ກອງປະຊຸມ ສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ 06 ແຂວງ ປະຈໍາປີ 2021

ວັນທີ 10 ມີນາ 2021, ກົມງົບປະມານແຫ່ງລັດ ໄດ້ຈັດກອງປະຊຸມລາຍງານຂາດຕົວປີ 2021 ພ້ອມທັງມີການເຜີຍແຜ່ເອກະສານສຳຄັນກ່ຽວກັບວຽກງານງົບປະມານ ໂດຍການເປັນປະທານຂອງທ່ານ ພູວົງ ກິດຕະວົງ ກໍາມະການຄະນະພັກ, ຫົວໜ້າກົມງົບປະມານແຫ່ງລັດ ກະຊວງການເງິນ, ມີຕາງໜ້າຂະແໜງງົບປະມານຈາກ 6 ແຂວງຄື: ແຂວງ ຈຳປາສັກ, ສະຫວັນນະເຂດ, ຄຳມ່ວນ, ຫຼວງນໍ້າທາ, ແຂວງວຽງຈັນ ແລະ ແຂວງ ອຸດົມໄຊ ພ້ອມດ້ວຍພະແນກການກ່ຽວຂ້ອງພາຍໃນກົມເຂົ້າຮ່ວມ.

ໂອກາດດັ່ງກ່າວ, ທ່ານ ພູວົງ ກິດຕະວົງ ໃຫ້ຮູ້ວ່າ: ກອງປະຊຸມດັ່ງກ່າວ ເພື່ອສະຫຼຸບຕີລາຄາການຈັດຕັ້ງປະຕິບັດການໄລ່ລຽງງົບປະມານຂາດຕົວປະຈຳປີ 2021 ອີກທັງເພື່ອເປັນການແລກປ່ຽນຄຳຄິດເຫັນເຊິ່ງກັນ ແລະ ກັນ ຕໍ່ບາງບັນຫາທີ່ຈະຕ້ອງສືບຕໍ່ແກ້ໄຂ ໂດຍທ່ານໄດ້ເນັ້ນໃຫ້ຜູ້ເຂົ້າຮ່ວມກອງປະຊຸມສະເໜີ ແລະ ຍົກໃຫ້ເຫັນເຖິງບັນຫາຂໍ້ສະດວກ ແລະ ຂໍ້ຫຍຸ້ງຍາກ ທີ່ຕິດພັນກັບການຈັດຕັ້ງປະຕິບັດແຜນງົບປະມານແຫ່ງລັດ ໃຫ້ມີຄວາມຮັດກຸມຖືກຕ້ອງສອດຄ່ອງ ກໍຄືແທດເໝາະກັບແຕ່ລະແຂວງ ເພື່ອໃຫ້ວຽກງານງົບປະມານແຫ່ງລັດ ມີຄວາມເປັນເອກະພາບໃນຂອບເຂດທົ່ວປະເທດ ໃຫ້ໄປຕາມເນື້ອໃນຈິດໃຈທີ່ຄະນະພັກກະຊວງການເງິນວາງອອກ ຢ່າງເປັນຮູບປະທຳ.

ກອງປະຊຸມຍັງໄດ້ຮັບຟັງການເຜີຍແຜ່ ພາລະບົດບາດວ່າດ້ວຍການແຕ່ງຕັ້ງ ແລະ ການເຄື່ອນໄຫວຂອງກົມງົບປະມານແຫ່ງລັດ ສະບັບເລກທີ 6254/ກງ, ລົງວັນທີ 17 ທັນວາ 2021; ແນະນຳບາງເນື້ອໃນກ່ຽວກັບບາງມາດຕາຂອງກົດໝາຍວ່າດ້ວຍງົບປະມານແຫ່ງລັດ; ການຄຸ້ມຄອງລາຍຮັບ-ລາຍຈ່າຍຂອງຫົວໜ່ວຍບໍລິຫານວິຊາການກຸ້ມຕົ້ນເອງດ້ານງົບປະມານ; ນິຕິກຳວ່າດ້ວຍການກວດກາຫຼັງການຈ່າຍງົບປະມານແຫ່ງລັດ ແລະ ຍັງມີການແນະນຳບາງເນື້ອໃນ ກ່ຽວກັບຮ່າງດຳລັດວ່າດ້ວຍການສ້າງແຜນງົບປະມານແຫ່ງລັດ. ພ້ອມທັງລາຍງານ ສະພາບການຈັດຕັ້ງປະຕິບັດ ກ່ຽວກັບວຽກງານງົບປະມານແຫ່ງລັດ ຂອງແຕ່ລະແຂວງ ແລະ ສະເໜີ, ແລກປ່ຽນຄໍາຄິດເຫັນ ເພື່ອແກ້ໄຂບາງບັນຫາທີ່ຍັງມີຄວາມຫຍຸ້ງຍາກ ໃນການຈັດຕັ້ງປະຕິບັດວຽກງານຕົວຈິງ, ເປັນຕົ້ນແມ່ນວຽກງານກວດກາຫຼັງຈ່າຍ, ການແບ່ງຄວາມຮັບຜິດຊອບລະຫວ່າງແຂວງ, ເມືອງ ແລະ ບ້ານ ພ້ອມທັງວິທີການນຳໃຊ້ລະບົບເຄືອຄ່າຍ GFIS ໃນການອະນຸມັດ ລະຫວ່າງ ພະແນກການອ້ອມຂ້າງແຂວງ ແລະ ເມືອງ.