ການຈາກລາຄືຊ່ວງເວລາທີ່ເຮັດໃຫ້ເຮົາໄດ້ເຕີບໃຫຍ່

ຫຼາຍຄົນບອກວ່າ ໃຫຍ່ແລ້ວຕ້ອງຮຽນຮູ້ທີ່ຈະຈາກລາໃຫ້ໄດ້ ໂດຍເປັນການຈາກລາໃນແບບທີ່ບໍ່ເຫຼືອພື້ນທີ່ໃຫ້ກັບຄໍາວ່າ “ແລ້ວເຮົາຈະມາພົບກັນໃໝ່” ການຈາກລາທີ່ເໝືອນເປັນການຈາກລາຄັ້ງສຸດທ້າຍໃນຊີວິດ, ທຸກຄົນຄົງຮູ້ດີວ່າການຈາກລາເປັນເລື່ອງທີ່ຍອມຮັບ ແລະ ທຳໃຈໄດ້ຍາກ ຍິ່ງເຮົາຕິດຢູ່ໃນຄວາມສໍາພັນທີ່ສົ່ງຜົນຕໍ່ຄວາມຮູ້ສຶກຫຼາຍເທົ່າໃດ ຍິ່ງຈະທຳຮ້າຍຕົວເອງຫຼາຍເທົ່ານັ້ນ ແລະສົ່ງຜົນຕໍ່ສຸຂະພາບຈິດອີກດ້ວຍ.

ໂດຍທົ່ວໄປຄົນສ່ວນຫຼາຍບໍ່ກ້າທີ່ຈະອອກຈາກຄວາມສໍາພັນເຫຼົ່ານີ້ ເພາະເປັນສິ່ງທີ່ທໍາໃຈໄດ້ຍາກ ແຕ່ເຊື່ອບໍ່ວ່າຖ້າເຮົາອອກຈາກຄວາມສໍາພັນທີ່ບໍ່ດີເຫຼົ່ານັ້ນໄດ້ ເຮົາຈະພົບກັບໂລກໃໝ່ທີ່ດີກວ່າເກົ່າ.

Henry Wadsworth Longfellow (ນັກກະວີຄົນອາເມຣິກາ) ໄດ້ກ່າວໄວ້ວ່າ “ສິນລະປະແຫ່ງການເລີ່ມຕົ້ນນັ້ນຍິ່ງໃຫຍ່ ແຕ່ສິນລະປະແຫ່ງການສິ່ນສຸດຍິ່ງໃຫຍ່ກວ່າ”

ຄວາມຢ້ານກົວເຮັດໃຫ້ເຮົາບໍ່ກ້າທີ່ຈະຈາກລາ

ຖ້າເຮົາບໍ່ກ້າທີ່ຈະບອກລາ ສະແດງວ່າເຮົາທໍາຮ້າຍໂຕເອງຢູ່ ໂດຍການຍອມໃຫ້ໂຕເອງເຈັບປວດຈາກຄວາມຫວັງເພາະຄວາມຫວັງຄືສິ່ງສຸດທ້າຍທີ່ຄົນເຮົາຈະຍອມປ່ອຍມັນໄປ ເຊັ່ນການຮູ້ສຶກຫວັງວ່າມັນຕ້ອງດີ ຫວັງວ່າຈະບໍ່ເຈັບປວດ ຖ້າຫາກກຳລັງຮູ້ສຶກຫຼົງທາງຢູ່ໃນຄວາມຮູ້ສຶກນີ້ ໃຫ້ລອງຫາຍໃຈເຂົ້າເລິກໆ ແລະປ່ອຍວາງມັນໄປດີກວ່າ.

Kathrin Ritter ແລະ Vanessa Handsel ນັກຈິດຕະວິທະຍາມະຫາວິທະຍາໄລເທນເນສຊີ ກ່າວວ່າ “ຄົນເຮົາມັກຈະພະຍາຍາມດີ້ນຮົນເພື່ອຄິດຮອດຄວາມສໍາພັນທີ່ເຄີຍທຳຮ້າຍເຮົາ ເຖິງແມ້ວ່າມັນຈະເຮັດໃຫ້ເຮົາເສຍສັກສີ ແລະ ຫຼຸດຄຸນຄ່າໃນຕົວເຮົາລົງກໍຕາມ” ດັ່ງນັ້ນແລ້ວ ຄົນທີ່ຕິດຢູ່ໃນຄວາມສໍາພັນປະເພດນີ້ຍາກທີ່ຈະຮຽນຮູ້ ແລະບອກລາມັນໄດ້.

ຮຽນຮູ້ປ່ອຍວາງຈະໄດ້ບໍ່ເສຍເວລາ

ແມ່ນຢູ່ວ່າການບອກລາມັນຍາກ ແຕ່ເຮົາກໍຕ້ອງບອກລາເພື່ອບໍ່ໃຫ້ເຮົາເສຍເວລາກັບຄົນ ຫຼືຄວາມສໍາພັນທີ່ບໍ່ດີ ເຊິ່ງຄົນທີ່ເຮົາຄວນຈະບອກລາຕະຫຼອດໄປແບບບໍ່ມີມື້ທີ່ຈະມາພົບກັນອີກ ຄືຄົນທີ່ເຫັນແກ່ຕົວ ແລະ ເອົາປຽບເຮົາໃນທຸກດ້ານເຖິງແມ້ວ່າເຮົາຈະໃຫ້ມິດຕະພາບ ແລະ ໃຫ້ຄວາມໄວ້ວາງໃຈຫຼາຍເທົ່າໃດ ຄົນປະເພດນີ້ມັກຈະຢູ່ຂ້າງເຮົາພຽງແຕ່ມື້ນີ້ ແຕ່ມື້ອື່ນອາດຈະຖິ້ມເຮົາໄປແບບໜ້າຕາເສີຍ ຖ້າເຮົາສາມາດຮຽນຮູ້ທີ່ຈະບອກລາຄົນເຫຼົ່ານີ້ໄດ້ ກໍຈະດຶງດູດໃຫ້ເຮົາໄດ້ພົບແຕ່ຄົນດີໆ ສຸດທ້າຍກໍຈະພົບມິດຕະພາບທີ່ແທ້ຈິງ.

Albert Ellis ຜູ້ຊ່ຽວຊານດ້ານຄວາມຮູ້ຄວາມເຂົ້າໃຈບອກວ່າ “ທຸກຄົນມີພະລັງໃນການປ່ຽນແປງຕົນເອງເພື່ອໃຫ້ພົບກັບຄວາມສຸກ” ບາງເທື່ອເຮົາກໍຢ້ານຄວາມເຫງົາຈຶ່ງບໍ່ກ້າທີ່ຈະຈາກລາ ແຕ່ຄວາມເຫງົາຈະຊ່ວຍໃຫ້ເຮົາໄດ້ຮູ້ວ່າໃຜທີ່ຢູ່ຂ້າງເຮົາ ຖ້າເອົາແຕ່ຢ້ານທີ່ຈະເຫງົາ, ນອກຈາກຈະບໍ່ໄດ້ເຮັດໃຫ້ເຮົາພັດທະນາຂຶ້ນແລ້ວຍັງເຮັດໃຫ້ເຮົາຮູ້ສຶກບໍ່ດີຕື່ມຶີກ ລອງຄິດເບິ່ງວ່າຖ້າເຮົາຢູ່ໃນພື້ນທີ່ ທີ່ເຕັມໄປດ້ວຍຄົນຈໍານວນຫຼາຍ ແຕ່ຍັງຮູ້ສຶກໂດດດ່ຽວ ກໍຄົງບໍ່ແຕກຕ່າງຫຍັງກັບການຢູ່ຄົນດຽວ ເຖິງແມ່ນວ່າການຈາກລາຈະເຮັດໃຫ້ໝູ່ ຫຼື ສັງຄົມໜ້ອຍລົງກໍຕາມ ແຕ່ການປ່ຽນຕົວເອງນັ້ນງ່າຍກວ່າການປ່ຽນຄົນອື່ນ ແລະ ອີກສິ່ງໜຶ່ງທີ່ສໍາຄັນ ຄົນທີ່ເຂົ້າມາໃນຊີວິດປຽບເໝືອນຄົນໃນຄອບຄົວທີ່ເຮົາເລືອກເອງໄດ້ ຖ້າຄົນທີ່ເຂົ້າມາໃນຊີວິດເຮົາບໍ່ສາມາດທີ່ຈະເປັນພື້ນທີ່ປອດໄພໃຫ້ເຮົາໄດ້ກໍຄວນບອກລາ ເພື່ອຈະໄປພົບຄົນໃໝ່ທີ່ດີກວ່າ.

ສຸດທ້າຍນີ້ການຈາກລາເຖິງມັນຈະຍາກກໍຕາມ ແຕ່ຖ້າເຮົາບໍ່ລອງທີ່ຈະເຮັດເພື່ອໃຫ້ໂຕເອງຫຼຸດພົ້ນຈາກຄວາມຮູ້ສຶກ ແລະ ຄວາມຄິດເຫຼົ່ານັ້ນ ເຮົາຈະຫຼຸດພົ້ນຈາກຄວາມສໍາພັນນັ້ນໄດ້ແນວໃດ, ເວລາຂອງຄົນເຮົາມີຄ່າ ຢ່າເສຍມັນໄປກັບຄົນທີ່ບໍ່ຄູ່ຄວນ ຮຽນຮູ້ທີ່ຈະຈາກລາເພື່ອປົດປ່ອຍໂຕເອງອອກຈາກຄວາມສໍາພັນທີ່ເປັນບໍ່ດີ ແລ້ວຍ່າງອອກມາຈາກຈຸດນັ້ນ ຈຸດທີ່ເຮົາບໍ່ມີຄຸນຄ່າ ຈົ່ງເດີນໜ້າເພື່ອການພັດທະນາທີ່ດີຂຶ້ນ.