ລະດັບນ້ຳຢູ່ຫລາຍທ້ອງຖິ່ນສືບຕໍ່ເພີ່ມຂຶ້ນ
ອາທິດຜ່ານມານີ້, ຢູ່ຫລາຍທ້ອງຖິ່ນ, ໂດຍສະເພາະຢູ່ແຂວງອຸດົມໄຊ, ຫລວງພະບາງ, ບໍລິຄຳໄຊ, ຄຳມ່ວນ, ຈຳປາສັກ ແລະ ອື່ນໆ ໄດ້ເກີດມີສະພາບນ້ຳຖ້ວມຢ່າງໜັກໜ່ວງ, ເຮັດໃຫ້ເຮືອນຊານບ້ານຊ່ອງ, ເນື້ອທີ່ທຳການຜະລິດລວມໄປເຖິງຖະໜົນຫົນທາງຖືກຕັດຂາດ ແລະ ເສຍຫາຍເປັນຈຳນວນຫລວງຫລາຍ ແລະ ມາຮອດວັນທີ 7 ສິງຫານີ້, ລະດັບນ້ຳຂອງ ແລະ ແມ່ນໍ້າສາຂາຕ່າງໆໄດ້ເພີ່ມຂຶ້ນອີກ. ຈາກການພະຍາກອນລະດັບນ້ຳຂອງ ແລະ ນ້ຳໄຫລເຂົ້າອ່າງນ້ຳງື່ມໃນວັນທີ 7-8 ສິງຫານີ້ ຢູ່ແຂວງຫລວງພະບາງເພີ່ມຂຶ້ນເປັນ 9,33-9,39 ແມັດ (ເຂດລະວັງໄພ 17,50 ແມັດ ແລະ ເຂດອັນຕະລາຍ 18 ແມັດ), ວຽງຈັນຫລັກ 4 (ນ້ຳຂອງ) ເພີ່ມຂຶ້ນ 5,32-5,44 ແມັດ (ເຂດລະວັງໄພ 11,50 ແມັດ ແລະ ເຂດອັນຕະລາຍ 12,50 ແມັດ), ປາກຊັນ (ນ້ຳຂອງ) 9,82- 9,91 ແມັດ (ເຂດລະວັງໄພ 13,50 ແລະ ເຂດອັນຕະລາຍ 14,50 ແມັດ), ສະຫວັນນະເຂດ (ນໍ້າຂອງ) 9,47-9,59 ແມັດ (ເຂດລະວັງໄພ 12 ແມັດ ແລະ ເຂດອັນຕະລາຍ 13 ແມັດ), ປາກເຊ (ນ້ຳຂອງ) 10,23-10,35 ແມັດ (ເຂດລະວັງໄພ 11 ແມັດ ແລະ ເຂດອັນຕະລາຍ 12 ແມັດ), ແຕ່ຢູ່ຂົວເຊ (ເຊບັ້ງໄຟ) ເພີ່ມຂຶ້ນ 19,08-19,17 ແມັດ (ເຂດອັນຕະລາຍ 17,50 ແມັດ ແລະ ເຂດອັນຕະລາຍ 18,50 ແມັດ), ເຂື່ອນນ້ຳງື່ມ 205,29-205,42 ແມັດ (ເຂດລະວັງໄພ 212 ແມັດ ແລະ ເຂດອັນຕະລາຍ 212,31 ແມັດ). ເນື່ອງຈາກວ່າຝົນໄດ້ສືບຕໍ່ຕົກຕິດຕໍ່ກັນຫລາຍວັນ, ຊຶ່ງອາດຈະເຮັດໃຫ້ລະດັບນ້ຳຢູ່ຫລາຍທ້ອງຖິ່ນສູງຂຶ້ນກາຍເຂດລະວັງໄພ, ດັ່ງນັ້ນຈຶ່ງເຕືອນໃຫ້ປະຊາຊົນທີ່ອາໃສຢູ່ເຂດດັ່ງກ່າວຈົ່ງມີສະຕິ ແລະ ກຽມພ້ອມຮັບມືກັບສະພາບນ້ຳຖ້ວມ ແລະ ດິນເຈື່ອນ, ຊຶ່ງຈະເປັນໄພອັນຕະລາຍຕໍ່ຊີວິດ ແລະ ຊັບສິນອັນມີຄ່າຂອງຕົນ, ພ້ອມເຕືອນໃຫ້ເກັບມ້ຽນວັດຖຸສິ່ງຂອງ ແລະ ສັດລ້ຽງໄປໄວ້ບ່ອນທີ່ປອດໄພ, ເອົາໃຈໃສ່ຕິດຕາມຂ່າວພະຍາກອນອາກາດ ແລະ ລະດັບນ້ຳໃຫ້ເປັນປົກກະຕິ.
