ນະຄອນຫລວງ ພົບ 2 ຄົນຕິດໂຄວິດ-19 ສາຍພັນໂອມິຄຣອນໂດຍບໍ່ຮູ້ແຫລ່ງທີ່ມາ

ທ່ານ ດຣ ສີສະຫວາດ ສຸດທານີລະໄຊ ຮອງຫົວໜ້າກົມພະຍາດຕິດຕໍ່ ກະຊວງສາທາລະນະສຸກ ກ່າວໃນການຖະແຫລງຂ່າວປະຈຳວັນທີ 2 ກຸມພາ 2022 ນີ້ວ່າ:

ເຖິງວ່າໂຕເລກລາຍງານການຕິດພະຍາດໂຄວິດ-19 ບໍ່ຫລາຍ, ແຕ່ສະພາບການລະບາດຢູ່ຕ່າງປະເທດ ລວມທັງບັນດາປະເທດອ້ອມຂ້າງ ສປປ ລາວ ຍັງບໍ່ມີທ່າອຽງຫລຸດລົງເນື່ອງຈາກການລະບາດຂອງສາຍພັນໂອມິຄຣອນໃນຊຸມຊົນ.

ສຳລັບຢູ່ນະຄອນຫລວງພົບຜູ້ຕິດເຊື້ອສາຍພັນໂອມິຄຣອນ 2 ຄົນ ທີ່ຍັງບໍ່ທັນຮູ້ແຫລ່ງທີ່ມາ ແລະ ນີ້ໄດ້ເປັນສັນຍານເຕືອນທຸກຄົນຈົ່ງມີສະຕິເຝົ້າລະວັງ ແລະ ຮ່ວມກັນປ້ອງກັນການຕິດເຊື້ອຈາກພະຍາດໂຄວິດ-19 ຢ່າງເຄັ່ງຄັດໂດຍປະຕິບັດຕາມແຈ້ງການໃໝ່ສະບັບເລກທີ 258/ຫສນຍ ລົງວັນທີ 1 ມີນາ 2022. ທີ່ສຳຄັນເມື່ອສະມາຊິກໃນຄອບຄົວ ຫລື ທ່ານໃດບໍ່ສະບາຍ ຫລື ມີອາ ການຄ້າຍຄືໄຂ້ຫວັດ ຂໍໃຫ້ໄປກວດຊອກຫາເຊື້ອເພາະຖ້າພວກເຮົາຄົ້ນພົບໄວ ກໍໄດ້ຮັບການປີ່ນປົວທັນການ ເພື່ອຫລີກເວັ້ນບໍ່ໃຫ້ເຂົ້າສູ່ຂັ້ນວິກິດ ຫລື ເສຍຊີວິດ.