ລາວ ກຽມພັດທະນາລະບົບຄໍ້າປະກັນສິນເຊື່ອ ໜູນວິສາຫະກິດ ນ້ອຍ-ກາງ

ວັນທີ 7 ມີນາ 2022 ທີ່ນະຄອນຫລວງວຽງຈັນ, ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະ ຊວງອຸດສາຫະກໍາ ແລະ ການຄ້າ ກ່າວຜ່ານລະບົບທາງໄກ ໃນກອງປະຊຸມປຶກສາຫາລືການພັດທະນາລະ ບົບການຄໍ້າປະກັນສິນເຊື່ອ ເພື່ອຮັບມືກັບຜົນກະທົບ ແລະ ຟື້ນຟູຫລັງການລະບາດຂອງພະຍາດໂຄວິດ-19 ວ່າ:

ຫົວໜ່ວຍທຸລະກິດຂະໜາດຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ(ຈວນກ) ເປັນກໍາລັງຫລັກ ແລະ ເປັນກົນໄກທີ່ສຳຄັນໃນການຂັບເຄື່ອນລະບົບເສດຖະກິດ, ເປັນຜູ້ສ້າງແຫລ່ງລາຍຮັບໃຫ້ແກ່ລັດຖະບານ, ສ້າງວຽກເຮັດງານທໍາຈໍານວນຫລາຍໃນສັງຄົມ ຖືວ່າມີບົດບາດທີ່ສຳຄັນຕໍ່ການພັດ ທະນາເສດຖະກິດຂອງຊາດ. ແນວໃດກໍຕາມ, ຫົວໜ່ວຍທຸລະກິດເຫລົ່ານີ້ໄດ້ຜະເຊີນຄວາມທ້າທາຍຫລາຍຢ່າງໃນການພັດທະນາທຸລະກິດຂອງຕົນ ໜຶ່ງໃນນັ້ນແມ່ນການເຂົ້າເຖິງແຫລ່ງທຶນ ຍ້ອນບໍ່ສາມາດປະຕິບັດຕາມເງື່ອນໄຂຂອງບັນດາທະນາຄານ ແລະ ສະຖາບັນການເງິນໄດ້ໂດຍສະເພາະການຂາດຫລັກຊັບຄໍ້າປະ ກັນ.

ທ່ານ ບຸນເຖິງ ກ່າວຕື່ມວ່າ: ຍ້ອນເຫັນໄດ້ເຖິງຄວາມສຳຄັນຂອງການຄໍ້າປະກັນສິນເຊື່ອ, ລັດຖະບານກໍຄື ກະຊວງອຸດສາຫະກໍາ ແລະ ການຄ້າ ຈຶ່ງມີແຜນການແຕ່ງຕັ້ງຄະນະຮັບຜິດຊອບເພື່ອຄົ້ນຄວ້າ ແລະ ພັດ ທະນາລະບົບຄໍ້າປະກັນສິນເຊື່ອຂອງ ສປປ ລາວ ໂດຍມີຜູ້ຕາງໜ້າຈາກຫລາຍພາກສ່ວນເພື່ອຮ່ວມກັນຄົ້ນ ຄວ້າສ້າງກົນໄກຄໍ້າປະກັນສິນເຊື່ອ, ນິຕິກໍາ, ຄູ່ມືແນະນໍາການຕິດຕາມຄຸ້ມຄອງ ແລະ ຕິດຕາມການຈັດຕັ້ງປະຕິບັດ ໃຫ້ໄດ້ຮັບຜົນສໍາເລັດໃນອະນາຄົດອັນໃກ້ນີ້.

ກົມສົ່ງເສີມ ວິສາຫະກິດຂະໜາດນ້ອຍ ແລະ ກາງກໍຄືຄະນະຮັບຜິດຊອບການພັດທະນາລະບົບຄໍ້າປະກັນສິນເຊື່ອ ຈະສືບຕໍ່ນໍາເອົາຜົນກອງປະຊຸມນີ້ໄປຜັນຂະຫຍາຍໂດຍການພັດທະນາລະບົບການຄໍ້າປະກັນສິນເຊື່ອໃຫ້ໄດ້ຮັບໝາກຜົນສູງສຸດ ເພື່ອຊ່ວຍເຫລືອ ແລະ ສະໜັບສະໜູນບັນດາວິສາຫະກິດໃຫ້ສາມາດເຂົ້າເຖິງແຫລ່ງທຶນໄດ້. ການພັດທະນາລະບົບການຄໍ້າປະກັນສິນເຊື່ອນີ້ໄດ້ຮັບການສະໜັບສະໜູນໂດຍໂຄງ ການເຂົ້າເຖິງແຫລ່ງທຶນຂອງຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ເພື່ອຮັບມືກັບຜົນກະທົບ ແລະ ຟື້ນຟູຈາກໂຄວິດ-19 (MSME A2F-ESR).