ມຽນມາສ້າງມູນຄ່າເພີ່ມ “ແກບ-ຮຳເຂົ້າ” ຜະລິດໄຟຟ້າ-ນ້ຳມັນປຸງແຕ່ງອາຫານ

ວັນທີ 9 ມີນາ 2022, ສຳນັກຂ່າວຊິນຮົວລາຍງານວ່າ: ສື່ທາງການມຽນມາລາຍງານວ່າ: ສະຫະພັນເຂົ້າມຽນມາ (MRF) ກຳລັງດຳເນີນງານກ່ຽວກັບການຜະລິດສິນຄ້າທີ່ມີມູນຄ່າເພີ່ມຈາກແກບ ແລະ ຮຳເຂົ້າ.

ສະຫະພັນເຂົ້າມຽນມາ ລະບຸວ່າ: ໂຄງການຜະລິດສິນຄ້າທີ່ມີມູນຄ່າເພີ່ມຈາກຜົນໄດ້ຮັບຂອງເຂົ້າຈະດຳເນີນງານຮ່ວມກັບເຈົ້າຂອງໂຮງສີເຂົ້າ ໂດຍສະຫະພັນເຂົ້າມຽນມາຈະໃຊ້ແກບຊ່ວຍຜະລິດໄຟຟ້າ ແລະ ຮຳເຂົ້າຜະລິດນ້ຳມັນຮຳເຂົ້າ.

ໂຄງການດັ່ງກ່າວຈະເປັນປະໂຫຍດຕໍ່ຂະແໜງອຸດສາຫະກຳຕ່າງໆ ຄວບຄຸມທຸລະກິດນ້ຳມັນສຳລັບການບໍລິໂພກ, ການຜະລິດພະລັງງານໝູນວຽນ ແລະ ການຜະລິດອາຫານສັດ.

ມຽນມາ ອະກຣີບິສິເນສ ພັບບິກ ຄໍເປີເຣຊັນ (Myanmar Agribusiness Public Corporation) ໄດ້ດຳເນີນໂຄງການຕົວແບບຜະລິດພະລັງງານດ້ວຍແກບໃນສອງເມືອງທ້ອງຖິ່ນ.

ຂະນະດຽວກັນ ມີການດຳເນີນໂຄງການຕົວແບບຜະລິດນ້ຳມັນຮຳເຂົ້າດ້ວຍເຕັກໂນໂລຊີການສະກັດດ້ວຍຕົວທຳລະລາຍ ແລະ ການກັ່ນດ້ວຍວິທີການທາງກາຍະພາບ.

ສະຫະພັນເຂົ້າມຽນມາ ລະບຸວ່າ: ມູນຄ່າການຜະລິດແຕ່ລະປີຂອງອຸດສາຫະກຳເຂົ້າສູງປະມານ 3,94 ພັນລ້ານໂດລາສະຫະລັດ ໂດຍສະຫະພັນເຂົ້າມຽນມາເດີນໜ້າເພີ່ມມູນຄ່າສິນຄ້າໃນປະເທດ ລວມທັງການລົງທຶນ ແລະ ການຄ້າ.

ທັງນີ້, ການຜະລິດ ແລະ ການສ້າງພາຍໃນປະເທດດັ່ງກ່າວຈະຊ່ວຍສະໜັບສະໜູນການດຳເນີນງານຕາມຈຸດປະສົງທາງເສດຖະກິດຂອງປະເທດ.