ແຂວງຈຳປາສັກເຮັດແທ້! ປັບໃໝປໍ້ານໍ້າມັນ 10 ປໍ້າທີ່ປິດບໍລິການມື້ແຈ້ງການປັບຂຶ້ນລາຄານໍ້າມັນ

ໜັງສືພິມຈຳປາສັກໃໝ່ ແຂວງຈຳປາສັກລາຍງານວັນທີ 11 ມີນາ 2022 ນີ້ວ່າ: ພາຍຫຼັງປໍ້ານໍ້າມັນຫຼາຍປໍ້າໃນນະຄອນປາກເຊ ປິດບໍລິການໃນວັນທີ 9 ມີນາ 2022, ເຈົ້າໜ້າທີ່ກວດກາການຄ້າ ພະແນກອຸດສາຫະກຳ ແລະ ການຄ້າແຂວງ ໄດ້ສົມທົບກັບເຈົ້າໜ້າທີ່ກ່ຽວຂ້ອງນະຄອນປາກເຊ ໄດ້ເຮັດບົດບັນທຶກປັບໃໝຕາມລະບຽບການ ພາຍຫຼັງໄດ້ຮັບການຢັ້ງຢືນຈາກບໍລິສັດແມ່ ວ່າ ໄດ້ຈ່າຍໝົດແລ້ວ ແຕ່ລູກປໍ້າກັກຕຸນເອງ.

ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະ ການຄ້າແຂວງຈຳປາສັກ ໃຫ້ສໍາພາດໃນວັນທີ 10 ມີນາ 2022 ວ່າ: ໃນນະຄອນປາກເຊ ມີປໍ້ານໍ້າມັນເຊື້ອໄຟ 26 ປ້ໍ້າ, ໃນນີ້ຢຸດບໍລິການຖາວອນ 4 ປ້ໍາ. ຂະນະທີ່ມາຮອດວັນທີ 9 ມີນາ 2022, ມີ 12 ປໍ້າເປີດບໍລິການ, 10 ປໍ້າປິດບໍລິການ ປະກອບມີປໍ້ານໍ້າມັນ

– PV OIL ບ້ານຄັນເກີງ;
– ປ້ຳນ້ຳມັນເຊື້ອໄຟ ບ້ານສະພານໄຊ;
– ປ້ໍານໍ້າອຸດົມສະຫວັນ ບ້ານໂພນສະຫວັນ;
– ປໍ້ານໍ້າມັນ ສີປະເສີດ(ນໍ້າມັນເຊື້ອໄຟລ້ານຊ້າງ) ບ້ານຂອງຂະຍອມ;
– ປໍ້ານໍ້າມັນຂັນປະ ເສີດ(ນໍ້າມັນເຊື້ອໄຟລ້ານຊ້າງ)ບ້ານຫ້ວຍເລົາ;
– ປ້ໍານ້ໍາມັນປະດິດ (ນໍ້າມັນເຊື້ອໄຟລາວ) ບ້ານດົງເກາະໂລງ;
– ປໍ້ານໍ້າມັນ ເປໂຕຣລາວ ບ້ານຫວ້ຍຍາງຄໍາ;
– ປ້ໍານ້ໍາມັນວຽງປະເທດ(ນໍ້າມັນເຊື້ອໄຟລາວ)ບ້ານສະໜາມໄຊ;
– ປ້ໍາອ່ອນຄໍາ (ນໍ້າມັນເຊື້ອໄຟລາວ) ບ້ານສາງນໍ້າມັນ
– ປ້ໍານໍ້າມັນດາຟີ(ບໍລິສັດດາຟີ) ບ້ານກາງ.

ໂດຍປໍ້ານໍ້າມັນເຫົລ່ານີ້ໄດ້ປິດບໍລິການຊົ່ວຄາວ ແລະ ປິດປໍ້າເອງທັງທີ່ມີນໍ້າມັນຢູ່ ເຊິ່ງບັນດາບໍລິສັດແມ່ໄດ້ຕອບສະໜອງໃຫ້ປົກກະຕິ. ຂະນະທີ່ທີ່ເຈົ້າໜ້າທີ່ລົງກວດກາ, ເຈົ້າຂອງປໍ້າໄດ້ປິດປະຕູ ເຮັດໃຫ້ບໍ່ສາມາດສ້າງບົດບັນທຶກກັບຜູ້ປະກອບການໄດ້. ນອກນີ້ບັນດາປ້ຳນ້ຳມັນເຊື້ອໄຟທີ່ປິດ ບາງປໍ້າສວຍໂອກາດກັກຕຸນ ນໍ້າມັນ ເນື່ອງຈາກວ່າໄດ້ຮັບຂໍ້ມູນລາຄານໍ້າມັນເຊື້ອໄຟເໜັງຕີງກໍຄືຂຶ້ນນລາຄາເພື່ອລໍຖ້າຈຳໜ່າຍໃນລາຄາໃໝ່.

ຫົວໜ້າພະແນກອຸດສາຫະກໍາ ແລະ ການຄ້າແຂວງຈຳປາສັກ ກ່າວຕື່ມວ່າ: ຖ້າຜູ້ດໍາເນີນທຸລະກິດນໍ້າມັນເຊື້ອໄຟ ກ່ອນຈະປິດປໍ້າຊົ່ວຄາວ ຫຼື ຖາວອນໂດຍບໍ່ມີເຫດຜົນ ຫຼື ບໍ່ແຈ້ງໃຫ້ຫ້ອງການອຸດສາຫະກໍາ ແລະ ການຄ້າເມືອງ, ເທສະບານ, ນະຄອນ ແລະ ຜູ້ຊົມໃຊ້ ຊາບກ່ອນ 3 ວັນ ຈະຖືກປັບໃໝຕາມມາດຕາ 82 ຂໍ້ ຄ, ຂໍ້ 3 ຂອງດໍາລັດວ່າດ້ວຍທຸລະກິດນໍ້າມັນເຊື້ອໄຟ ເລກທີ 331/ນຍ, ລົງວັນທີ 27/10/2017.