ລັດຖະບານຈີນ ສະໜອງທຶນໃຫ້ລັດຖະບານລາວກໍ່ສ້າງສູນໄອຊີທີ

ວັນທີ 11 ມີນານີ້, ທ່ານ ປະດັບໄຊ ໄຊຍະໂຄດ ຮອງຫົວໜ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະ ທ່ານນາງ ປາລິດາ(LI YAN) ຕາງໜ້າກຸ່ມບໍລິສັດກໍ່ສ້າງທາງລົດໄຟຈີນຈໍາກັດ ໄດ້ຮ່ວມລົງນາມກໍ່ສ້າງສູນຝຶກອົບຮົມດ້ານໄອຊີທີ ເພື່ອຍົກລະດັບສະຖາບັນເຕັກໂນໂລຊີການສື່ສານຂໍ້ມູນຂ່າວສານ ຫລັງລັດຖະບານຕີນ ສະໜອງທຶນໃຫ້. ຂະນະທີ່ທ່ານ ປະດັບໄຊ ໄຊຍະໂຄດ ກ່າວວ່າ: ໂຄງການນີ້ຈະຊ່ວຍຍົກລະດັບສະຖາບັນເຕັກໂນໂລຊີການສື່ສານຂໍ້ມູນຂ່າວສານໃຫ້ກາຍເປັນສະຖາບັນສ້າງ ແລະພັດທະ ນາບຸກຄະລາກອນໃນຂະແໜງເຕັກໂນໂລຊີ ແລະ ການສື່ສານ ເພື່ອຕອບສະໜອງໃຫ້ແກ່ແຜນພັດທະນາເສດຖະກິດດິຈິຕອນແຫ່ງຊາດຂອງສປປ ລາວ.

ສູນດັ່ງກ່າວເປັນອາຄານ 5 ຊັ້ນ 1 ຫລັງກວມເອົາເນື້ອທີ່ 5.500 ກວ່າຕາແມັດ, ປະກອບມີຫ້ອງຮຽນທຳມະດາ, ຫ້ອງຮຽນທັນສະໄໝ, ຫ້ອງທົດລອງ, ຫ້ອງການ, ຫ້ອງສະໝຸດ, ຫ້ອງປະຊຸມ… ລວມທັງມີອຸປະ ກອນການຮຽນ-ການສອນທີ່ຈຳເປັນ, ການສົ່ງຜູ້ບໍລິຫານ, ຄູອາຈານ ແລະ ນັກສຶກສາຈໍານວນໜຶ່ງຮ່ວມຝຶກອົບຮົມທີ່ ສປ ຈີນ ເພື່ອກຽມພ້ອມຮອງຮັບການເປີດສູນ.

ສະຖາບັນອອກແບບວິສະວະກໍາເອເລັກໂຕຣນິກສປ ຈີນ ໄດ້ສຶກສາຄວາມເປັນໄປໄດ້ໂຄງການນີ້ເມື່ອກາງປີ 2019 ແລະ ມອບໃຫ້ກຸ່ມບໍລິສັດກໍ່ສ້າງທາງລົດໄຟແຫ່ງປະເທດຈີນຈໍາກັດ ກໍ່ສ້າງພາຍໃນ 20 ເດືອນ ເລີ່ມທ້າຍເດືອນມີນາ 2022 ຫາ ທ້າຍເດືອນພະຈິກ 2023.