ມຽນມາໜຸນ “ລົດຍົນພະລັງງານໃໝ່” ຊ່ວຍຮັກສາສິ່ງແວດລ້ອມ

ວັນທີ 14 ມີນາ 2022, ສຳນັກຂ່າວຊິນຮົວລາຍງານວ່າ: ມຽນມາເລີ່ມຜະລິດ ແລະ ຈຳໜ່າຍລົດຍົນພະລັງງານໃໝ່ດ້ວຍແນວຄິດຫລຸດການປ່ອຍກາກບອນ ແລະ ການປົກປ້ອງສິ່ງແວດລ້ອມ.

ໄຄໄຄ ຊັງດາ (Khaingkhaing Sangda) ຫລື ຂ່າຍຂ່າຍ ຊັງຕ໋າ ໜຶ່ງໃນຜູ້ພັດທະນາລົດຍົນໄຟຟ້າແຫ່ງທຳອິດຂອງມຽນມາ ໄດ້ເປີດຕົວລົດຍົນໄຟຟ້າໄຮບຣິດ ເຄເອສດີວີ1-ເອັນອີ2 (KSDV1-NE2) ລຸ້ນທີ 2 ໃນວັນທີ 1 ມີນາ ແລະ ຈຳໜ່າຍໄດ້ຫລາຍກວ່າ 10 ຄັນພາຍໃນໜຶ່ງອາທິດ.

ໄຄໄຄ ຊັງດາ ໃນມຽນມາ ຜະລິດລົດຍົນເຄື່ອງຈັກແອັດຊັງຄັນທຳອິດເມື່ອປີ 2006 ກ່ອນຈະເລີ່ມປະກອບ ແລະ ຜະລິດລົດຍົນພະລັງງານໃໝ່ໃນປີ 2019 ນຳໄປສູ່ການຜະລິດ ແລະ ຈຳໜ່າຍລົດຍົນໄຟຟ້າບໍລິສຸດລຸ້ນທຳອິດໃນປີ 2020.

ທ່ານ ອີຈຽນຊິນ ກຳມະການຜູ້ຈັດການຂອງໄຄໄຄ ຊັງດາ ມໍເຕີຄາ ແຟກທໍຣີ (Khaingkhaing Sangda Motrrcar Factory) ກ່າວຕໍ່ສຳນັກຂ່າວຊິນຮົວວ່າ: ບໍລິສັດຕົນນຳເຂົ້າຊິ້ນສ່ວນລົດຍົນພະລັງງານໃໝ່ທັງໝົດຈາກຈີນ ໂດຍຈຸດປະສົງຕົ້ນຕໍຄືສະໜັບສະໜູນແຜນການປົກປ້ອງສິ່ງແວດລ້ອມຂອງມຽນມາດ້ວຍການຫລຸດການປ່ອຍແກັສເຮືອນແກ້ວ.

ທັງນີ້, ທ່ານ ອີຈຽນຊິນ ເຊື່ອວ່າ: ອຸດສາຫະກຳລົດຍົນພະລັງງານໃໝ່ຂອງມຽນມາມີປະສິດທິພາບສຳລັບການເຕີບໃຫຍ່ໃນອະນາຄົດ.