ໄທສັນ ຟິວຣີ ປະກາດແຂວນນວມເດືອນເມສານີ້ ຫລັງຈົບນັດປ້ອງກັນແຊ໊ມໂລກ

ໄທສັນ ຟິວຣີ ຍອດນັກຊົກຊາວອັງກິດ ປະກາດຈະແຂວນນວມໃນເດືອນເມສານີ້ ຫລັງຈົບນັດປ້ອງກັນແຊ໊ມໂລກ ຮຸ່ນເຮບວີເວດກັບ ດິລລຽນ ໄວ ຜູ້ທ້າຊີງຈາກຊາດດຽວກັນ.

ຟິວຣີ ຂຶ້ນຊົກອາຊີບໄປແລ້ວ 32 ຄັ້ງ ຊະນະ 31 (ຊະນະນ໊ອກ 22) ສະເຫມີ 1 ໂດຍປັດຈຸບັນຄອງແຊ໊ມສາຍແອວຂອງສະພາມວຍໂລກ (WBC)  ຫລັງຊົກກັບ ດີອນເທ ໄວເດີ ຈາກສະຫະລັດ ອາເມລິກາ 3 ຄັ້ງ ເຊິ່ງສະເຫມີນັດທຳອິດ ກ່ອນຊະນະອີກ 2 ນັດຕໍ່ມາ.

ຟິວຣີ ມີຄິວຕໍ່ໄປຕ້ອງຂຶ້ນສັງວຽນຊົກກັບ ໄວ ເຊິ່ງເປັນຜູ້ທ້າຊີງບັງຄັບຈາກ ສະພາມວຍໂລກ ກຳນົດຊົກໃນວັນທີ 23 ເມສານີ້ ທີ່ສະຫນາມກິລາເວມບຣີ ນະຄອນຫລວງລອນດອນ ຂອງອັງກິດ.

ຍອດນັກຊົກແຊ໊ມໂລກອາຍຸ 33 ປີກ່າວວ່າ : ‘‘ ນີ້ເປັນຄັ້ງສຸດທ້າຍໃນເສັ້ນທາງອາຊີບຂອງຂ້ອຍ ຫລັງຈາກນີ້ຂ້ອຍຈະເຊົາແລ້ວ ຂ້ອຍມີເງິນໃນບັນຊີທະນາຄານເຖິງ 150 ລ້ານປອນ ສຸຂະພາບແຂງແຮງ ອາຍຸຍັງບໍ່ຫລາຍ ແລະ ບໍ່ມີຫຍັງທີ່ຕ້ອງພິສູດຕົວເອງອີກແລ້ວ ’’.