ປະທານປະເທດເນັ້ນ ຕ້ອງສ້າງໃຫ້ທະຫານທ້ອງຖິ່ນມີສິລະປະຍຸດ-ຍຸດທະວິທີ ມີຄວາມຮູ້ໃໝ່ ຮັບເອົາວິທະຍາສາດໃຫ້ມີຄວາມສາມາດຮອບດ້ານ

ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານພັກ ປປ ລາວ ປະທານປະເທດແຫ່ງ ປະທານຄະນະກໍາມະການ ປກຊ-ປກສ ຂັ້ນສູນກາງ ໂອ້ລົມໃນໂອກາດເຂົ້າຮ່ວມກອງປະຊຸມວຽກງານການທະຫານທ້ອງຖິ່ນທົ່ວປະເທດ ຄັ້ງທີ V ໃນວັນທີ 4 ມີນາ 2022 ນີ້ ໂດຍທ່ານໄດ້ ຕີລາຄາສູງຕໍ່ຜົນງານໄຊຊະນະທີ່ກຳລັງປະກອບອາວຸດທ້ອງຖິ່ນ (ລວມທັງກອງບັນຊາການທະຫານແຂວງ, ທະຫານເມືອງ, ປກສ ແຂວງ, ປກສ ເມືອງ, ກໍາລັງກອງຫຼອນ-ກອງປ້ອງກັນຕົວ ແລະ ປກສ ບ້ານ-ກຸ່ມບ້ານ) ໄດ້ຄຽງບ່າຄຽງໄຫລ່ກັບກໍາລັງຫລວງ ແລະ ອົງການປົກຄອງທ້ອງຖິ່ນແຕ່ລະຂັ້ນໃນການປະຕິບັດພາລະກິດປົກປັກຮັກສາອຳນາດອະທິປະໄຕຂອງຊາດ ກໍຄືປົກປັກຮັກສາທ້ອງຖິ່ນຂອງຕົນໃຫ້ມີຄວາມສະຫງົບປອດໄພ ປະກອບສ່ວນຢ່າງແຂງແຮງໃນການພັດທະນເສດຖະກິດ-ສັງຄົມ ຂອງຊາດກໍຄືຂອງທ້ອງຖິ່ນໄດ້ຂະຫຍາຍຕົວຢ່າງຕໍ່ເນື່ອງ ເຮັດໃຫ້ຊີວິດການເປັນຢູ່ຂອງພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າໄດ້ຮັບການປັບປຸງດີຂຶ້ນ.

ຄຽງຄູ່ກັນນັ້ນ ສະຫາຍປະທານປະເທດ ຍັງໄດ້ຍົກໃຫ້ເຫັນມູນເຊື້ອ ແລະ ຄວາມໝາຍຄວາມສໍາຄັນ ຂອງກຳລັງທະຫານທ້ອງຖິ່ນ ພ້ອມທັງເນັ້ນໜັກຕື່ມບາງບັນຫາຄື: ໃຫ້ເບິ່ງຄືນຄຳສັ່ງ ແນະນຳ ວ່າດ້ວຍການສ້າງບ້ານ ແລະ ກຸ່ມບ້ານພັດທະນາຍັງຖືກຕ້ອງ ສອດຄ່ອງແນວໃດ, ມີສ່ວນໃດຍັງໃຊ້ໄດ້ ສ່ວນໃດທີ່ຈະຕ້ອງປັບປຸງ ເພາະນະໂຍບາຍວາງອອກມາໄດ້ 18 ປີແລ້ວ ອາດມີຫຼາຍຕົວຊີ້ວັດບໍ່ແທດກັບສະພາບຕົວຈິງໃນເງື່ອນໄຂປັດຈຸບັນ, ມະຕິຂອງກົມການເມືອງສູນກາງພັກ ສະບັບເລກທີ 25/ກມສພ ວ່າດ້ວຍທິດທາງເປົ້າໝາຍ ແລະ ມາດຕະການສ້າງແຂວງເປັນຫົວໜ່ວຍຍຸດທະສາດ ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ສ້າງບ້ານເປັນຫົວໜ່ວຍພັດທະນາ (3 ສ້າງ) ເພາະນະໂຍບາຍນີ້ຕິດພັນກັບການສ້າງຮາກຖານ ການສ້າງໂຄງປະກອບວຽກງານພັດທະນາການປົກຄອງຕິດພັນກັບການສ້າງກໍາລັງ ປກຊ-ປກສ ຢູ່ທ້ອງຖິ່ນຮາກຖານໂດຍກົງຄື: “ສ້າງແຂວງໃຫ້ເປັນຫົວໜ່ວຍຍຸດທະສາດ ສ້າງເມືອງໃຫ້ເປັນຫົວໜ່ວຍເອກະລາດ ສ້າງບ້ານໃຫ້ເປັນບ້ານປ້ອມໝັ້ນສູ້ຮົບຕິດລຽນ”

ພ້ອມນັ້ນຄະນະພັກ ອໍານາດການປົກຄອງ ຄະນະ ປກຊ-ປກສ ຂັ້ນຕ່າງໆ ຕ້ອງໄດ້ຊີ້ນໍາຢ່າງໃກ້ຊິດແທດເຖິງ ໂດຍກົງຮອບດ້ານ ຮູ້ນໍາໃຊ້ໂອກາດ ແລະ ກາລະເທສະ ການສ້າງກໍາລັງທະຫານທ້ອງຖິ່ນແມ່ນສ້າງສາມດ້ານໄປພ້ອມໆກັນຄື: ສ້າງຝຶກຝົນດ້ານການເມືອງແນວຄິດປະຕິວັດ ບວກກັບຄຸນສົມບັດສິນທຳປະຕິວັດ ນໍ້າໃຈຮັກຊາດ ສ້າງໃຫ້ກຳລັງຮູ້ໜ້າທີ່ຂອງຕົນ ຮູ້ເຮັດວຽກເພື່ອຊາດ ເພື່ອປະຊາຊົນ ສ້າງໃຫ້ມີດ້ານສິລະປະຍຸດ-ຍຸດທະວິທີ ສ້າງໃຫ້ທະຫານທ້ອງຖິ່ນປະກອບມີຄວາມຮູ້ໃໝ່ທາງດ້ານການພັດທະນາ ຮັບເອົາວິທະຍາສາດມາພັດທະນາກຳລັງໃຫ້ມີຄວາມສາມາດຮອບດ້ານ ເພື່ອເປັນກຳລັງແຮງສ້າງກົມກອງ ຊ່ວຍປະຊາຊົນສ້າງທ້ອງຖິ່ນ ສ້າງຄອບຄົວຕົວແບບ ທະຫານທ້ອງຖິ່ນຕ້ອງຮູ້ຕິດພັນກັບຮາກຖານ ຕິດພັນກັບປະຊາຊົນ ແລະ ອື່ນໆ.