ຟີຟາ ຢືນຢັນ ຣັສເຊຍຕົກຮອບຄັດບານໂລກ ຕັດສິນໃຫ້ ໂປແລນ ເຂົ້າຮອບອັດຕະໂນມັດ

ສະພັນບານເຕະນາໆຊາດ ຫລື ຟີຟາ (FIFA)  ອອກຖະແຫລງການໃຫ້ທີມຊາດໂປແລນ ຜ່ານເຂົ້າສູ່ຮອບຊີງຊະນະເລີດການແຂ່ງຂັນບານເຕະໂລກ 2022 ຮອບຄັດເລືອກ ດ້ວຍການຊະນະທີມຊາດຣັສເຊຍ ຫລັງຈາກທີ່ຣັສເຊຍຍັງຄົງບຸກໂຈມຕີຢູເຄຣນຢ່າງຕໍ່ເນື່ອງ.

ກ່ອນຫນ້ານີ້ ຟີຟາ ແລະ ຢູຟາ ໄດ້ປະກາດຕັດທີມຊາດຣັສເຊຍ ແລະ ສະໂມສອນຈາກຣັສເຊຍ ຫ້າມລົງລົງແຂ່ງຂັນໃນທຸກລາຍການ ແລະ ທຸກລະດັບຊັ້ນ ຈົນຫລ້າສຸດ ຟີຟາ ກໍໄດ້ອອກມາຢືນຢັນວ່າການແຂ່ງຂັນຮອບຮອງຊະນະເລີດ ເພລອອບບານໂລກ 2022 ທີ່ຣັສເຊຍຈະພົບກັບໂປແລນ ໃນວັນທີ 29 ມີນານີ້ ຈະເປັນ ໂປແລນ ໄດ້ຊະນະ ຣັສເຊຍ ແບບອັດຕະໂນມັດ ຜ່ານເຂົ້າຮອບຊີງຊະນະເລີດໄປຖ້າພົບກັບຜູ້ຊະນະລະຫວ່າງ ສາທາລະນະລັດ ເຊັກ ກັບ ສະວີເດັນ ເພື່ອຊີງປີ້ໄປເຕະບານໂລກ 2022 ຮອບສຸດທ້າຍທີ່ປະເທດກາຕ້າຕໍ່ໄປ.

ນອກຈາກນີ້ ຟີຟາ ຍັງຢືນຢັນອີກວ່າ ໄດ້ເລື່ອນເກມເພລອອບຮອບຮອງຊະນະເລີດ ຄູ່ລະຫວ່າງ ຢູເຄຣນ ພົບ ສະກັອດແລນ ໃນວັນທີ 24 ມີນານີ້ ອອກໄປກ່ອນ (ຖ້າພິຈາລະນາເດືອນມິຖຸນາ) ສ່ວນຄູ່ລະຫວ່າງ ເວລ ກັບ ອອສເຕຣຍ ຈະແຂ່ງຂັນຕາມກຳນົດຄືວັນທີ 24 ມີນານີ້.