‘‘ ຍິ່ງໃຫຍ່ຕະຫລອດການ ’’ ໄທເກີ ວູດ ໄດ້ຮັບເລືອກເຂົ້າຫໍກຽດຕິຍົດກ໊ອຟໂລກ

ໄທເກີ ວູດ ນັກກ໊ອຟຄົນດັງອະດີດມື 1 ຂອງໂລກ ໄດ້ຮັບການບັນລຸເຂົ້າສູ່ຫໍກຽດຕິຍົດກ໊ອຟໂລກ ຫລັງສ້າງຜົນງານເກ່ັງໃນວົງການມາຍາວນານ ໂດຍສະເພາະການຄວ້າແຊ໊ມເມເຈີ ເຖິງ 15 ຄັ້ງ.

ໄທເກີ ວູດ ນັກກ໊ອຟອະດີດມື 1 ຂອງໂລກຊາວອາເມລິກາ ໄດ້ຮັບການບັນຈຸຊື່ເຂົ້າສູ່ຫໍກຽດຕິຍົດກ໊ອຟໂລກ ໂດຍພິທີຖືກຈັດຂຶ້ນຢູ່ສຳນັກງານໃຫຍ່ຂອງພີຈີເອທົວ ຣັດຟລໍຣີດາ ເມື່ອວັນທີ 9 ມີນາຜ່ານມາ.

ສຳລັບ ວູດ ຄວ້າແຊ໊ມພີຈີເອໄປແລ້ວ 82 ລາຍການ ເປັນສະຖິຕິສູງສຸດທຽບເທົ່າ ແຊມ ສະນິດ ຕຳນານນັກກ໊ອຟ ອາເມຣິກາຜູ້ລ່ວງລັບ ແລະ ໄດ້ແຊ໊ມລາຍການເມເຈີໄປແລ້ວ 15 ຄັ້ງ ຫລາຍສຸດເປັນອັນດັບ 2 ເປັນຮອງພຽງ ແຈັກ ນິຄລອສ ອະດີດນັກກ໊ອຟຊາວອາເມຣິກາອີກຄົນ ທີ່ເຮັດໄວ້ 18 ຄັ້ງ.

ແນວໃດກໍຕາມ ວູດ ກໍຕ້ອງປະເຊີນກັບມໍລະສຸມຊີວິດມາຫລາຍ ທັງບັນຫາອາການບາດເຈັບ ແລະ ບັນຫາຊີວິດສ່ວນຕົວ ຫລ້າສຸດປະສົບອຸບັດຕິເຫດທາງລົດ ເມື່ອປີ 2021 ເຮັດໃຫ້ບາດເຈັບຮຸນແຮງ ເຖິງຕອນນີ້ຍັງປິ່ນປົວບໍ່ຫາຍຂາດ.

ວູດ ອາຍຸ 46 ປີ ກ່າວວ່າ : ‘‘ ຂ້ອຍບໍ່ໄດ້ມາເຖິງຈຸດນີ້ພຽງລຳພັງ ຂ້ອຍມີພໍ່ແມ່, ຜູ້ໃຫ້ຄຳແນະນຳ ແລະ ຫມູ່ຄູ່ທີ່ຮັກແພງ ພວກເຂົາສະໜັບສະໜູນຂ້ອຍໃນເວລາຕົກຕ່ຳທີ່ສຸດ ແລະ ຮ່ວມຍິນດີໃນເວລາທີ່ຮຸ່ງເຮືອງທີ່ສຸດ ນີ້ຈຶ່ງຖືເປັນລາງວັນຂອງທີມ ’’.