ແຂວງອຸດົມໄຊມ້າງແຫລ່ງຜະລິດຢາບ້າລາຍໃຫຍ່ຢຶດຂອງກາງໄດ້ຫລາຍກວ່າ 2,3 ລ້ານເມັດ
ດ້ວຍການປະສານສົມທົບຢ່າງມີປະສິດທິພາບລະຫວ່າງກົມຕໍາຫລວດສະກັດກັ້ນ ແລະ ຕ້ານຢາເສບຕິດກະຊວງປ້ອງກັນຄວາມສະຫງົບ ແລະ ກອງບັນຊາການ ປກສ ແຂວງອຸດົມໄຊ ສາມາດມ້າງແຫລ່ງຜະລິດຢາເສບຕິດລາຍໃຫຍ່ 2 ຈຸດຄື: ຢູ່ບ້ານພູຂຽວ ແລະ ບ້ານຫລັກ 44 ເມືອງໄຊແຂວງອຸດົມໄຊ, ສາມາດຈັບຜູ້ຕ້ອງຫາໄດ້ 8 ຄົນຄື: ທ້າວ ວືແຊເລົາ ອາຍຸ 38 ປີ, ທ້າວ ເລົາທໍ່ ແຊລີ ອາຍຸ 47 ປີຢູ່ບ້ານໄທສາມັກຄີເມືອງວຽງແກ່ນ ແຂວງຊຽງຮາຍປະເທດໄທ, ທ້າວ ຈົງເຮີ ອາຍຸ 16 ປີ, ນາງ ໄມ່ຮົວ ອາຍຸ 19 ປີຢູ່ບ້ານຊົງຈ່າ, ທ້າວ ເທ້ ອາຍຸ 16 ປີ, ນາງ ເຮີ ອາຍຸ 16 ປີຢູ່ບ້ານຫ້ວຍຍິນເມືອງນ້ຳບາກແຂວງຫລວງພະບາງ, ນາງ ຄຳຮັກ ອາຍຸ 30 ປີຢູ່ບ້ານພູຂຽວ ແລະ ທ້າວ ລາວຮາລີ ອາຍຸ 50 ປີຢູ່ບ້ານຫລັກ 44 ເມືອງໄຊແຂວງອຸດົມໄຊ, ພ້ອມຍຶດເຄື່ອງຈັກ ແລະ ອຸປະກອນຜະລິດຢາເສບຕິດໄດ້ຫລາຍລາຍການຄື: ເຄື່ອງຈັກອັດເມັດຢາບ້າຂະໜາດໃຫຍ່ 1 ເຄື່ອງ ແລະ ເຄື່ອງຂະໜາດນ້ອຍ 2 ເຄື່ອງ, ຕູ້ອົບຢາບ້າ 2 ເຄື່ອງ, ຢາບ້າຫລາຍກວ່າ 2,3 ລ້ານເມັດ, ຝິ່ນ 6,3 ກິໂລ, ກັນຊາ 1 ກິໂລ, ຖົງຢາງບັນຈຸຢາບ້າ 5 ເປົາ, ຝຸ່ນເຄມີຜະລິດຢາບ້ານໍ້າໜັກ 126,8 ກິໂລ, ນ້ຳສີປະ
ສົມຢາບ້າ 69 ກິໂລ, ພ້ອມດ້ວຍປືນຍາວ 4 ກະບອກ, ປືນສັ້ນ 2 ກະບອກ, ລູກປືນ 699 ລູກ ແລະ ລົດໃຫຍ່ 5 ຄັນ, ລົດຈັກ 3 ຄັນ, ເງິນ 241 ລ້ານກວ່າກີບ, 5 ລ້ານກວ່າບາດ (ສະກຸນເງິນໄທ), 49 ພັນໂດລາສະຫະລັດ, ໃບຕາດິນຫລາຍໃບ, ນໍແຮດ, ງາຊ້າງ ແລະ ອຸປະກອນອື່ນໆອີກທີ່ນໍາໃຊ້ເຂົ້າໃນການເຄື່ອນໄຫວກະທໍາຜິດດັ່ງກ່າວ ຊຶ່ງເຈົ້າໜ້າທີ່ໄດ້ຢຶດໄວ້ເປັນຫລັກຖານເພື່ອດໍາເນີນຄະດີຕາມລະບຽບກົດໝາຍ ແລະ ສືບຕໍ່ຂະຫຍາຍຜົນຫາຫົວໂປ່ໂຕການ, ພ້ອມກຸ່ມແກ້ງມາດຳເນີນຄະດີຕາມລະບຽບກົດໝາຍໂດຍໄວ.
