ການຕິດເຊື້ອຫລຸດລົງ, ແຕ່ອັດຕາການເສຍຊີວິດຈາກໂຄວິດ-19 ຢູ່ລາວຍັງຫລາຍ

ທ່ານດຣ ສີສະຫວາດ ສຸດທານີລະໄຊ ຮອງຫົວໜ້າກົມພະຍາດຕິດຕໍ່ ກະຊວງສາທາລະນະສຸກ ຖະແຫລງຂ່າວປະຈຳວັນທີ 3 ມີນາວ່າ: ມື້ນີ້ເປັນອີກມື້ໜຶ່ງໂຕເລກການຕິດເຊື້ອທົ່ວປະເທດຕ່ຳກວ່າ 300 ຄົນ/ມື້ເຊິ່ງ ຖືວ່າທ່າອ່ຽງການລະບາດຢູ່ໃນຂາລົງ, ແຕ່ພວກເຮົາຕ້ອງໄດ້ສືບຕໍ່ເຝົ້າລະວັງ ແລະ ປະຕິບັດຕາມແຈ້ງການເລກທີ 258/ຫສນຍລົງວັນທີ 1 ມີນາ 2022 ດ້ວຍຄວາມຕື່ນຕົວ ແລະມີສະຕິປ້ອງກັນຕົນເອງ, ຄົນອ້ອມ ຂ້າງລວມທັງຄົນໃນຄອບຄົວ. ແນວໃດກໍດີເຖິງວ່າໂຕເລກລາຍງານຕິດເຊື້ອປະຈໍາວັນຫຼຸດລົງເລື້ອຍໆ, ແຕ່ອັດຕາການເສຍຊີວິດຂອງຄົນເຈັບຍັງຫລາຍໂດຍປັດຈຸບັນມີຄົນເຈັບເສຍຊີວິດ 626 ຄົນ ເຊິ່ງຄົນເຈັບທີ່ເສຍຊີວິດສ່ວນຫຼາຍຍັງແມ່ນຜູ້ອາຍຸສູງ, ຜູ້ມີພະຍາດປະຈຳໂຕ, ບໍ່ໄດ້ສັກວັກຊີນ ແລະ ຜູ້ປີ່ນປົວຕົນເອງຢູ່ເຮືອນມາຫາແພດໝໍຊ້າ.

ທ່ານດຣ ສີສະຫວາດ ອະທິບາຍວ່າ: ຜູ້ຈະປີ່ນປົວຕົນເອງຢູ່ເຮືອນໃຫ້ປອດໄພຕ້ອງມີເງື່ອນໄຂດັ່ງນີ້:
– ຕ້ອງມີຫ້ອງແຍກປ່ຽວຈາກສະມາຊິກຄົນອື່ນໃນຄອບຄົວ,
– ຜູ້ທີ່ມີອາການເບົາບາງ ຫຼື ບໍ່ມີອາການ
– ໄດ້ສັກວັກຊີນທຸກເຂັມທີ່ແນະນຳຄົບໂດສ-
– ຜູ້ມີອາຍຸຕໍ່າກວ່າ 60 ປີ
– ຜູ້ບໍ່ມີພະຍາດປະຈຳໂຕ ແລະ ບໍ່ຖືພາ
– ຕ້ອງມີອຸປະກອນຕິດຕາມຕົນເອງທຸກມື້ ເປັນຕົ້ນການວັດແທກລະດັບອົກຊີແຊນໃນເລືອດ, ມີບາຫຼອດວັດແທກອຸນຫະພູມ
– ມີຢາຈຳເປັນພື້ນຖານເປັນຕົ້ນຢາຫຼຸດໄຂ້, ວິຕາມີນຊີ ແລະ ຢາປີ່ນປົວຕາມອາການ, ສາມາດຕິດຕາມໂຕເອງ ເປັນຕົ້ນ ລະບົບການຫາຍໃຈສະດວກດີ
– ສາມາດກິນ-ດື່ມໄດ້, ຂ້າເຊື້ອ ແລະ ເກັບມ້ຽນຂີ້ເຫຍື້ອໃຫ້ຖືກຕ້ອງຕາມຫຼັກອະນາໄມ
– ຕ້ອງມີສະມາຊິກໃນຄອບຄົວຜູ້ມີສຸຂະພາບແຂງແຮງບໍ່ມີພະຍາດປະຈຳໂຕ ເປັນຜູ້ຕິດຕາມ, ສະໜອງອາຫານການກິນ
– ຕິດຕໍ່ພົວພັນປະສານງານທາງໂທລະສັບສາຍດ່ວນ 164 ເພື່ອລົງທະບຽນເຂົ້າປິ່ນປົວ, ຂໍຄໍາປືກສາ ແລະ ເພື່ອລາຍງານສະພາບຕົນເອງຖ້າມີອາການບໍ່ສະບາຍ.