ກະຊວງການເງິນ ຫາລືການກະກຽມປະຕິບັດໂຄງການຄຸ້ມຄອງການຈັດເກັບລາຍຮັບແບບທັນສະໄໝ

ວັນທີ 1 ກຸມພາ 2022 ຜ່ານມາ, ຢູ່ກະຊວງການເງິນ ໄດ້ຈັດກອງປະຊຸມປຶກສາຫາລືກ່ຽວກັບການກະກຽມປະຕິບັດ ໂຄງການຄຸ້ມຄອງການຈັດເກັບລາຍຮັບແບບທັນສະໄໝ ໂດຍການເປັນປະທານຮ່ວມຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີ ກະຊວງການເງິນ ແລະ ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີຮອງລັດຖະມົນຕີ ແລະ ບັນດາກົມກ່ຽວຂ້ອງອ້ອມຂ້າງກະຊວງການເງິນ, ກະຊວງເຕັກໂນໂລຊີ ແລະ ການສື່ສານ, ມີຜູ້ຕາງໜ້າບໍລິສັດ ຫົວເຫວີຍ ເຕັກໂນໂລຊີ (ລາວ) ຈໍາກັດຜູ້ດຽວ, ກຸ່ມບໍລິສັດ ເອໄອເອັຟ ແລະ ຜູ້ຕາງໜ້າຈາກທະນາຄານການຄ້າຕ່າງປະເທດລາວ ມະຫາຊົນ ເຂົ້າຮ່ວມ.

ທ່ານ ບຸນເຫລືອ ສິນໄຊວໍລະວົງ ຮອງລັດຖະມົນຕີກະຊວງການເງິນ ໄດ້ລາຍງານກ່ຽວກັບ ການພັດທະນາລະບົບຄຸ້ມຄອງການຈັດເກັບລາຍຮັບທັນສະໄໝ (ດີຈີຕອນ) ແລະ ລະບົບພື້ນຖານໂຄງລ່າງເຊື່ອມຕໍ່ຂໍ້ມູນການເກັບລາຍຮັບ, ລະບົບຄຸ້ມຄອງການແຈ້ງພາສີ ແບບເອເລັກໂຕຣນິກ (ASYCUDA), ລະບົບແຈ້ງພາສີປະຕູດຽວແຫ່ງຊາດ (Lao National Single Window), ລະບົບຄຸ້ມຄອງຈັດເກັບລາຍຮັບສ່ວຍສາອາກອນແບບທັນສະໄໝ (TaxRIS) ແລະ ລະບົບການຊໍາລະພາສີ ແລະ ອາກອນ (Fin Link) ແລະ ສະເໜີທິດທາງແຜນການຕໍ່ໜ້າ ເພື່ອໃຫ້ທັນກັບການປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ອັດຊ່ອງວ່າງການຮົ່ວໄຫລການຈັດເກັບລາຍຮັບເຂົ້າງົບປະມານລັດໃຫ້ຄົບຖ້ວນ ໂດຍກະຊວງການເງິນ ມີແຜນຍົກລະ ດັບລະບົບການຄຸ້ມຄອງຈັດເກັບລາຍຮັບ-ລາຍຈ່າຍ ທີ່ມີໃນປັດຈຸບັນ ໃຫ້ເປັນລະບົບທັນສະໄໝຄົບຊຸດ ເພື່ອຫລຸດຜ່ອນການນາໃຊ້ພະນັກງານ ແລ້ວນໍາໃຊ້ເຄື່ອງມືທັນສະໄໝເຂົ້າມາເຮັດໜ້າທີ່ແທນ ເຊິ່ງລະບົບຄຸ້ມຄອງທັນສະໄໝໃໝ່ນີ້ ອອກແບບໂດຍຊ່ຽວຊານບໍລິສັດຫົວເວີຍ ແລະ ຕ້ອງຈັດຕັ້ງປະຕິບັດໃນປີ 2022 ຄື: ລະບົບພາສີດີຈິຕອນ (Smart Customs), ປັບປຸງລະບົບແຈ້ງພາສີ(ASYCUDA) ແລະ ລະບົບການແຈ້ງພາສີປະຕູດຽວແຫ່ງຊາດ (Single Windows system for Declaration & Risk Management) ໃຫ້ສາມາດເຊື່ອມລະບົບທັງໝົດ ເພື່ອລວມສູນການແຈ້ງພາສີສິນຄ້ານໍາເຂົ້າ-ສົ່ງອອກ ແລະ ລະບົບຊໍາລະຄ່າພາສີ-ອາກອນ, ຄ່າທໍານຽມຕ່າງໆ ຜ່ານລະບົບທະນາຄານ, ພ້ອມທັງເຊື່ອມຕໍ່ລະບົບການອອກອະນຸຍາດນໍາເຂົ້າ-ສົ່ງອອກ ຂອງຂະແໜງ ການກ່ຽວຂ້ອງອື່ນໆ.

ນອກນີ້ ຍັງມີລະບົບຄຸ້ມຄອງຕິດຕາມການກວດປ່ອຍສິນຄ້າ (Intelligent Gate), ລະບົບຕິດຕາມລົດບັນທຸກ, ຕູ້ສິນຄ້າພາຍໃນ ແລະ ຜ່ານແດນແບບດິຈິຕອນ(Electronic Cargo Tracking System/ECTS), ພັດທະນາພື້ນຖານໂຄງລ່າງເຄືອຂ່າຍ ແລະ ຄວາມປອດໄພແບບຄລາວ (MOF Cloud), ຫ້ອງຄຸ້ມຄອງລະບົບປະຕິບັດການ ແລະ ອາຄານແບບທັນສະໄໝ (New Building).

ໂອກາດນີ້, ທ່ານ ບຸນໂຈມ ອຸບົນປະເສີດ ກໍໄດ້ມີຄໍາເຫັນຕໍ່ກອງປະຊຸມວ່າ: ກະຊວງການເງິນ ຈະເລັ່ງ ຄົ້ນຄວ້າການປະຕິບັດລະບົບການຄຸ້ມຄອງ ລະບົບຈັດເກັບລາຍຮັບໃຫ້ທັນກັບວາລະແຫ່ງຊາດ ແລະ ມອບໃຫ້ຄະນະຮັບຜິດຊອບປັບປຸງບົດນໍາສະເໜີໃຫ້ຄົບຖ້ວນເພື່ອສະເໜີຕໍ່ລັດຖະບານໃນຂັ້ນຕອນຕໍ່ໄປ, ໄລຍະຜ່ານມາ ຜູ້ແຈ້ງພາສີ ແມ່ນຍັງແຈ້ງແບບລວມໆ, ແຈ້ງບໍ່ລະອຽດ.

ສະນັ້ນ, ເພື່ອອັດຊ່ອງວ່າງໃນການແຈ້ງພາສີ, ຂອດນໍາເຂົ້າ ບໍ່ໃຫ້ຮົ່ວໄຫລ ຕາມຄໍາສັ່ງ 18/ນຍ ກະຊວງການເງິນ ຕ້ອງໄດ້ຍົກລະດັບລະບົບຄຸ້ມຄອງການແຈ້ງພາສີ ແບບເອເລັກໂຕຣນິກ ໂດຍໃຫ້ລະບົບ Lao National Single Window ເປັນໃຈກາງໃນການເຊື່ອມໂຍງ. ສຳລັບ ຜູ້ທີ່ມີເງື່ອນໄຂສາມາດແຈ້ງກ່ອນລ່ວງໜ້າໄດ້ ແລະ ກວດສອບການນໍາເຂົ້າສິນຄ້າທັງໝົດ ຜ່ານລະບົບ ແລະ ໃຫ້ສາມາດເຊື່ອມຕໍ່ຫາລະ ບົບຄຸ້ມຄອງລາຍຮັບສ່ວຍສາອາກອນ Tax RIS, ໃນອະນາຄົດການກວດປ່ອຍສິນຄ້ານໍາເຂົ້າ-ສົ່ງອອກ ຈະບໍ່ໃຫ້ເຈົ້າໜ້າທີ່ພາສີລົງກວດ, ການຄິດໄລ່ ຫລື ພົວພັນກັບຜູ້ແຈ້ງພາສີ ຈະຫັນເອົາລະບົບການຈັດເກັບລາຍຮັບ ແບບເອເລັກໂຕຣນິກ ມາແທນເຈົ້າໜ້າທີ່ພາສີ.

ພ້ອມນີ້, ທ່ານ ບໍ່ວຽງຄຳ ວົງດາລາ ກໍໄດ້ມີຄໍາເຫັນຕໍ່ກອງປະຊຸມວ່າ: ປັດຈຸບັນ, ສູນບໍລິຫານລັດດ້ວຍດີຊີຕອນ ກະຊວງເຕັກໂນໂລຊີ ແລະ ການສື່ສານ ກຳລັງຄົ້ນຄວ້າອອກມາດຕະຖານທາງເຕັກນິກລວມ ໃນການພັດທະນາລະບົບເຊື່ອມຕໍ່, ລວມທັງມາດຕະຖານງົບປະມານຕໍ່ຫົວໜ່ວຍ ແລະ ໃຫ້ລະບົບສາມາດເຊື່ອມຈອດຂໍ້ມູນຫາແຕ່ລະພາກສ່ວນທີ່ກ່ຽວຂ້ອງເຂົ້າກັນໄດ້, ສະນັ້ນ ການນໍາເອົາເຕັກໂນໂລຊີທັນສະໄໝ ເຂົ້າມານໍາໃຊ້ໃນວຽກງານຄຸ້ມຄອງວຽກງານການຈັດເກັບລາຍຮັບແຫ່ງຊາດ ຍິ່ງຈະເຮັດໃຫ້ການເກັບລາຍຮັບເຂົ້າງົບປະມານມີປະສິດທິພາບ ແລະ ປະສິດທິຜົນດີກວ່າເກົ່າ.