ລາຍລ່າສຸດ! ໂຄ໋ດ ຊາກຕ້າໂດເນັສ ກາຍເປັນເຫຍື່ອໃນສົງຄາມຢູເຄຣນ

ຊີອີໂອ ຂອງ ຊາກຕ້າໂດເນັສ ສະໂມສອນໃນຢູເຄຣນ ໄດ້ອອກມາຢືນຢັນໃນວັນພະຫັດວານນີ້ວ່າ ຄູຝຶກຂອງສະໂມສອນໄດ້ເສຍຊີວິດຫຼັງຈາກເຂົ້າຮ່ວມສົງຄາມລະຫວ່າງຣັດເຊຍ ແລະ ຢູເຄຣນ.

ຄູຝຶກທີມເຍົາວະຊົນຂອງ ຊາກຕ້າໂດເນັສ ໄດ້ກາຍເປັນຫນຶ່ງໃນຜູ້ເສຍຊີວິດຫຼ້າສຸດໃນສົງຄາມລະຫວ່າງຣັດເຊຍ ແລະ ຢູເຄຣນ, ເຊີຮີ ປາກກິ້ນ ຊີອີໂອ ຂອງສະໂມສອນ ໄດ້ອອກມາຢືນຢັນຂ່າວຮ້າຍດັງກ່າວທາງເຟສບຸກມື້ວານນີ້ (ວັນພະຫັດທີ 3 ມີນາ 2022) ໂດຍອ້າງວ່າຖືກລູກປືນຈາກຣັດເຊຍເປັນເຫດໃຫ້ເສຍຊີວິດ. ຜູ້​ບໍ​ລິ​ຫານ ຊາກຕ້າ ຍັງ​ໄດ້​ອ້ອນວອນ​ໃຫ້​ປະ​ຊາ​ຊົນຂອງຣັດ​ເຊຍ​ໃຫ້ຢືນຢັດ​ຕໍ່​ຕ້ານ​ປະ​ທາ​ນາ​ທິ​ບໍ​ດີ ວາລາດິເມຍ ປູຕິນ ພາຍຫຼັງ​ການ​ໂຈມ​ຕີ​ຢູ່​ຢູເຄຣນ

ປາກກິ້ນ ຂຽນວ່າ: “ຫນຶ່ງໃນພະນັກງານຂອງພວກເຮົາໄດ້ຖືກຂ້າຕາຍມື້ວານນີ້ ລາວເປັນຄູຝຶກສອນທີມເຍົາວະຊົນຂອງພວກເຮົາ ເຂົາໄດ້ເສຍຊີວິດຍ້ອນສະເກັດລູກປືນຂອງທະຫານຣັດເຊຍ.” ທ່ານກ່າວຕື່ມວ່າ: “ໃນວົງການກິລາ ຄວາມຢ້ານກົວແມ່ນຄວາມຮູ້ສຶກທີ່ຫຼຸດຜ່ອນຄວາມເປັນໄປໄດ້ຂອງໄຊຊະນະໃຫ້ເປັນສູນ.” “ຄວາມຢ້ານກົວຂອງເຈົ້າທີ່ຈະເວົ້າຕໍ່ຕ້ານສົງຄາມໃນຢູເຄຣນ ໄດ້ທໍາລາຍເມືອງ, ຄວາມຢ້ານກົວຂອງເຈົ້າແມ່ນການເສຍຊີວິດເປັນພັນໆໃນບັນດາພົນລະເຮືອນ, ຄວາມຢ້ານກົວຂອງເຈົ້າແມ່ນການເສຍຊີວິດຂອງເດັກນ້ອຍ ແລະ ຊະຕາກໍາຂອງປະຊາຊົນຫຼາຍລ້ານທີ່ຖືກທໍາລາຍ.” “ຄວາມຢ້ານກົວຂອງເຈົ້າທີ່ຈະຕໍ່ຕ້ານລະບອບການນອງເລືອດແມ່ນຄວາມພ່າຍແພ້ທີ່ໃຫຍ່ທີ່ສຸດຂອງເຈົ້າ.”

ໃນຕົ້ນອາທິດທີ່ຜ່ານມາ ຊາກຕ້າ ໄດ້ປະສົບຜົນສຳເລັດໃນການອົບພະຍົບຜູ້ຫຼິ້ນ ບຣາຊິນ ຂອງພວກເຂົາຈຳນວນໜຶ່ງໄປ ໂຣມັນເນຍ ຫຼັງຈາກການໂຈມຕີຂອງຣັດເຊຍ. ສະໂມສອນຂອງຢູເຄຣນຍັງຢືນຢັນວ່າ ດິນາໂມຄຽຟ ແລະ ເອັສຊີ ດະນິສໂປຣ-1 ສາມາດອົບພະຍົບນັກເຕະຕ່າງຊາດອອກຈາກປະເທດໃນຊ່ວງສົງຄາມໄດ້. ຊາກຕ້າ ໄດ້ອອກຖະແຫຼງການ “ພວກເຮົາຂໍຂອບໃຈທຸກຄົນສໍາລັບການຊ່ວຍເຫຼືອພວກເຂົາໃນຂະບວນການນີ້,” “ການອົບພະຍົບຜູ້ຫຼິ້ນເກີດຂຶ້ນໂດຍການຊ່ວຍເຫຼືອສ່ວນຕົວຂອງປະທານ ຢູຟ່າ ອາເລັກຊານເດີ ເຊເຟຣິນ, ອັນດຣີ ປາເວວໂກ້ ປະທານສະມາຄົມບານເຕະຢູເຄຣນ ແລະ ລີໂອນິດ ໂອເລນິເຊນໂກ້ ປະທານສະຫະພັນບານເຕະ ມອນໂດວາ.