ຄະນະບໍລິຫານງານສະຫະພັນແມ່ຍິງ ກະຊວງການເງິນ ປາຖະກະຖາສະເຫຼີມສະຫຼອງວັນແມ່ຍິງສາກົນ ຄົບຮອບ 112 ປີ
ວັນທີ 03 ມີນາ 2022 ທີ່ກະຊວງການເງິນ ຄະນະບໍລິຫານງານສະຫະພັນແມ່ຍິງ ກະຊວງການເງິນ ໄດ້ຈັດປາຖະກະຖາສະເຫຼີມສະຫຼອງວັນແມ່ຍິງສາກົນ (08/03/1910-08/03/2022) ຄົບຮອບ 112 ປີ ໂດຍການເຂົ້າຮ່ວມຂອງ ທ່ານ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ, ມີ ທ່ານ ນາງ ດາວອນ ທອງຈັນ ປະທານສະຫະພັນແມ່ຍິງ ກະຊວງການເງິນ, ມີຄະນະບໍລິຫານງານສະຫະພັນແມ່ຍິງ ກະຊວງການເງິນ, ບັນດາຫົວໜ້າໜ່ວຍສະຫະພັນແມ່ຍິງ ອ້ອມຂ້າງກະຊວງການເງິນ ພ້ອມດ້ວຍສະມາຊິກແມ່ຍິງກະຊວງການເງິນ ແລະ ແຂກຖືກເຊີນເຂົ້າຮ່ວມ.
ໂອກາດດັ່ງກ່າວ, ທ່ານ ນາງ ດາວອນ ທອງຈັນ ໄດ້ເລົ່າຄືນມູນເຊື້ອປະຫວັດຄວາມເປັນມາ ຂອງວັນທີ 8 ມີນາ ຊິ່ງເປັນເຫດການ-ການເມືອງທີ່ສໍາຄັນ ເປັນຂີດໝາຍແຫ່ງໄຊຊະນະອັນພື້ນຖານ ຂອງຂະບວນແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນຊອບທໍາ ໃຫ້ແກ່ແມ່ຍິງ ຊາວຜູ້ອອກແຮງງານໃນທົ່ວໂລກ, ວັນແມ່ຍິງສາກົນໄດ້ກໍາເນີດຂຶ້ນໃນທ່າມກາງສະພາບເສດຖະກິດ ຂອງສັກດິນານາຍທຶນຂະຫຍາຍຕົວ, ເມື່ອໂຮງຈັກ, ໂຮງງານໄດ້ຂະຫຍາຍຕົວ ມັນໄດ້ສ້າງຄວາມຮັ່ງມີ ໃຫ້ແກ່ນາຍທຶນ ແຕ່ຊ້ຳພັດເພີ່ມທະວີຄວາມທຸກຍາກລໍາບາກ ໃຫ້ແກ່ຊາວຜູ້ອອກແຮງງານ, ໂດຍສະ ເພາະ ແມ່ນກຳມະກອນແມ່ຍິງ ເຊິ່ງສະແດງອອກ ແມ່ຍິງຖືກກົດຂີ່ຂູດຮີດຢ່າງໜ່ວງ, ເຮັດວຽກ ຫຼາຍຊົ່ວໂມງ ແຕ່ໄດ້ຮັບຄ່າຈ້າງດ້ວຍລາຄາຖືກ, ເຮັດວຽກບໍ່ມີການຮັບປະກັນ ບໍ່ມີລະບອບປົກປ້ອງ ຮັກສາສຸຂະພາບ ຂອງແມ່ຍິງ ແລະ ເດັກນ້ອຍ. ສະນັ້ນ, ຈຶ່ງໄດ້ກໍານົດເອົາວັນທີ 8 ມີນາຂອງທຸກໆປີ ເປັນວັນແມ່ຍິງສາກົນ ເພື່ອລະນຶກເຖິງການຕໍ່ສູ້ຂອງແມ່ນຍິງ ເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບ ປະຊາທິປະໄຕ ຄືກັບຜູ້ຊາຍ ທວງໃຫ້ແກ້ໄຂຊີວິດການເປັນຢູ່. ທັງນີ້, ກໍ່ເພື່ອໃຫ້ເອື້ອຍນ້ອງສະມາຊິກແມ່ຍິງຂອງກະຊວງການເງິນ ໄດ້ມີຄວາມຮັບຮູ້ຄວາມໝາຍ ຄວາມສໍາຄັນຂອງວັນດັ່ງກ່າວ ແລະ ນໍາເອົາມູນເຊື້້ອອັນອົງອາດກ້າແກ່ນຂອງແມ່ຍິງລາວ ແລະ ທົ່ວໂລກ ເພື່ອເປັນບົດຮຽນທີ່ລໍ້າຄ່າ ມາເປັນບ່ອນອີງໃນການປະຕິບັດວຽກງານຕົວຈິງໃນການນໍາພາ-ຊີ້ນໍາ ເອື້ອຍນ້ອງແມ່ຍິງກະຊວງການເງິນ ໃຫ້ສໍາເລັດຜົນຕາມລະດັບຄາດ.
ພ້ອມກັນນັ້ນ, ທ່ານ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ຍັງໄດ້ສະແດງຄວາມສາມັກຄີຮັກແພງ ແລະ ພອນໄຊອັນປະເສີດ ມາຍັງຄະນະບໍລິຫານງານ ສະຫະພັນ ແມ່ຍິງກະຊວງການເງິນ, ບັນດາແຂກທີ່ເຂົ້າຮ່ວມກອງປະຊຸມໃນມື້ນີ້ ແລະ ຍ້ອງຍໍຊົມເຊີຍ ຜົນງານທີ່ຍາດມາໄດ້, ຄຽງຄູ່ກັບຜົນສຳເລັດໃນຫຼາຍດ້ານ ທີ່ສະຫະພັນແມ່ຍິງກະຊວງການເງິນຍາດມາໄດ້ນັ້ນ ເມື່ອທຽບໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນສະເພາະໜ້າ ເປັນຕົ້ນແມ່ນຂະແໜງການເງິນໃນໄລຍະໃໝ່, ຮຽກຮ້ອງໃຫ້ບັນດາສະມາຊິກ ເອື້ອຍນ້ອງແມ່ຍິງ ທັງໝົດຈົ່ງສືບຕໍ່ເປັນເຈົ້າການເຂົ້າຮ່ວມ ໃນຂະບວນການຕ່າງໆ, ເອົາໃຈໃສ່ພັດທະນາບຸກບືນຕົນເອງໃນ ທຸກໆດ້ານໃຫ້ແຂງແຮງກວ່າເກົ່າ, ສຶກສາອົບຮົມທາງດ້ານແນວຄິດການເມືອງແນວຄິດ ໃຫ້ມີຄວາມອຸ່ນ ອຽນທຸ່ນທ່ຽງ, ຮັກສາມູນເຊື້ອຜົນງານອັນພົ້ນເດັ່ນ ແລະ ມີຄວາມສາມັກຄີໜັກແໜ້ນ ທັງພາຍໃນ ແລະ ພາຍນອກ, ສູ້ຊົນຄຽງບ່າຄຽງໄຫຼ່ກັບເພດຊາຍ ໃນການປະຕິບັດພາລະກິດ ແລະ ໜ້າທີ່ ຮັບຜິດຊອບອັນໃຫຍ່ຫຼວງ ທີ່ຂັ້ນເທິງມອບໝາຍໃຫ້ສໍາເລັດຕາມແຜນການ.
ນອກຈາກນັ້ນ, ໃນພິທີດັ່ງກ່າວ, ຍັງໄດ້ການມອບໃບຍ້ອງຍໍ ການຈັດຕັ້ງປະຕິບັດ ວຽກງານ 3 ດີ ເຊິ່ງໄດ້ມອບຄະນະບໍລິຫານງານ ສະຫະພັນແມ່ຍິງ ກະຊວງການເງິນ ສະໄໝທີ IV ແລະ ສະໄໝທີ V ທັງໃຫ້ຕາງໜ້າ 17 ໜ່ວຍ ສະຫະພັນແມ່ຍິງ ອ້ອມຂ້າງກະຊວງການເງິນ ອີກດ້ວຍ.
