ໂຄວິດ-19 ນັບມື້ຫາຍໄປ ຫັນມາຮ່ວມໃຈຍົກສູງສະຕິເປັນເຈົ້າ
ໂດຍ: ທິດກໍ່າ
ຕະຫລອດໄລຍະ 40 ກວ່າປີຜ່ານມາ ພາຍໃຕ້ການນຳພາຂອງພັກ ແລະ ລັດຖະບານ ສປປ ລາວ ປະ ເທດຊາດກ້າວສູ່ຍຸກໃໝ່ ນັ້ນກໍຄືຍຸກແຫ່ງການສ້າງສາ ແລະ ພັດທະນາປະເທດຊາດຈົນມາຮອດປັດຈຸບັນ ແລະ ລາວເຮົາ ກໍຄ່ອຍຫລຸດພົ້ນອອກຈາກປະເທດດ້ອຍພັດທະນາ.
ຢ່າງໃດກໍດີ, ໃນໄລຍະ 3 ປີຜ່ານມາ ສິ່ງທີ່ກີດຂວາງກົດໜ່ວງບາດກ້າວເດີນຂອງຊາດນັ້ນ ກໍຄືການແພ່ລະບາດຂອງພະຍາດໂຄວິດ-19 ເຮັດໃຫ້ຫລາຍຂະແໜງການຕ້ອງປະສົບບັນຫາຫຍຸ້ງຍາກຢ່າງໜັກໜ່ວງ ເປັນຕົ້ນຂະແໜງການທ່ອງທ່ຽວ, ໂຮງແຮມ, ຮ້ານອາຫານ ແລະ ຮ້ານກິນດື່ມ. ນອກນັ້ນຍັງກະທົບຮອດການຮຽນ-ການສອນຂອງຄູ-ອາຈານ ແລະ ນັກຮຽນ ນັບທັງຂະແໜງການຜະລິດອື່ນໆຈຳນວນບໍ່ໜ້ອຍ. ສະເພາະການແພ່ລະບາດຂອງພະຍາດໂຄວິດ-19 ມາຮອດວັນທີ 2 ມີນາ 2022 ທົ່ວປະເທດມີຄົນຕິດເຊື້ອໂຄວິດ-19 ສະສົມ 143.240 ຄົນ ແລະ ເສຍຊີວິດສະສົມ 623 ຄົນ ຖືວ່ານັບແຕ່ໄລຍະການລະບາດຂອງພະຍາດນີ້ພາກລັດຕ້ອງເສຍລາຍຮັບໄປຫລາຍຮ້ອຍພັນຕື້ກີບ.
ເຖິງຢ່າງໃດກໍດີ, ພາຍໃຕ້ມາດຕະການຕ່າງໆທີ່ລັດຖະບານ ກໍຄືຄະນະສະເພາະກິດຂັ້ນສູນກາງວາງອອກແຕ່ລະໄລຍະຜ່ານມານັ້ນ ເຫັນວ່າມີປະສິດທິຜົນ ແລະ ໄດ້ຜົນດີຢ່າງຫລວງຫລາຍ.
ຄາດວ່າຂັ້ນຕໍ່ໄປເພື່ອ ບໍ່ໃຫ້ເຊື້ອພະຍາດໂຄວິດ-19 ກັບຄືນມາແພ່ລະບາດຄັ້ງໃຫຍ່ອີກ ພວກເຮົາຕ້ອງພ້ອມກັນມີສະຕິເປັນເຈົ້າການປ້ອງກັນຕ້ານ, ສະກັດກັ້ນ ແລະ ແກ້ໄຂບໍ່ໃຫ້ເຊື້ອພະຍາດດັ່ງກ່າວແພ່ລະບາດໃນຊຸມຊົນ, ປັບປ່ຽນແບບແຜນການດຳລົງຊີວິດ ແບບໃຫ້ຢູ່ກັບພະຍາດຊະນິດນີ້ໃຫ້ໄດ້.
ເມື່ອເຊື້ອພະຍາດໂຄວິດ-19 ໝົດໄປຈາກສັງຄົມລາວເຮົາແລ້ວ ຊີວິດການເປັນຢູ່ຂອງປະຊາຊົນລາວກໍຍິ່ງດີຂຶ້ນນັບມື້, ເສດຖະກິດ-ສັງຄົມຂອງປະເທດກໍຍິ່ງຈະດີ ແລະ ຂະຫຍາຍຕົວຫລາຍເທົ່າເພາະທຸກຢ່າງມັນເກີດມາຈາກພວກເຮົາມີສະຕິເປັນເຈົ້າ.
