸດ

ຄວາມເຄື່ອນໄຫວຫລັງຈາກທີ່ ໂຣມັນ ອະບຣາໂມວິດ ເສດຖີຊາວຣັສເຊຍ ເຈົ້າຂອງທີມ ເຊລຊີ ຖືກລັດຖະບານສັ່ງຂວຳ່ບາດ ເນື່ອງຈາກເຊື່ອວ່າມີຄວາມສະໜິດສະໜົມກັ ວະລາດີເມຍ ປູຕິນ ປະທານາທິບໍດີຣັສເຊຍ ທີ່ສັ່ງກອງກຳລັງຣັສເຊຍໂຈມຕີ ຢູເຄຣນ.

ສົ່ງຜົນໃຫ້ ທຣີ (Three) ບໍລິສັດດ້ານໂທລະຄົມມະນາຄົມຊື່ດັງ ປະກາດລະງັບການເປັນຜູ້ສະຫນັບສະໜູນເສື້ອແຂ່ງຂັນຂອງ ເຊລຊີ ແຕ່ຈົນເຖິງຕອນນີ້ ເສື້ອແຂ່ງຂອງ ເຊລຊີ ທີ່ລົງແຂ່ງຂັນກໍຍັງຄົງມີໂລໂກ້ຂອງ ທຣີ ຢູ່, ເພາະວ່າໃຫ້ເປັນໄປຕາມເງື່ອນໄຂຂອງໃບອະນຸຍາດພິເສດທີ່ໄດ້ຮັບຈາກລັດຖະບານອັງກິດ ແນວໃດກໍຕາມຫລ້າສຸດ ທຣີ ໄດ້ອອກມາກົດດັນໃຫ້ ເຊລຊີແກ້ບັນຫາດັ່ງກ່າວ ແລະ ຮີບຖອດໂລໂກ້ຂອງພວກເຂົາອອກໃຫ້ໄວທີ່ສຸດ.

ໂຄສົກຂອງ ທຣີ ລະບຸວ່າ : ‘‘ ຈາກການເຈລະຈາກັບເຊລຊີແລ້ວ ພວກເຮົາເຂົ້າໃຈວ່າມີບັນຫາໃນການຖອດໂລໂກ້ ທຣີ ອອກຈາກເສື້ອ ກໍເພາະມັນເປັນຜົນມາຈາກເລື່ອງການຜະລິດເສື້ອ ແລະ ຂໍ້ຈຳກັດດ້ານໃບອະນຸຍາດ ເຮົາໄດ້ຮຽກຮ້ອງໃຫ້ ເຊລຊີ ແກ້ໄຂບັນຫານີ້ໂດຍໄວທີ່ສຸດເທົ່າທີ່ຈະສາມາດເປັນໄປໄດ້ ’’.

ທັງນີ້ ມີຄວາມເປັນໄປໄດ້ວ່າເຊລຊີອາດຈະໃຊ້ວິທີເອົາສະຕິກເກີມາປິດໂລໂກ້ ຄືກັບ ຊາລເກ 04 ທີມດັງໃນເຢຍລະມັນ ທີ່ເຮັດແບບນັ້ນນັບຕັ້ງແຕ່ຍົກເລີກສັນຍາກັບ ກາສພຣອມ ບໍລິສັດພະລັງງານຈາກຣັສເຊຍ.