ໄລຍະ 2 ເດືອນຜ່ານມາຫວຽາມນາມ ມີນັກທ່ອງທ່ຽວເດີນທາງເຂົ້າຫລາຍກວ່າ 49.200 ເທື່ອຄົນ, ເພີ່ມຂຶ້ນ 71,7%

ອີງຕາມການລາຍງານຂອງ ຂ່າວ ຮ່າໂນ້ຍຫວຽດນາມ, ວັນທີ 28 ກຸມພາ 2022 ນີ້ໃຫ້ຮູ້ວ່າ: , ພາຍຫລັງຫວຽດນາມໄດ້ເປີດຕ້ອນຮັບນັກທ່ອງທ່ຽວຕ່າງປະເທດ ນັບແຕ່ ເດືອນມັງກອນ-ເດືອນກຸມພາ ມີນັກທ່ອງທ່ຽວເຂົ້າມາຢ້ຽມຢາມຫລາຍກວ່າ 49.200 ເທື່ອຄົນ, ເພີ່ມຂຶ້ນ 71,7% ເມື່ອທຽບໃສ່ໄລຍະດຽວກັນໃນປີຜ່ານມາຊຶ່ງປັດໄຈຕົ້ນຕໍທີ່ເຮັດໃຫ້ການທ່ອງທ່ຽວຫວຽດນາມຄຶກຄື້ນກວ່າເກົ່າຍ້ອນໂຄງການນໍາຮອຍການທ່ອງທ່ຽວ ແລະ ການເປີດຄືນຖ້ຽວບິນຕ່າງໆຢ່າງປົກກະຕິ.

ປະລິມານນັກທ່ອງທ່ຽວຕ່າງປະເທດທີ່ເດີນທາງເຂົ້າປະເທດຫວຽດນາມ ທາງອາກາດກວມເອົາ 87,8% ຂອງນັກທ່ອງທ່ຽວຂາເຂົ້າທັງໝົດ, ຖັດມາທາງບົກ (12,1%) ແລະ ທາງທະເລ (0,1%).

ໂດຍສ່ວນຫລາຍ ແມ່ນມາຈາກອາຊີ ກວມເອົາ 66,5%. ຫວຽດນາມ ເປີດຊາຍແດນ ຮັບ ນັກທ່ອງທ່ຽວສາກົນຂາເຂົ້າຢ່າງເຕັມຮູບແບບ ຕັ້ງແຕ່ ວັນທີ 15 ມີນາ 2022 ນີ້, ຫລັງຈາກ ປະກາດ ຍົກເລີກການຈຳກັດຄວາມຖີ່ຂອງຖ້ຽວບິນລະຫວ່າງປະເທດທັງໝົດຕັ້ງແຕ່ວັນທີ 15 ກຸມພາ ເປັນຕົ້ນມາ.

ໃນປີ 2021, ຫວຽດນາມຕ້ອນຮັບ ນັກທ່ອງທ່ຽວຕ່າງປະເທດລວມມີ 157.300 ເທື່ອຄົນ, ຫລຸດລົງ 95,9% ເມື່ອທຽບໃສ່ໄລຍະດຽວກັນໃນປີ 2020 ເນື່ອງຈາກ ການແພ່ລະບາດຂອງພະຍາດ ໂຄວິດ-19.

ຂ່າວຈາກ: ຂປລ