ເອຣິກ ເທນ ຮາກ ພ້ອມຕອບຮັບຄຸມແມນຢູ ແຕ່ຢາກໃຫ້ ຣັງນິກ ຢູ່ໃນທີມຄູເຝິກ

ຜູ້ຈັດການທີມທີ່ມີໂອກາດຄຸມ ແມນເຊສເຕີ ຢູໄນເຕັດ ພ້ອມຕອບຮັບຄຸມທີມໂດຍທີ່ລາວຕ້ອງການໃຫ້ ຣາຟ ຣັງນິກ ຜູ້ຈັດການທີມຊົ່ວຄາວທີ່ຈະເລື່ອນຕຳແຫນ່ງທີ່ປຶກສານັ້ນ ມາເປັນສ່ວນຫນ່ຶງຂອງທີມຄູເຝິກ.

ເອຣິກ ເທນ ຮາກ ຜູ້ຈັດການທີມ ອາແຈັກ ອຳເຕີດຳ ທີ່ກາຍເປັນບຸກຄົນທີ່ມີໂອກາດຫລາຍຈະໄດ້ຄຸມທີມ ແມນເຊສເຕີ ຢູໄນເຕັດ ທີມດັງແຫ່ງພຣີເມຍລີກ ອັງກິດ ໂດຍຕົວລາວເອງ ພ້ອມຕອບຮັບຄຸມທີມ ແລະ ຕ້ອງການໃຫ້ ຣາຟ ຣັງນິກ ຜູ້ຈັດການທີມຊາວເຢຍລະມັນທີ່ຈະເລື່ອນຂຶ້ນໄປນັ່ງຕຳແຫນ່ງທີ່ປຶກສາໃຫ້ກັບສະໂມສອນ 2 ປີ ມາຮ່ວມເປັນສ່ວນຫນຶ່ງທີມຄູເຝິກຂອງລາວ ຈາກການລາຍງານຂອງ Sunday Mirror ສື່ຊື່ດັງອັງກິດ.

ເປັນທີ່່ເຂົ້າໃຈກັນວ່າ ຣາຟ ຣັງນິກ ເຂົ້າມາຮັບບົດບາດຜູ້ຈັດການທີມຊ່ົວຄາວໃຫ້ກັບຍອດທີມແຫ່ງເມືອງ ແມນເຊສເຕີ ຈົນຈົບພຽງລະດູການນີ້ເທົ່ານັ້ນ ຫລັງຈາກທີ່ກ່ອນຫນ້ານີ້ທີມໄດ້ແຍກທາງກັບ ໂອເລ ກຸນນາ ໂຊລ ຜູ້ຈັດການທີມທີ່ເປັນຕຳນານຂອງສະໂມສອນ ເຊິ່ງຫລັງຈາກລະດູການນີ້ຈົບລົງ ຣັງນິກ ກໍຈະເລື່ອນຂຶ້ນໄປຮັບງານທີ່ປຶກສາໃຫ້ກັບທີມເປັນເວລາ 2 ປີ.

ສຳລັບ ແມນເຊສເຕີ ຢູໄນເຕັດ ມີຕາຕະລາງລົງຫລິ້ນເກມຕໍ່ໄປດ້ວຍການເປີດສະຫນາມ ໂອນ ແທຣັຟຟອດ ຕ້ອນຮັບການມາຢາມຂອງ ແອັດເລຕີໂກ ມາດຣິດ ທີມເກັ່ງຈາກ ລາລີກາ ສະເປນ ໃນລາຍການ ຢູຟາ ແຊ໊ມປຽນລີກ 2021-22 ຮອບ 16 ທີມສຸດທ້າຍນັດທີ 2 ໃນຄຳ່ຄືນວັນອັງຄານນີ້ ເວລາ 03:00 ນາທີ ຕາມເວລາປະເທດລາວ.