ສປປ ເກົາຫລີ ປະກາດເອົາຄືນອາເມລິກາ ຫລາຍພັນເທົ່າຫລັງເຮັດໃຫ້ຖືກຂວ້ຳບາດ
ສປປ ເກົາຫລີ ອອກຖະແຫລງການປະນາມອົງການສະຫະປະຊາຊາດ ຫລື UN ໃນການໃຊ້ມາດຕະການຂວ້ຳບາດຄັ້ງໃໝ່ຕໍ່ກໍລະນີໂຄງການອາວຸດນິວເຄຼຍ ແລະ ລູກສອນໄຟ ແລະ ກ່າວວ່າ: ຈະເອົາຄືນອາເມລິກາຫລາຍພັນເທົ່າໃນຖານະຜູ້ບົ່ງການໃຫ້ເກີດການໂດດດ່ຽວ ສປປ ເກົາຫລີ.
ສຳນັກຂ່າວກາງເກົາຫລີ (KCNA) ເຜີຍແຜ່ຖະແຫລງການຈາກທາງການ ສປປ ເກົາຫລີ ລະບຸວ່າ: ມາດຕະການຂວ້ຳບາດຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ມີອາເມລິກາເປັນຜູ້ຢູ່ເບື້ອງຫລັງ ເພື່ອໂດດດ່ຽວ ສປປ ເກົາຫລີ ມາດຕະການດັ່ງກ່າວຖືວ່າເປັນການລະເມີດອະທິປະໄຕຂອງປະເທດຢ່າງຮ້າຍແຮງ ແລະ ສປປ ເກົາຫລີ ຈະບໍ່ຍອມເຈລະຈາ ຫລື ຖອຍໂຄງການອາວຸດນິວເຄຼຍພຽງແຕ່ກ້າວດຽວ ເຖິງວ່າຈະຕ້ອງຜະເຊີນໄພຄຸກຄາມຈາກອາເມລິກາກໍຕາມ, ອາເມລິກາຈະຕ້ອງຖືກເອົາຄືນຢ່າງສາສົມຫລາຍພັນເທົ່າ ແລະ ກ່າວວ່າ: ອາເມລິກາບໍ່ໄດ້ປອດໄພຈາກອາວຸດຂອງ ສປປ ເກົາຫລີ, ປະເທດອື່ນໆທີ່ສະໜັບສະໜູນອາເມລິກາກໍເຊັ່ນກັນ.
ໃນທ້າຍອາທິດຜ່ານມາ, UNSC ມີມະຕິໃຊ້ມາດຕະການຂວ້ຳບາດຄັ້ງໃໝ່ ເຊິ່ງປະກອບມີຄຳສັ່ງຫ້າມ ສປປ ເກົາຫລີ ສົ່ງອອກຖ່ານຫີນ, ເຫລັກ ແລະ ແຮ່ເຫລັກ, ຊືນ ແລະ ແຮ່ຊືນ, ປາ ແລະ ອາຫານທະຫານ ລວມເປັນມູນຄ່າຫລາຍກວ່າ 1.000 ລ້ານໂດລາສະຫະລັດ.
