ຍົກສູງບົດບາດແມ່ຍິງລາວໄປຄຽງຄູ່ກັບການສ້າງສາພັດທະນາປະເທດຊາດ

ໂດຍ: ທິດກໍ່າ
ນັບແຕ່ປະເທດຊາດຂອງພວກເຮົາໄດ້ປ່ຽນແປງການປົກຄອງຈາກລະບອບລາຊາທິປະໄຕມາເປັນລະ ບອບປະຊາທິປະໄຕປະຊາຊົນໃນປີ 1975 ເປັນຕົ້ນມາ, ພັກ ແລະ ລັດຖະບານເຮົາຍາມໃດກໍຍົກສູງບົດ ບາດແມ່ຍິງລາວໃຫ້ສູງເດັ່ນ ແລະ ກ້າວໄປບົນເສັ້ນທາງແຫ່ງຍຸກສະໄໝເລື້ອຍໆ ເຊິ່ງສະແດງໃຫ້ເຫັນຢ່າງຈະແຈ້ງນັ້ນກໍຄືການສ້າງເງື່ອນໄຂໃຫ້ແມ່ຍິງລາວກ້າວເຂົ້າມາຢູ່ໃນພາລະກິດສ້າງສາພັດທະນາປະເທດຊາດ ຄຽງຄູ່ກັບເພດຊາຍໃນທຸກຂົງເຂດວຽກງານ. ເວົ້າໄດ້ວ່າແມ່ຍິງລາວໃນຍຸກນີ້ ແຕກຕ່າງກັບຍຸກການປົກຄອງໃນລະບອບລາຊາທິປະໄຕຢ່າງສິ້ນເຊີງ.

ໃນຍຸກປັດຈຸບັນ, ພວກເຮົາໄດ້ເຫັນຢ່າງຈະແຈ້ງວ່າແມ່ຍິງລາວກາຍເປັນກຳລັງແຮງອັນມະຫາສານທີ່ເຮັດວຽກຄຽງບ່າຄຽງໄຫລ່ເທົ່າທຽມກັບເພດຊາຍ ເພື່ອປະກອບສ່ວນເຮັດລ້ອນໜ້າທີ່ທີ່ພັກ-ລັດຖະບານ ກໍຄືຊາດ ແລະ ປະຊາຊົນມອບໝາຍໃຫ້. ໃນສະພາບຕົວຈິງ, ພວກເຮົາຄົງໄດ້ເຫັນແມ່ຍິງລາວໄດ້ກ້າວຂຶ້ນເປັນການນຳຂັ້ນສູງຂອງພັກ ແລະ ລັດຖະບານລາວຫລາຍຕຳແໜ່ງເຊັ່ນ ເປັນຮອງປະທານປະເທດ, ລັດຖະມົນຕີ, ຮອງລັດຖະມົນຕີ, ຫົວໜ້າກົມ, ຮອງກົມ, ນາຍຮ້ອຍ, ນາຍພັນ, ນັກທຸລະກິດ, ນັກບິນ, ນັກວິຊາການ, ທະຫານ, ຕຳຫລວດ, ພະນັກງານ-ກຳມະກອນທີ່ສັງກັດຢູ່ທຸກຂະແໜງການ, ທຸກຂົງເຂດວຽກງານ ແລະ ທຸກຂົງເຂດການຜະລິດທຸລະກິດ, ໂຮງຈັກ-ໂຮງງານຈຳນວນຫລາຍ ຫລື ອາດເວົ້າໄດ້ວ່າ ຫລາຍກວ່າເພດຊາຍຊ້ຳອີກ.

ເມື່ອຫວນຄືນເບິ່ງປະຫວັດສາດແຫ່ງການຕໍ່ສູູ້ປະຕິວັດປົດປ່ອຍຊາດ, ແມ່ຍິງລາວ ໄດ້ເປັນກຳລັງແຮງປະກອບສ່ວນຕໍ່ສູ້ປະຕິວັດຢ່າງລະອິດລະອ້ຽວ ແລະ ໃຫຍ່ຫລວງເຊັ່ນ: ເປັນພະນັກງານ, ທະຫານ, ພື້ນ ຖານໃຫ້ການປະຕິວັດ, ກອງລຳລຽງ ແລະ ກຳລັງການຜະລິດທີ່ສຳຄັນ ເພື່ອເຮັດໜ້າທີ່ໃຫ້ແນວໜ້າ.

ຈາກບົດບາດ, ໜ້າທີ່ທີ່ໄດ້ກ່າວມາຂ້າງເທິງນັ້ນ, ພັກ ແລະ ລັດຖະບານລາວຈຶ່ງໄດ້ສ້າງເງື່ອນໄຂແລະ ປັດໄຈຕ່າງໆໃຫ້ແມ່ຍິງລາວກ້າວຂຶ້ນຄື: ສຶກສາອົບຮົມບົ່ມສອນ ແລະ ສຳຄັນທີ່ສຸດຄືໄດ້ສ້າງຕັ້ງອົງການສະ ຫະພັນແມ່ຍິງລາວຂຶ້ນມາເພື່ອເຮັດໜ້າທີ່ເຕົ້າໂຮມຄວາມສາມັກຄີ, ສຶກສາອົບຮົມ ແລະ ຊີ້ນຳ-ນຳພາເພື່ອກ້າວສູ່ຍຸກໃໝ່ທັນສະໄໝຂຶ້ນເລື້ອຍໆ. ຂໍໃຫ້ພາລະກິດຂອງແມ່ຍິງລາວຈົ່ງກ້າວດຸ່ງຮຸ່ງເຮືອງຕະຫລອດໄປ. ວັນແມ່ຍິງສາກົນ ຄົບຮອບ 112 ປີ ໝັ້ນຍືນ !