ສປປ ລາວ ສຶກສາຄວາມເປັນໄປໄດ້ໃນການສ້າງທາງດ່ວນ 6 ເສັ້ນ

ທ່ານ ລັນ ແສງອາພອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ລາຍງານຜົນການຈັດຕັ້ງປະຕິບັດວຽກງານ 3 ປີຜ່ານມາ( 2019-2021) ໃນກອງປະຊຸມ ສະຫລຸບຜົນງານ ແລະ ທິດທາງແຜນການປະຈຳປີ ໃນລະຫວ່າງວັນທີ 24-25 ກຸມພາ 2022 ຜ່ານມານີ້ວ່າ: ການສ້າງທາງດ່ວນເພີ່ມພາຍໃນປະເທດເພື່ອສ້າງລະບົບໂລຈິດສະຕິກໃຫ້ສົມບູນ ແລະ ເພື່ອການເຊື່ອມໂຍງ ເຊື່ອມຈອດກັບພາກພື້ນ ແລະ ສາກົນ.

ທ່ານ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ລາຍງານລະອຽດວ່າ: ຜ່ານມາໄດ້ເອົາໃຈໃສ່ຍົກລະດັບເສັ້ນທາງຫລວງແຫ່ງຊາດຫລາຍເສັ້ນ ເປັນຕົ້ນທາງຫລວງແຫ່ງຊາດເລກ 9 ຕອນທາງແຕ່ເທສະບານນະຄອນໄກສອນ ພົມວິຫານ ຫາ ເຊໂນ ຊາຍແດນ ລາວ-ຫວຽດນາມ, ທາງຫລວງແຫ່ງຊາດເລກ 13 ເໜືອ ແຕ່ສີເກີດ-ໂພນໂຮງ ເຊິ່ງຄືບໜ້າກວ່າ 54,6% ແລະ ທາງເລກ 13 ໃຕ້ ກິໂລແມັດທີ 71 ຫາ ກິໂລແມັດ 346 ຄືບໜ້າ 3,8%. ຂະນະດຽວກັນກໍສຳເລັດການສຶກສາຄວາມເປັນໄປໄດ້ຍົກລະດັບທາງຫລວງແຫ່ງຊາດເລກ 8 ແລະ ເລກ 12. ສ່ວນ 6 ເສັ້ນທາງດ່ວນທີ່ຢູ່ໃນໄລຍະສຶກສາຄວາມເປັນໄປໄດ້ເພື່ອການກໍ່ສ້າງນັ້ນປະກອບມີ:

1. ເສັ້ນທາງດ່ວນແຕ່ບໍ່ເຕັນແຂວງຫລວງນໍ້າທາ ຫາ ຫ້ວຍຊາຍແຂວງບໍ່ແກ້ວ,
2. ເສັ້ນທາງດ່ວນນະຄອນຫລວງວຽງຈັນ-ປາກເຊ ໄລຍະ 1, 2, 3 ແລະ 4. ຂະນະທີ່ໄລຍະທີ 5 ໄດ້ຍົກເລີກ MOU ແລ້ວ ເນື່ອງຈາກຜູ້ສໍາປະທານບໍ່ປະຕິບັດຕາມກົດໝາຍລາວ,
3. ເສັ້ນທາງດ່ວນ(ແລວໃໝ່)ຂະໜານເສັ້ນທາງເລກທີ 12 ແຕ່ຂົວມິດຕະພາບລາວ-ໄທແຫ່ງທີ 3 ເມືອງທ່າແຂກ ຫາ ຊາຍແດນ ລາວ-ຫວຽດນາມ,
4. ທາງດ່ວນແຕ່ທ່າງ່ອນເມືອງໄຊທານີ ນວ ຫາ ບ້ານນາຊ່າງເຫລັກ ເມືອງທຸລະຄົມ
5. ທາງດ່ວນແຕ່ປາກຊັນ ຫາ ຊາຍແດນລາວ-ຫວຽດນາມ ເມືອງໄຊຈຳພອນແຂວງບໍລິຄຳໄຊ.
6. ເສັ້ນທາງດ່ວນນະຄອນຫລງວຽງຈັນ-ບໍ່ເຕັນແຂວງຫລວງນໍ້າທາ ໄດ້ສຳເລັດການກໍ່ສ້າງໄລຍະທີ 1 ຕອນທາງນະຄອນຫລວງວຽງຈັນ-ວັງວຽງ ຍາວກວ່າ 109 ກິໂລແມັດ.