ຂອດບໍລິການທີ່ບໍ່ຄວນເບິ່ງຂ້າມ
ໂດຍ: ທິດກໍ່າ
ປະໂຫຍກທີ່ທິດກໍ່າຕັ້ງກະທູ້ຂ້າງເທິງນີ້ ມັນລາມໄປເຖິງການບໍລິການປິ່ນປົວຢູ່ໂຮງໝໍບ້ານເຮົາ ຍ້ອນວ່າທິດກໍ່າເອງໄດ້ໄປສໍາ ຜັດ ແລະ ເຫັນຫລາຍຄັ້ງໃນບາງບ່ອນ. ໃນຄວາມເປັນຈິງແລ້ວ ຖ້າຈະເວົ້າເຖິງໂຮງໝໍແມ່ນບໍ່ມີໃຜປາດຖະໜາຢາກໄປໃກ້ ຖ້າບໍ່ຈໍາເປັນ, ແຕ່ເມື່ອມີການເຈັບເປັນເກີດຂຶ້ນໃນໂຕຄົນເຮົາແລ້ວ ທຸກຄົນກໍຕ້ອງໄດ້ໄປເພິ່ງໂຮງໝໍ ແລະ ອາໄສແພດໝໍເປັນຜູ້ເບິ່ງແຍງປິ່ນ ປົວ ແລະ ກູ້ເອົາຊີວິດທີ່ພວມເຈັບເປັນຢູ່ນັ້ນໃຫ້ຄືນມາເປັນປົກກະຕິ. ແຕ່ອັນຫລີກເວັ້ນບໍ່ໄດ້ນັ້ນ ທຸກຄົນທີ່ໄປປິ່ນປົວກໍຕ້ອງໄດ້ຈ່າຍເງິນຄ່າປິ່ນປົວ ແລະ ຊື້ຢຸກຊື້ຢາຕາມອາການເຈັບເປັນຜູ້ຫລາຍຜູ້ໜ້ອຍ. ສະນັ້ນ ມາສະຫລຸບເບິ່ງແລ້ວລະຫວ່າງການໄປປິ່ນປົວຢູ່ໂຮງໝໍລັດກັບເອກະຊົນທຸກຄົນກໍໄດ້ຈ່າຍເງິນເໝືອນກັນ ຫລື ຖ້າຫລຸດລື່ນກໍແມ່ນລະຫວ່າງໄຂ່ເປັດໄຂ່ໄກ່. ຍ້ອນເຫດ ຜົນດັ່ງກ່າວ ຈຶ່ງເວົ້າໄດ້ວ່າການບໍລິການປິ່ນປົວຢູ່ໂຮງໝໍກໍຄ້າຍຄືກັນກັບການເຮັດທຸລະກິດດ້ານອື່ນໆ ເພາະການໃຊ້ຈ່າຍທຸກຢ່າງ ຈະແພງ ຫລື ຖືກກໍຂໍໃຫ້ແພດໝໍບົ່ງມະຕິ ແລະ ວາງຢາມາໂລດພຽງແຕ່ໃຫ້ອາການເຈັບເປັນໄດ້ຊ່ວງເຊົາຫາຍດີມີຊີວິດຊີວາສືບຕໍ່ໄປພາຍໜ້າ.
ຕ້ອງຍອມຮັບວ່າ, ສະພາບຄວາມເຈັບເປັນຂອງຄົນລາວເຮົາໃນປັດຈຸບັນແມ່ນມີຫລາຍອີ່ຫລີ. ທິດກໍ່າໄດ້ໄປເຫັນຢູ່ໂຮງໝໍມະໂຫສົດກັບໂຮງໝໍມິດຕະພາບ (150 ຕຽງ) ສະເລ່ຍແລ້ວແມ່ນມີຫລາຍສິບຫລາຍຮ້ອຍໃນແຕ່ລະມື້. ແຕ່ຖ້າເຮົາຈະບວກລົບຄູນ ຫານໃສ່ໃນແຕ່ລະໂຮງໝໍທົ່ວປະເທດມັນຊິມີຈັກຄົນ ແລະຈະມີລາຍຮັບໃນການເກັບຄ່າບໍລິການປິ່ນປົວ ແລະ ຄ່າຢຸກຢາຕ່າງໆ ກໍຈະມີຫລາຍສິບລ້ານໃນແຕ່ລະວັນ ເພາະທຸກສິ່ງຢ່າງກໍຕ້ອງໄດ້ເສຍເງິນຜູ້ໜ້ອຍຜູ້ຫລາຍຕາມສະພາບຄວາມເປັນຈິງຂອງພະ ຍາດ. ໃນບາງກໍລະນີ ຖືກໄລຍະການເຈັບເປັນຍ້ອນເກີດໂລກລະບາດ ຫລື ພະຍາດຕິດແປດຮ້າຍແຮງ ຜູ້ເຈັບເປັນທັງຫລາຍກໍຈະໂຫ່ເຂົ້າໂຮງໝໍຈົນລົ້ນອັ່ງບໍ່ມີຮອດຕຽງຊິນອນ. ເທົ່າທີ່ເຄີຍເຫັນມາແມ່ນພະຍາດຖອກທ້ອງ, ໄຂ້ເລືອດອອກ ແລະ ພະຍາດຕາມລະດູການອື່ນໆ.
ຕາມທິດກໍ່າຄິດ, ຂອງສົມພໍບັນດາໂຮງໝໍເອກະຊົນຢູ່ບ້ານເຮົາມັນຈຶ່ງເກີດຂຶ້ນປານດອກເຫັດ, ມີບ່ອນປິ່ນປົວຫລາຍເທົ່າໃດກໍປາກົດວ່າຄົນເຈັບຄົນເປັນແມ່ນມີຫລາຍຂຶ້ນຊັກໄຊ້, ຖ້າພວກເຮົາຫາກໄປເຫັນຕົວຈິງໃນໂຮງໝໍແຕ່ລະບ່ອນສ່ວນຫລາຍມີແຕ່ຜູ້ເຖົ້າກັບເດັກນ້ອຍ. ສ່ວນວ່າພະຍາດທີ່ມັກເກີດກັບພວກຄົນອາຍຸສູງກໍແມ່ນເບົາຫວານ, ເປັນປະດົງ, ເສັ້ນປະສາດກິນບໍ່ແຊບນອນບໍ່ຫລັບ.ນອກຈາກນັ້ນ, ສໍາລັບເດັກນ້ອຍກໍມັກເປັນພະຍາດຕາມລະດູການເຊັ່ນໄລຍະນີ້ລະດູຝົນເດັກນ້ອຍມັກເປັນໄຂ້ເລືອດອອກດັ່ງມີແຫລ່ງຂ່າວວ່າໃນປັດຈຸບັນທົ່ວປະເທດເຮົາມີຄົນຕິດເຊື້ອໄຂ້ເລືອດອອກຫລາຍກວ່າ 5 ພັນຄົນ ແລະ ມີຜູ້ເສຍຊີວິດໄປແລ້ວ 7 ຄົນ. ນອກຈາກທີ່ກ່າວມານີ້ ກໍອາດຈະມີຜູ້ເຈັບເປັນຍ້ອນພະຍາດຫລາຍຊະນິດທີ່ເກີດຂຶ້ນແຕ່ລະໄລຍະ ໂດຍສະເພາະໃນຂັ້ນຕໍ່ໄປນີ້ຖ້າພວກເຮົາບໍ່ມີແຜນປ້ອງກັນສະກັດກັ້ນໄວ້ກ່ອນແມ່ນອາດເກີດພະຍາດຕາແດງ,ຖອກທ້ອງ ແລະ ອະຫິວາ ເພາະວ່າໃນຫລາຍທ້ອງຖິ່ນປະສົບກັບບັນຫາໄພນ້ຳຖ້ວມ.
ເຖິງຢ່າງໃດກໍດີ, ຕາມທິດກໍ່າຄິດໃນກໍລະນີການເຈັບການເປັນແຕ່ລະພະຍາດທີ່ມັນເກີດຂຶ້ນກັບຕົວເຮົາແມ່ນບໍ່ມີໃຜສາມາດ ຫລີກເວັ້ນ ຫລື ປັດສະຈາກໂຮງໝໍໄດ້ ເພາະໂຮງໝໍເປັນສູນປິ່ນປົວຄົນ ແລະ ເປັນທີ່ເພິ່ງຂອງຄົນເຈັບ. ແຕ່ສິ່ງສໍາຄັນຕາມເຮົາວ່າທຸກຄົນທີ່ໄປປິ່ນປົວຢູ່ໂຮງໝໍກໍຕ້ອງໄດ້ເສຍເງິນຕາມກໍລະນີໜັກ ຫລື ເບົາ. ເມື່ອເປັນດັ່ງວ່ານີ້ການບໍລິການປິ່ນປົວຮັບໃຊ້ປະຊາ ຊົນທຸກຢ່າງກໍຕ້ອງຫ້າວຫັນ, ຈິງຈັງຈິງໃຈ ແລະ ບໍ່ຮູ້ອິດຮູ້ເມື່ອຍຂອງແພດໝໍ. ໃນຜ່ານມາທິດກໍ່າເຄີຍໄດ້ຍິນ ແລະ ເຄີຍເຫັນຄົນລາວຜູ້ເພິ່ນມີເງິນ, ມີຖານະດີແດ່ມັກເຫີ່ໄປປິ່ນປົວຢູ່ປະເທດເພື່ອນບ້ານ. ທີ່ຈິງແລ້ວຖ້າຈະປຽບທຽບທາງດ້ານເຕັກນິກວິຊາການແລ້ວກໍບໍ່ຫລຸດລື່ນກັນພໍເທົ່າໃດ, ຕ່າງແຕ່ວ່າຈັນຍາບັນລະຫວ່າງພວກເພິ່ນກັບເຮົາເທົ່ານັ້ນ.
ຕາມທິດກໍ່າຄິດ, ຖ້າຫາກບ້ານເຮົາມີການປັບປຸງການບໍລິການປິ່ນປົວຢູ່ບັນດາໂຮງໝໍຂອງລັດໃຫ້ດີທຽບເທົ່າ ຫລື ລື່ນເອກະຊົນ ຄົນເຮົາກໍຈະພາກັນຫລັ່ງໄຫລໄປປິ່ນປົວຕາມໂຮງໝໍລັດຫລາຍຂຶ້ນ ຍ້ອນວ່າໃນປັດຈຸບັນ ຖ້າຈະເວົ້າເຖິງຄວາມເປັນມາດຕະ ຖານແລ້ວກໍເຫັນວ່າພວກເຮົານັບມື້ມີການປັບປັບປຸງໃຫ້ດີຂຶ້ນເລື້ອຍໆ ດັ່ງໂຮງໝໍມະໂຫສົດ ແລະ ໂຮງໝໍມິດຕະພາບໃນປັດຈຸ ບັນ. ເມື່ອເຖິງເວລານັ້ນລະ ເງິນທຸກກີບທຸກອັດມັນກໍຈະບໍ່ຮົ່ວໄຫລໄປຕ່າງປະເທດ ແລະ ເມື່ອເຖິງເວລານັ້ນລາຍຮັບຈາກການບໍລິ ການປິ່ນປົວກໍຈະໄດ້ເງິນເຕັມກະເປົາປ່ານຄືບ້ານເຂົາ.
