ພະແນກການເງິນຫຼວງພະບາງຈະສ້າງສ້າງພະນັກງານນຳພາ-ຄຸ້ມຄອງ ໃຫ້ເປັນພະນັກງານສືບທອດ-ປ່ຽນແທນໃນສະເພາະໜ້າ ແລະ ຍາວນານ

ວັນທີ 16 ມີນາ 2021 ນີ້, ທີ່ພະແນກການເງິນແຂວງຫຼວງພະບາງ, ໄດ້ຈັດກອງປະຊຸມສ້າງແຜນກຳນົດ ພະນັກງານນຳພາ-ຄຸ້ມຄອງແຕ່ປີ 2022-2025 ຂອງວິທະຍາໄລການເງິນພາກເໜືອ, ພາສີ, ສ່ວຍສາອາກອນ ແລະ ຄັງເງິນ ປະຈຳແຂວງຫຼວງພະບາງ,ໂດຍເປັນປະທານຂອງທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະ ຊວງການເງິນ ແລະ ທ່ານ ປອ ຄໍາຄ່ອງ ພົມມະປັນຍາ ກຳມະການພັກແຂວງ, ຫົວໜ້າຄະນະຈັດຕັ້ງແຂວງຫຼວງພະບາງ, ມີທ່ານ ຫົວໜ້າພະແນກການເງິນແຂວງ, ຄະນະຮັບຜິດຊອບການຂຶ້ນແຜນກຳນົດພະນັກງານນຳພາ-ຄຸ້ມຄອງ, ຫົວໜ້າ-ຮອງຫົວໜ້າຂະແໜງການ, ພະນັກງານ-ສະມາຊິກພັກພາຍໃນຂົງເຂດດັ່ງກ່າວເຂົ້າຮ່ວມ.

ໃນວາລະກອງປະຊຸມໄດ້ຮັບຟັງການສະເໜີກ່ຽວກັບແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 159/ຄຈສພ, ຮັບຟັງການສະເໜີກ່ຽວກັບມາດຕະຖານພະນັກງານນໍາພາ-ຄຸ້ມຄອງ(ມະຕິກົມການເມືອງສູນກາງພັກ ສະບັບເລກທີ 030/ກມສພ), ແຈ້ງການແນະນຳຂອງຄະນະຈັດຕັ້ງສູນກາງພັກ ສະບັບເລກທີ 158/ຄຈສພ, ຄຳແນະນໍາ ສະບັບເລກທີ 292/ຄຈສພ ແລະ ແນະນໍາວິທີການ, ເປົ້າໝາຍຢູ່ໃນບັດທາບທາມ.

ໂອກາດດັ່ງກ່າວ, ທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ໄດ້ມີຄໍາເຫັນຕໍ່ກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງ ຂອງວິທະຍາໄລການເງິນພາກເໜືອ, ພາສີ, ສ່ວຍສາອາກອນ ແລະ ຄັງເງິນ ປະຈຳແຂວງຫຼວງພະບາງ, ໂດຍປະຕິບັດຕາມມະຕິກົມການເມືອງສູນກາງພັກ ສະບັບເລກທີ 032/ກມສພ, ລົງວັນທີ 03 ມັງກອນ 2018 ວ່າດ້ວຍການສ້າງແຜນກຳນົດພະນັກງານນຳພາ-ຄຸ້ມຄອງ, ປະຕິບັດຕາມແຈ້ງ ການຂອງຄະນະຈັດຕັ້ງສູນກາງພັກ ສະບັບເລກທີ 159/ຄຈສພ, ລົງວັນທີ 01 ຕຸລາ 2021 ກ່ຽວກັບການກໍານົດເວລາການສ້າງແຜນກໍານົດພະນັກງານນໍາພາ-ຄຸ້ມຄອງ ທີ່ຂຶ້ນກັບສິດຄຸ້ມຄອງຂອງຄະນະບໍລິຫານງານພັກກະຊວງ, ແຂວງ ແລະ ເມືອງ, ອີງຕາມແຈ້ງການແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 158/ຄຈສພ, ລົງວັນທີ 01 ຕຸລາ 2021 ໄດ້ມີການປັບປຸງເປົ້າໝາຍເຂົ້າຮ່ວມການທາບທາມ ແລະ ສັງລວມຜົນທາບທາມການສ້າງແຜນກໍານົດພະນັກງານນໍາພາ-ຄຸ້ມຄອງແມ່ນໃຫ້ສໍາເລັດໃນເດືອນພຶດສະພາປີ 2022 ນີ້.

ໂດຍປະຕິບັດຕາມມະຕິຂອງກົມການເມືອງສູນກາງພັກ ແລະ ແຈ້ງການຂອງຄະນະຈັດຕັ້ງ ສູນກາງພັກ, ກະຊວງການເງິນ, ຈຶ່ງໄດ້ແຕ່ງຕັ້ງຄະນະເພື່ອສົມທົບກັບອົງການປົກຄອງແຂວງຫຼວງພະບາງ ໂດຍສະເພາະແມ່ນ ຄະນະຈັດຕັ້ງແຂວງ ແລະ ພາກສ່ວນກ່ຽວຂ້ອງອື່ນໆໃນການດໍາເນີນການສ້າງແຜນກໍານົດພະນັກງານນໍາພາ-ຄຸ້ມຄອງ ຂອງວິທະຍາໄລການເງິນພາກເໜືອ, ພາສີ, ສ່ວຍສາ ອາກອນ ແລະ ຄັງເງິນປະຈໍາແຂວງຫຼວງພະບາງໃຫ້ສໍາເລັດ ຕາມກໍານົດເວລາ.

ກອງປະຊຸມການສ້າງແຜນກໍານົດພະນັກງານນໍາພາ-ຄຸ້ມຄອງ ແມ່ນຈັດຂຶ້ນທ່າມກາງບັນຍາກາດທົ່ວພັກທົ່ວຂະແໜງການເງິນພວມຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ III ຂອງອົງຄະນະພັກກະຊວງການເງິນ ໂດຍສະເພາະແມ່ນການສຸມໃສ່ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຕິດພັນກັບຄໍາສັ່ງຂອງນາຍົກລັດຖະມົນຕີເລກທີ 18/ນຍ,ລົງວັນທີ 16 ກັນຍາ 2021 ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ.

ກອງປະຊຸມໃນຄັ້ງນີ້ໄດ້ພ້ອມກັນສຸມໃສ່ບັນລຸຕາມຈຸດປະສົງຄາດໝາຍໃນການສ້າງແຜນກໍານົດພະນັກງານນໍາພາ-ຄຸ້ມຄອງ, ເພື່ອເປັນບ່ອນອີງໃນການບໍາລຸງ, ກໍ່ສ້າງພະນັກງານໃນຕໍາແໜ່ງຕ່າງໆເພື່ອເປັນເປົ້າໝາຍກໍ່ສ້າງເປັນພະນັກງານສືບທອດ-ປ່ຽນແທນໃນສະເພາະໜ້າ ແລະ ຍາວນານ. ສະນັ້ນ, ເພື່ອເຮັດໃຫ້ແຜນກໍານົດພະນັກງານນໍາພາ-ຄຸ້ມຄອງຂອງວິທະຍາໄລການເງິນພາກເໜືອ, ພາສີ, ສ່ວຍສາອາກອນ ແລະ ຄັງເງິນປະຈໍາແຂວງຫຼວງພະບາງບັນລຸຕາມເນື້ອໃນຈິດໃຈຂອງມະຕິກົມການເມືອງສູນກາງພັກນັ້ນ, ໃຫ້ຄະນະພັກ, ຄະນະນໍາ,ພະນັກງານ-ສະມາຊິກພັກ, ຕ້ອງໄດ້ເຊື່ອມຊືມ, ກໍາແໜ້ນກ່ຽວກັບເນື້ອໃນ ແລະ ວິທີການສ້າງແຜນກໍານົດພະນັກງານນໍາພາຄຸ້ມຄອງເພື່ອຈັດຕັ້ງປະຕິບັດໃຫ້ມີຄວາມເປັນເອກະພາບ, ມີປະສິດທິພາບ, ປະສິດທິຜົນ ແລະ ມີຜົນສໍາເລັດ, ເພື່ອສ້າງການຫັນ ປ່ຽນຢ່າງແຂງແຮງ ແລະ ເລິກເຊິ່ງໃນວຽກງານພະນັກງານ.