ຈັບກຸ່ມເປົ້າໝາຍຂົນສົ່ງຢາເສບຕິດມາດຳເນີນຄະດີ

ພັທ ທັດສະພົງ ຫວັນມະນີຈັນ ຮອງຫົວໜ້າກອງບັນຊາການ ປກສ ເມືອງຫາດຊາຍຟອງ ໃຫ້ຮູ້ວ່າ: ແຕ່ວັນທີ 2 ມີນາເປັນຕົ້ນມາ, ເຈົ້າໜ້າທີ່ໄດ້ຕິດຕາມກຸ່ມເປົ້າໝາຍຂົນສົ່ງຢາເສບຕິດຢູ່ເສັ້ນທາງເຂດບ້ານນາໄຫ ເມືອງຫາດຊາຍຟອງ ນະຄອນຫຼວງວຽງຈັນ. ມາເຖິງເວລາ 11:10 ໂມງ, ໄດ້ກັກລົດກະບະວີໂກ້ ສີປອນຂັບມາແຕ່ບ້ານສາລາຄຳ ມຸ່ງໜ້າສູ່ບ້ານນາໄຫ ແລະ ກວດຄົ້ນພົບຂອງກາງຢາບ້າ 20.008 ເມັດ, ຢາໄອສ໌ 1 ຖົງນ້ອຍ, ປືນສັ້ນ 1 ບອກ ພ້ອມລູກປືນ 3 ລູກ ທັງກັກຕົວຜູ້ຖືກຫາຊື່ ທ້າວ ລັດສະໝີ ຫຼື ລັດ ວ່າງງານ ຢູ່ບ້ານປາກທ້າງ ເມືອງສີໂຄດຕະບອງ ນະຄອນຫຼວງວຽງຈັນ ມາສອບສວນຂະຫຍາຍຜົນ.

ຜ່ານການສອບສວນ, ຜູ້ກ່ຽວໄດ້ຊັດທອດຫາຜູ້ຮ່ວມຂະບວນການດຽວກັນຈໍານວນໜຶ່ງ ແລະເວລາ 12:10 ໂມງວັນດຽວກັນຈຶ່ງກັກຕົວຜູ້ຮ່ວມຂະບວນການໄດ້ອີກ 1 ຄົນຢູ່ປໍ້ານໍ້າມັນແຫ່ງໜຶ່ງເຂດບ້ານປາກທ້າງເມືອງ ສີໂຄດຕະບອງ ຊື່ ທ້າວ ວໍລະກອນ ຫຼື ແຊັມ ອາຍຸ 22 ປີ ວ່າງງານຢູ່ບ້ານໜອງແຕ່ງເມືອງສີໂຄດຕະ ບອງ ແລະ ເວລາ 14:00 ໂມງຂອງວັນດຽວກັນສາມາດກັກຕົວຜູ້ຮ່ວມຂະບວນການດຽວກັນໄດ້ອີກຢູ່ຂ້າງວັດອົງຕື້ ຊື່: ທ້າວ ວິລະກອນ ຫຼື ໃຫຍ່ ອາຍຸ 21 ປີ ວ່າງງານຢູ່ບ້ານໜອງດ້ວງເໜືອ ເມືອງສີໂຄດຕະ ບອງມາສອບສວນ-ສືບສວນຂະຫຍາຍຜົນຫາກຸ່ມຮ່ວມຂະບວນການດຽວກັນມາດໍາເນີນຄະດີອີກ.