‘ເລວານດອຟສະກີີ’ ຍົກເລີກສັນຍາ ‘ຫົວເຫວີຍ’ ຫຼັງມີຂ່າວລືໃຫ້ຄວາມຊ່ວຍເຫຼືອລັດຖະບານຣັດເຊຍ

ໂຣເບີດ ເລວານດອຟສະກີ ຍອດດາວຍິງທີມຊາດໂປແລນ ຂອງ ບາເຢິນ ມິວນິກ ກອງໜ້າມະຫາອຳນາດບານເຕະຂອງ ບຸນເດສລີກາ ເຢຍລະມັນ ຕັດສິນໃຈຍົກເລີກສັນຍາເປັນພີເຊັນເຕີ ແລະ ການສະຫນັບສະຫນູນຈາກ “ຫົວເຫວີຍ” ບໍລິສັດເຕັກໂນໂລຢີທີ່ມີຊື່ສຽງຈາກສາທາລະນະລັດປະຊາຊົນຈີນແລ້ວ. ຫຼັງຈາກມີຂ່າວລືວ່າ ບໍລິສັດຍັກໃຫຍ່ຈາກແດນມັງກອນ ໃຫ້ຄວາມຊ່ວຍເຫຼືອລັດຖະບານລັດເຊຍ ທີ່​ກຳລັງ​ບຸກ​ໂຈມຕີ​ຢູ​ເຄຣນ​ໃນ​ເວລາ​ນີ້ ໂດຍການຊ່ວຍປ້ອງກັນການໂຈມຕີທາງໂລກອິນເຕີເນັດ

ດາວຍິງຂອງ “ເສືອໃຕ້” ເຊິ່ງກ່ອນໜ້ານີ້ເຄີຍສະແດງໃນການຄັດຄ້ານສົງຄາມຄັ້ງນີ້ຢ່າງຊັດເຈນມາໂດຍຕະຫຼອດນັ້ນ. ຫຼ້າສຸດໄດ້ເຊັນສັນຍາເປັນພີເຊັນເຕີໃຫ້ກັບ “ຫົວເຫວີຍ” ດ້ວຍສັນຍາ 3 ປີເມື່ອບໍ່ດົນມານີ້, ແນວໃດກໍຕາມ ເຈົ້າໂຕໄດ້ຕັດສິນໃຈຍົກເລີກສັນຍາດັງກ່າວ ນີ້ອາດຈະເຮັດໃຫ້ການສູນເສຍລາຍໄດ້ເຖິງ 5 ລ້ານເອີໂຣກັນເລີຍທີດຽວ. ໂດຍບໍລິສັດເທັກໂນໂລຍີຍັກໃຫຍ່ຈາກດິນແດນມັງກອນ ໄດ້ກ່າວໃນຖະແຫຼງການວ່າ: “ຫົວເຫວີຍ ໂປແລນ ມີຄວາມເສຍໃຈທີ່ພວກເຮົາຕ້ອງຢຸດຕິການຮ່ວມມືກັບ ໂຣເບີດ ເລວານດອຟສະກີ ລົງພຽງເທົ່ານີ້ ພວກເຮົາຂໍຂອບໃຈສໍາລັບການຮ່ວມມືທີ່ຜ່ານມາ ແລະ ຂໍໃຫ້ທ່ານໂຊກດີໃນອະນາຄົດ.”

ຕົວແທນສ່ວນຕົວຂອງ ໂຣເບີດ ເລວານດອຟສະກີ, ໂທມັສ ຊະວີສລັກ, ໄດ້ຢືນຢັນວ່າການຍົກເລີກສັນຍານັ້ນ ແມ່ນການຕັດສິນໃຈຂອງກອງຫນ້າທີມຊາດໂປແລນ ບໍ່ແມ່ນ ຫົວເຫວີຍ, ໂດຍກ່າວວ່າ “ນີ້ແມ່ນຄວາມຈິງ. ພວກເຮົາໄດ້ຕັດສິນໃຈຢຸດຕິການຮ່ວມມືດ້ານການຕະຫຼາດລະຫວ່າງ ໂຣເບີດ ເລວານດອຟສະກີ ແລະ ຍີ່ຫໍ້ ຫົວເຫວີຍ. ພວກເຮົາຈະບໍ່ມີສ່ວນຮ່ວມໃດໆໃນການສົ່ງເສີມຜະລິດຕະພັນຂອງພວກເຂົາອີກຕໍ່ໄປ.”