ຜົນການປຶກສາຫາລືການຄຸ້ມຄອງລາຄາສິນຄ້າໃນສະພາບລາຄານໍ້າມັນເຊື້ອໄຟປັບຂຶ້ນສູງ
ກອງປະຊຸມປຶກສາຫາລືການຄຸ້ມຄອງລາຄາສິນຄ້າໃນສະພາບລາຄານ້ຳມັນເພີ່ມສູງຂຶ້ນທີ່ຈັດຂຶ້ນໃນວັນທີ 4 ມີນາ 2022 ໂດຍການເປັນປະທານຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງ ອຸດສາຫະ ກຳ ແລະ ການຄ້າ ໄດ້ເປັນເອກະພາບກັນແກ້ໄຂບັນຫາດັ່ງກ່າວ ໂດຍປັບບາງອົງປະກອບໃນໂຄງສ້າງລາ ຄານໍ້າມັນເຊື້ອໄຟ ສະເພາະໃນໄລຍະລາຄາເພີ່ມຂຶ້ນສູງ, ສ້າງນິຕິກຳລຸ່ມກົດໝາຍອັດຊ່ອງຫວ່າງດ້ານນິຕິກໍາເພື່ອເຮັດໃຫ້ການເກັບລາຍຮັບມີປະສິດທິພາບເພີ່ມຂຶ້ນທັງອຳນວຍຄວາມສະດວກໃຫ້ແກ່ຜູ້ປະກອບການ ກວ່າເກົ່າເຊັ່ນ: ຫຼຸດການນໍາໃຊ້ ບ 88 ແລະ ອຳນວຍຄວາມສະດວກການປະກອບເອກະສານຕ່າງໆໃນການນໍາເຂົ້າ ແລະ ເຄື່ອນຍ້າຍພາຍໃນ ເພື່ອຫຼຸດຜ່ອນຕົ້ນທຶນທີ່ບໍ່ຈຳເປັນ.
ນອກນີ້ໄດ້ກໍານົດລາຄາເພດານນໍ້າມັນເຊື້ອໄຟຄືນໃໝ່ເນື່ອງຈາກລາຄານໍ້າມັນເຊື້ອໄຟປັດຈຸບັນສູງກວ່າລາ ຄາເພດານທີ່ລັດກໍານົດ (ປີ 2011 ໄດ້ກໍານົດລາຄາເພດານ ອຊ ທໍາມະດາ 11.000 ກີບ/ລິດ ແລະ ກາ ຊວນ 10.000 ກີບ/ລິດ ເພື່ອເປັນມາດຕະຖານການດັດປັບລາຄາແຊກແຊງ); ຜ່ານມາກະຊວງອຸດສາຫະ ກໍາ ແລະ ການຄ້າ ໄດ້ນໍາໃຊ້ການເພີ່ມ ຫຼື ຫຼຸດຄັງແຮ, ແຕ່ປັດຈຸບັນຄັງແຮດັ່ງກ່າວ ເຫຼືອ 0 ກີບ/ລິດ, ສຸມໃສ່ຄຸ້ມຄອງການສະໜອງເງິນຕາ ແລະ ອັດຕາແລກປ່ຽນເງິນຕາໃຫ້ເຂົ້າສູ່ລະບົບ ແລະ ເປັນປົກກະຕິ,ຂຶ້ນ ແຜນ ແລະ ຄົ້ນຄວ້າຫາວິທີທາງແກ້ໄຂໃຫ້ບັນດາບໍລິສັດມີສະພາບຄ່ອງ ແລະ ເຂົ້າເຖິງເງິນຕາໃນລະດັບທີ່ແນ່ນອນ, ການຄຸ້ມຄອງລາຄາສິນຄ້າ ແລະ ຄ່າບໍລິການ ປະຕິບັດຕາມຂໍ້ຕົກລົງຂອງນາຍົກລັດຖະມົນຕີ ສະບັບເລກທີ 71/ນຍ ທີ່ປະກອບດ້ວຍບັນດາຂະແໜງການທີ່ກ່ຽວຂ້ອງເພື່ອຮັບຜິດຊອບ ແລະ ມີໜ້າທີ່ຄຸ້ມຄອງ ແລະ ຄິດໄລ່ໂຄງປະກອບລາຄາສິນຄ້າປະເພດເຂົ້າກິນ, ຊີ້ນໝູ, ຊີ້ນງົວ, ໄກ່, ປາ, ພືດຜັກ,ສິນຄ້າ ອຸປະໂພກ-ບໍລິໂພກ ກໍຄື ສິນຄ້າທົ່ວໄປທີ່ມີຜົນກະທົບໄວຕໍ່ຊີວິດການເປັນຢູ່ຂອງປະຊາຊົນ ຕ້ອງໄດ້ເອົາໃຈ ໃສ່ ວາງມາດຕະການກຳນົດໃຫ້ໄປຕາມກົນໄກຂອງຕະຫຼາດທີ່ມີການຄຸ້ມຄອງດັດສົມຂອງລັດ ໝາຍຄວາມວ່າ ສິນຄ້າທີ່ຈຳເປັນຕໍ່ການດຳລົງຊີວິດພື້ນຖານຕ້ອງໄດ້ຄວບຄຸມ, ຄຸ້ມຄອງ ແລະ ຕິດຕາມຢ່າງໃກ້ຊິດເພື່ອບໍ່ໃຫ້ກັກຕຸນສິນຄ້າ ແລະ ຂຶ້ນລາຄາຕາມລຳພັງ ຫຼື ເພື່ອເອົາປຽບຜູ້ຊື້ ເຊິ່ງລາຄາຂາຍສິນຄ້ານັ້ນຕ້ອງສະອ ທ້ອນໃຫ້ເຫັນໂຄງສ້າງລາຄາ ກໍຄືຕົ້ນທຶນຈະແຈ້ງ ແລະ ສ່ວນຕ່າງກໍຄືກຳໄລທີ່ເໝາະສົມຕາມລະບຽບການທີ່ກຳນົດໄວ້.
ທ່ານ ຄຳແພງ ໄຊົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຮຽກຮ້ອງຜູ້ປະກອບການທັງໝົດຈົ່ງຢ່າສວຍໂອກາດຂຶ້ນລາຄາສິນຄ້າຕາມລໍາພັງໃຈ ແລະ ກັກຕຸນສິນຄ້າກໍຄືນໍ້າມັນເຊື້ອໄຟເອົາປຽບ ຜູ້ຊື້ໃນໄລຍະທີ່ລາຄານໍ້າມັນເຊື້ອໄຟເໜັງຕີງຂຶ້ນ ແລະ ຫຼາຍຄົນກໍພົບຄວາມຫຍຸ້ງຍາກຫຼາຍຢ່າງທີ່ມາພ້ອມກັບໂຄວິດ-19. ສະນັ້ນ, ທຸກຄົນແລະທຸກພາກສ່ວນຈົ່ງຊ່ວຍເຫຼືອຊຶ່ງກັນ ແລະ ກັນເພື່ອພ້ອມກັນກ້າວຜ່ານ ວິກິດການຄັ້ງນີ້ທັງຊ່ວຍເປັນຫູເປັນຕາຫາກພົບເຫັນການສວຍໂອກາດຂຶ້ນລາຄາສິນຄ້າ ສາມາດໂທແຈ້ງສາຍດ່ວນ 1510 ແລະ ເວັບໄຊປົກປ້ອງຜູ້ຊົມໃຊ້ WWW.lcp.gov.la ເຊິ່ງເຈົ້າໜ້າທີ່ກ່ຽວຂ້ອງຈະໄດ້ໃຊ້ມາດຕະການຕໍ່ຜູ້ລະເມີດຕາມກົດໝາຍ ແລະ ລະບຽບການ.
