ຢາກມີຄວາມສຸກ ຢ່າປຽບທຽບກັບຄົນອື່ນ

“ຢາກມີຄວາມສຸກ ຢ່າປຽບທຽບກັບຄົນອື່ນ”

ເຊື່ອວ່າຫລາຍຄົນອາດຈະຄຸ້ນດີກັບປະໂຫຍກນີ້, ແຕ່ເຄີຍສົງໄສບໍ່ວ່າ ເມື່ອປຽບທຽບກັບຄົນອື່ນຈຶ່ງບໍ່ມີຄວາມສຸກ? ຂະນະດຽວກັນຖ້າເຮົາຢຸດປຽບທຽບກັບຄົນອື່ນ ເຮົາຈະມີຄວາມສຸກຂຶ້ນແທ້ບໍ່? ບາງເທື່ອການປຽບທຽບກັບຄົນອື່ນກໍບໍ່ໜ້າສົ່ງຜົນບໍ່ດີມາໃຫ້ເຮົາສະເໝີໄປ ໝາຍຄວາມວ່າການປຽບທຽບຄົນອື່ນເພື່ອໃຫ້ຮູ້ວ່າເຮົາຍັງຂາດສິ່ງໃດ ແລະ ມີຂໍ້ເສຍຫຍັງແນ່, ບ່ອນໃດຄວນປັບປຸງ ເຊິ່ງການປຽບທຽບໃນມຸມນີ້ຈະເຮັດໃຫ້ເຮົາເກີດແຮງບັນດານໃຈ ຄິດທີ່ຈະປ່ຽນແປງໂຕເອງໃຫ້ດີກວ່າເກົ່າໄດ້.

ຫລາຍເທື່ອເຮົາອາດຈະມັກປຽບທຽບກັບຄົນອື່ນ ເຊິ່ງເປັນສິ່ງຫລີກບໍ່ໄດ້ ທັງໆທີ່ໃນໃຈແລ້ວບໍ່ຢາກປຽບ ທຽບ, ແຕ່ຄວາມຄິດທີ່ເຂົ້າມາໃນຫົວມັນເຮັດໃຫ້ເຮົາຕ້ອງຄິດວ່າຖ້າເຮົາເປັນຄືຄົນນີ້, ຄົນນັ້ນ ຊີວິດເຮົາຄົງມີຄວາມສຸກກວ່າທີ່ເປັນຢູ່ ນີ້ຄືການຄິດເຮັດໃຫ້ເຮົາຮູ້ສຶກບໍ່ດີຕໍ່ຕົນເອງ ແລະ ບໍ່ພໍໃຈໃນສິ່ງທີ່ເປັນ ຫລື ມີຢູ່. ແນວໃດກໍດີຕ້ອງເຂົ້າໃຈກ່ອນວ່າການທີ່ເຮົາໄປສົນໃຈແຕ່ຄວາມສໍາເລັດຂອງຜູ້ອື່ນນັ້ນ ບໍ່ໄດ້ເຮັດໃຫ້ເຮົາປະ ສົບຜົນສໍາເລັດແບບເພິ່ນໄດ້, ຢ່າລືມວ່າທຸກຄົນມີເສັ້ນທາງແຕກຕ່າງກັນ ແຕ່ລະຄົນມີປະສົບການຊີວິດບໍ່ຄືກັນ ດັ່ງນັ້ນ, ເຮົາຄວນຫັນມາເບິ່ງໂຕເອງ ແລະ ຕັ້ງໃຈເຮັດສິ່ງທີ່ຕ້ອງການກໍພໍແລ້ວ.ຄົງເປັນເລື່ອງຍາກຖ້າຈະໃຫ້ຢຸດໄປປຽບທຽບກັບຄົນອື່ນທັນທີທັນໃດ, ແຕ່ຈະເຮັດແນວໃດດີ? ລອງເຮັດຕາມ 4 ຂໍ້ນີ້ເບິ່ງ

1.ຄິດຫາສິ່ງດີໆທີ່ເຄີຍເກີດຂຶ້ນໃນຊີວິດ

ເຖິງວ່າແຕ່ລະມື້ຈະບໍ່ແມ່ນມື້ທີ່ດີສະເໝີ, ແຕ່ອາດຈະມີເລື່ອງດີໆເຂົ້າມາໃນຊີວິດ, ດັ່ງນັ້ນ ເຮົາຄວນຊົມເຊີຍ ແລະ ດີໃຈກັບສິ່ງດີໆເຫລົ່ານັ້ນ ເພາະມັນຈະເຮັດເຮົາໃຫ້ເຫັນຄຸນຄ່າຂອງຕົນເອງຫລາຍຂຶ້ນ ໂດຍບໍ່ຕ້ອງໄປປຽບທຽບກັບຄົນອື່ນ.

2.ບັນທຶກຄວາມສໍາເລັດຂອງຕົນເອງ

ເມື່ອການປຽບທຽບໂຕເອງກັບຄົນອື່ນແລ່ນນມາໃນຫົວຂອງເຮົາແລ້ວອາດຈະເບິ່ງບໍ່ເຫັນຂໍ້ດີ ຫລື ຈຸດແຂງ ຂອງເຮົາ, ດັ່ງນັ້ນ ການບັນທຶກຄວາມສໍາເລັດຂອງເຮົາຈຶ່ງເປັນອີກວິທີໜຶ່ງທີ່ຈະເຮັດໃຫ້ເຮົາເກີດຄວາມພາກ ພູມໃຈຕົນເອງໄດ້ຫລາຍຂຶ້ນ ແລະ ຈະເຮັດໃຫ້ເຮົາເບິ່ງຂ້າມຈຸດດ້ອຍຂອງຕົນເອງ.

3.ປ່ຽນການປຽບທຽບມາເປັນແຮງບັນດານໃຈ

ຖ້າເຮົາບໍ່ສາມາດຫລີກຄວາມຄິດເຫລົ່ານັ້ນໄດ້, ລອງປ່ຽນຄວາມຄິດນັ້ນມາເປັນແຮງບັນດານໃຈໃຫ້ຕົນເອງ ເພື່ອເປັນຈຸດເລີ່ມຕົ້ນເຮັດສິ່ງໃໝ່ໆ.

4.ຮັກ ແລະ ພໍໃຈສິ່ງທີ່ເປັນໃຫ້ຫລາຍທີ່ສຸດ

ຄົນເຮົາມັກຈະໃຫ້ຄວາມສໍາຄັນຄົນອື່ນກ່ອນຕົນເອງສະເໝີ, ຖ້າເຮົາຍອມຮັບ ແລະ ຊົມເຊີຍຄວາມສາມາດຂອງຕົນເອງຫລາຍຂຶ້ນ ແນ່ນອນຈະເຮັດໃຫ້ເຮົາຢຸດປຽບທຽບກັບຄົນອື່ນໄດ້ ແລະ ຊີວິດເຮົາກໍຈະມີຄວາມ ສຸກຫລາຍຂຶ້ນ.